ಹೊಸದಿಲ್ಲಿ: ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ (CPCB) ಪ್ರಕಾರ ದೆಹಲಿಯಲ್ಲಿನ ಗಾಳಿಯ ಗುಣಮಟ್ಟವು ಸೋಮವಾರ ತೀರಾ ಕಳಪೆ ಎಂಬಷ್ಟರ ಮಟ್ಟಿಗೆ ಹದಗೆಟ್ಟಿದೆ. ಜನರು ಭಾನುವಾರ ನಿಷೇಧವನ್ನು ಉಲ್ಲಂಘಿಸಿ ಪಟಾಕಿಗಳನ್ನು ಸಿಡಿಸಿ ದೀಪಾವಳಿ ಆಚರಿಸುತ್ತಿದ್ದಂತೆ ದೆಹಲಿಯ ಹಲವು ಪ್ರದೇಶಗಳಲ್ಲಿ ಗಾಳಿಯ ಗುಣಮಟ್ಟ ತೀವ್ರ ಸ್ವರೂಪದಲ್ಲಿ ಹದಗೆಟ್ಟಿದೆ.
ಮಾನ್ಯ ಮಾಲಿನ್ಯ ನಿಯಂತ್ರಣ ( PUC) ಪ್ರಮಾಣಪತ್ರಗಳಿಲ್ಲದೆ ವಾಹನ ಚಾಲನೆ ಮಾಡಿದ್ದಕ್ಕಾಗಿ ದೆಹಲಿ ಟ್ರಾಫಿಕ್ ಪೊಲೀಸರು ದೀಪಾವಳಿಯಂದು ವಾಹನ ಮಾಲಕರಿಗೆ 700 ಕ್ಕೂ ಹೆಚ್ಚು ಚಲನ್‌ಗಳನ್ನು ನೀಡಿದ್ದಾರೆ ಎಂದು ಅಧಿಕಾರಿಗಳು ಸೋಮವಾರ ತಿಳಿಸಿದ್ದಾರೆ.
ನವೆಂಬರ್ 5 ರಂದು, ನಗರದ ಗಾಳಿಯ ಗುಣಮಟ್ಟವು ‘ಸಿವಿಯರ್ ಪ್ಲಸ್’ ವರ್ಗಕ್ಕೆ ಕುಸಿದ ನಂತರ, ಕೇಂದ್ರದ ಮಾಲಿನ್ಯ ನಿಯಂತ್ರಣ ಯೋಜನೆಯ ಹಂತ IV -GRAP ದೆಹಲಿಯಲ್ಲಿ ಜಾರಿಗೆ ಬಂದಿದ್ದು, ಅದರ ಅಡಿಯಲ್ಲಿ, ನಗರದಲ್ಲಿ ಎಲ್ಲಾ ರೀತಿಯ ನಿರ್ಮಾಣ ಕಾರ್ಯಗಳು ಮತ್ತು ಮಾಲಿನ್ಯಕಾರಕ ಟ್ರಕ್‌ಗಳ ಪ್ರವೇಶವನ್ನು ನಿಷೇಧಿಸಲಾಗಿದೆ.
ರಾಷ್ಟ್ರ ರಾಜಧಾನಿಯಲ್ಲಿ ಹಳೆಯ ಡೀಸೆಲ್/ ಪೆಟ್ರೋಲ್ ವಾಹನಗಳು ಮತ್ತು ಟ್ರಕ್‌ಗಳು ಅನಗತ್ಯ ವಸ್ತುಗಳನ್ನು ಸಾಗಿಸಿದರೆ ಮೋಟಾರು ವಾಹನ ಕಾಯ್ದೆಯಡಿ 20,000 ರೂ.ದಂಡ ಹಾಕಲಾಗುತ್ತಿದೆ.
ಪೊಲೀಸರು ಹಂಚಿಕೊಂಡ ಮಾಹಿತಿಯ ಪ್ರಕಾರ, ಮಾನ್ಯ PUC ಪ್ರಮಾಣಪತ್ರವಿಲ್ಲದೆ ಸಂಚರಿಸುವ ವಾಹನಗಳಿಗೆ ಭಾನುವಾರ (ನ12) 710 ಚಲನ್‌ಗಳನ್ನು ನೀಡಲಾಗಿದೆ. ಅಡ್ಡಿಪಡಿಸುವ ಅಥವಾ ಅನುಚಿತ ಪಾರ್ಕಿಂಗ್‌ಗಾಗಿ ಒಟ್ಟು 584 ಚಲನ್‌ಗಳು ಮತ್ತು 1,085 ನೋಟಿಸ್‌ಗಳನ್ನು ನೀಡಲಾಯಿತು ಮತ್ತು 44 ವಾಹನಗಳನ್ನು ಟ್ರಾಫಿಕ್ ಕ್ರೇನ್‌ಗಳ ಮೂಲಕ ಎಳೆದೊಯ್ಯಲಾಗಿದೆ. ಸಂಚಾರ ದಟ್ಟಣೆ ವಿರುದ್ಧ ವಾಹನ ಚಲಾಯಿಸಿದ್ದಕ್ಕಾಗಿ ಕ್ರಮವಾಗಿ 61 ಮತ್ತು ಪ್ರವೇಶ ನಿಷೇಧ ನಿಯಮಗಳ ಉಲ್ಲಂಘನೆಗಾಗಿ 263 ಚಲನ್‌ಗಳನ್ನು ನೀಡಲಾಗಿದೆ.
