2080-99ಕ್ಕೆ ತಾಪಮಾನ 5 ಡಿ.ಸೆ. ಹೆಚ್ಚಳ? ಇಂಗಾಲ ಹೊರಸೂಸುವಿಕೆ ದುಪ್ಪಟ್ಟಾದರೆ ಸಂಕಷ್ಟ ಖಚಿತ

ನವದೆಹಲಿ: ಹವಾಮಾನ ವೈಪರೀತ್ಯದ ದುಷ್ಪರಿಣಾಮಗಳು ಒಂದೊಂದಾಗಿ ಕಾಣಿಸಿಕೊಳ್ಳುತ್ತಿರುವಾಗಲೇ ಗ್ರೀನ್‌ಪೀಸ್‌ ಇಂಡಿಯಾ ಹೇಳಿರುವ ಭವಿಷ್ಯವು ಭಾರತೀಯರನ್ನು ಮತ್ತಷ್ಟು ಆತಂಕಕ್ಕೆ ದೂಡಿದೆ.

2050ರ ವೇಳೆಗೆ ಜಾಗತಿಕ ಇಂಗಾಲ ಹೊರಸೂಸುವಿಕೆ ಪ್ರಮಾಣವೇನಾದರೂ ದುಪ್ಪಟ್ಟಾದರೆ, 2080-99ರ ಅವಧಿಯಲ್ಲಿ ದೆಹಲಿ ಮತ್ತು ಮುಂಬೈ ವಾರ್ಷಿಕ ತಾಪಮಾನ 5 ಡಿಗ್ರಿ ಸೆಲ್ಸಿಯಸ್ ನಷ್ಟು ಹೆಚ್ಚಳವಾಗಲಿದೆ ಎಂದು ಗ್ರೀನ್‌ಪೀಸ್‌ ಸಂಸ್ಥೆಯ ಉಷ್ಣಹವೆಯ ಮುನ್ಸೂಚನೆ ವರದಿ ಹೇಳಿದೆ.

ಹವಾಮಾನ ಬದಲಾವಣೆಗೆ ಸಂಬಂಧಿಸಿದ ಅಂತರ್‌ಸರ್ಕಾರಿ ಸಮಿತಿಯ 6ನೇ ಮೌಲ್ಯಮಾಪನಾ ವರದಿಯನ್ನು ಆಧರಿಸಿ ಗ್ರೀನ್‌ಪೀಸ್‌ ಈ ವರದಿ ತಯಾರಿಸಿದೆ.

2050ರ ವೇಳೆಗೆ ಜಾಗತಿಕ ಸಿಒ2(ಇಂಗಾಲ) ಹೊರಸೂಸುವಿಕೆ ದುಪ್ಪಟ್ಟಾಗಿದ್ದೇ ಆದಲ್ಲಿ, 2080-99ರ ಅವಧಿಯಲ್ಲಿನ ತಾಪಮಾನವು 1995-2015ರ ಅವಧಿಯಲ್ಲಿದ್ದಿದ್ದಕ್ಕಿಂತ 5 ಡಿ.ಸೆ.ನಷ್ಟು ಹೆಚ್ಚಳವಾಗಲಿದೆ. ದೆಹಲಿಯ ವಾರ್ಷಿಕ ಗರಿಷ್ಠ ತಾಪಮಾನ (1995 -2014ರ ಜೂನ್‌ ತಿಂಗಳ ಮಧ್ಯದಲ್ಲಿ) 41.93 ಡಿ.ಸೆ.ನಷ್ಟಿದ್ದು, 2080-99ರ ಅವಧಿಯಲ್ಲಿ ಅದು 45.97 ಡಿ.ಸೆ.ಗೆ ಏರಲಿದೆ. ಇದು ಕೆಲವೊಮ್ಮೆ 48.19 ಡಿ.ಸೆ.ವರೆಗೂ ಹೋಗುವ ಸಾಧ್ಯತೆಯಿದೆ ಎಂದು ವರದಿ ಹೇಳಿದೆ.