ರಾಷ್ಟ್ರ ರಾಜಧಾನಿ ದಿಲ್ಲಿಯಲ್ಲಿ ದಟ್ಟನೆಯ ಮಂಜು; 67 ರೈಲುಗಳು ವಿಳಂಬ

ಹೊಸದಿಲ್ಲಿ : ರಾಷ್ಟ್ರ ರಾಜಧಾನಿ ದಿಲ್ಲಿಯಲ್ಲಿ ಇಂದು ಬುಧವಾರ ಬೆಳಗ್ಗೆ ದಟ್ಟನೆಯ ಮಂಜು ಮುಸಕಿದ ಕಾರಣ 67 ಉತ್ತರಮುಖೀ ರೈಲುಗಳ ಸೇವೆಯಲ್ಲಿ ವಿಳಂಬ ಉಂಟಾಯಿತು. 

ಹಾಗಿದ್ದರೂ ವಿಮಾನಗಳ ಹಾರಾಟಕ್ಕೆ ಯಾವುದೇ ಆಡಚಣೆ ಉಂಟಾಗಲಿಲ್ಲ. ವಿಮಾನಗಳು ಎಂದಿನಂತೆ ತಮ್ಮ ಹಾರಾಟ ನಡೆಸಿವೆ ಎಂದು ಇಂದಿರಾಗಾಂಧಿ ಇಂಟರ್‌ನ್ಯಾಶನಲ್‌ ಏರ್‌ ಪೋರ್ಟ್‌ನ ಅಧಿಕೃತ ವೆಬ್‌ಸೈಟ್‌ ಹೇಳಿದೆ.

ದಿಲ್ಲಿಯ ಸಫ್ದರ್‌ಜಂಗ್‌ ವೀಕ್ಷಣಾಲಯದಲ್ಲಿ ದಾಖಲಾದ ಪ್ರಕಾರ ಇಂದು ಬೆಳಗ್ಗೆ 5.30ರ ಹೊತ್ತಿಗೆ ಗೋಚರತೆಯು 300 ಮೀಟರ್‌ಗಳಿಗೆ ಸೀಮಿತವಾಗಿತ್ತು; ಪಾಲಂ ನಲ್ಲಿ ದಾಖಲಾದ ಪ್ರಕಾರ ಗೋಚರತೆಯು 350 ಮೀಟರ್‌ಗೆ ಸೀಮಿತವಾಗಿತ್ತು. ಬೆಳಗ್ಗೆ 8.30ರ ಹೊತ್ತಿಗೆ ಈ ಸ್ಥಿತಿಯಲ್ಲಿ ಕೊಂಚ ಸುಧಾರಣೆ ಕಂಡು ಗೋಚರತೆಯು 500 ಮೀ.ಗೆ ಏರಿತು ಎಂದು ಹವಾಮಾನ ಇಲಾಖಾಧಿಕಾರಿ ತಿಳಿಸಿದ್ದಾರೆ. 

ದಿಲ್ಲಿಯಲ್ಲಿ ದಾಖಲಾಗಿರುವ ಕನಿಷ್ಠ ತಾಪಮಾನ 8.9 ಡಿಗ್ರಿ ಸೆಲ್‌ಶಿಯಸ್‌. 8.30ರ ಹೊತ್ತಿಗೆ ದಾಖಲಾದ ಆದ್ರìತೆಯು ಶೇ.97ರ ಪ್ರಮಾಣದಲ್ಲಿತ್ತು ಎಂದು ಅಧಿಕಾರಿ ಹೇಳಿದ್ದಾರೆ.