Ayodhya: ಏರ್‌ಪೋರ್ಟ್‌ಗೆ ಸಿಐಎಸ್‌ಎಫ್ ಸಿಬಂದಿ ನಿಯೋಜನೆ

ಹೊಸದಿಲ್ಲಿ: ಅಯೋಧ್ಯೆಯಲ್ಲಿ ಕೆಲವು ದಿನಗಳ ಹಿಂದೆ ಲೋಕಾರ್ಪಣೆಗೊಂಡ ಮಹರ್ಷಿ ವಾಲ್ಮೀಕಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಭದ್ರತೆಗೆ 150ಕ್ಕೂ ಹೆಚ್ಚು ಕೇಂದ್ರ ಕೈಗಾರಿಕ ಭದ್ರತಾ ಪಡೆಯ(ಸಿಐಎಸ್‌ಎಫ್) ಸಿಬಂದಿ ನಿಯೋಜನೆಗೆ ಕೇಂದ್ರ ಸರಕಾರ ಅನುಮೋದನೆ ನೀಡಿದೆ.

ಅಯೋಧ್ಯೆಯ ಮಹರ್ಷಿ ವಾಲ್ಮೀಕಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವು ಈ ಪಡೆಯ ವ್ಯಾಪ್ತಿಗೆ ಬರುವ ದೇಶದ 68ನೇ ನಾಗರಿಕ ವಿಮಾನ ನಿಲ್ದಾಣ ಆಗಿದೆ. ಸಿಐಎಸ್‌ಎಫ್, ವಿಮಾನ ನಿಲ್ದಾಣಕ್ಕೆ ಭಯೋತ್ಪಾದನೆ ವಿರೋಧಿ ಮತ್ತು ವಿಧ್ವಂಸಕ ವಿರೋಧಿ ರಕ್ಷಣೆಯನ್ನು ನೀಡಲಿದೆ. ಡಿಪ್ಯೂಟಿ ಕಮಾಂಡೆಂಟ್‌ ರ್‍ಯಾಂಕಿನ ಅಧಿಕಾರಿಯ ಅಡಿಯಲ್ಲಿ 150ಕ್ಕೂ ಹೆಚ್ಚು ಸಿಐಎಸ್‌ಎಫ್ ಸಿಬಂದಿ ಕೆಲಸ ಮಾಡಲಿದ್ದಾರೆ.