ಉ.ಪ್ರ: ಸುನ್ನಿ ಮುಸ್ಲಿಮರ ಸಮಾಧಿಗಳಿಗೆ ಹಾನಿ; ಉದ್ರಿಕ್ತ ಪರಿಸ್ಥಿತಿ

ಮುಜಫ‌ರನಗರ : ಸುನ್ನಿ ಮುಸ್ಲಿಮರ ಸಮಾಧಿಗಳನ್ನು ಅಪವಿತ್ರಗೊಳಿಸಲಾಗಿರುವುದು ಕಂಡು ಬಂದಿರುವ ಹಿನ್ನೆಲೆಯಲ್ಲಿ ಮುಜಫ‌ರನಗರ ಜಿಲ್ಲೆಯ ಬೆಹರಾ ಸದಾತ್‌ ಗ್ರಾಮದಲ್ಲಿ ಉದ್ರಿಕ್ತ ಸ್ಥಿತಿ ನಿರ್ಮಾಣಗೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಗ್ರಾಮದ ಕಬರಿಸ್ಥಾನವನ್ನು ಶಿಯಾ ಮತ್ತು ಸುನ್ನಿ ಮುಸ್ಲಿಮರು ಹಂಚಿಕೊಂಡಿದ್ದಾರೆ. ಸುನ್ನಿ ಮುಸ್ಲಿಮರು ತಮ್ಮ ಅಗಲಿದ ಬಾಂಧವರ ಸಮಾಧಿ ಮುಂದೆ ಪ್ರಾರ್ಥನೆ ಸಲ್ಲಿಸಲು ತೆರಳಿದಾಗ ಅಲ್ಲಿನ ಕೆಲವು ಸಮಾಧಿಗಳು ಹಾನಿಗೀಡಾಗಿರುವುದು ಕಂಡು ಬಂತು.

ಈ ಬಗ್ಗೆ ಅವರು ಒಡನೆಯೇ ತಮ್ಮ ಪ್ರದೇಶದ  ಶಿಯಾ ಮುಸ್ಲಿಮರೊಂದಿಗೆ ಜಗಳಕ್ಕಿಳಿದರು. ಸುದ್ದಿ ತಿಳಿದ ಪೊಲೀಸರು ಸ್ಥಳಕ್ಕೆ ಧಾವಿಸಿ ಬಂದು ಪರಿಸ್ಥಿತಿಯನ್ನು ನಿಯಂತ್ರಿಸಿದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.