Davis Cup ವಿಶ್ವ ಗ್ರೂಪ್‌-2 ಟೆನಿಸ್‌: 1-1 ಸಮಬಲ

ಲಕ್ನೋ: ಮೊರಾಕ್ಕೊ ಎದುರಿನ ದ್ವಿತೀಯ ಸಿಂಗಲ್ಸ್‌ ಗೆದ್ದ ಸುಮಿತ್‌ ನಾಗಲ್‌, ಡೇವಿಸ್‌ ಕಪ್‌ ವಿಶ್ವ ಗ್ರೂಪ್‌-2 ಟೆನಿಸ್‌ ಪಂದ್ಯಾವಳಿಯಲ್ಲಿ ಭಾರತವನ್ನು 1-1 ಸಮಬಲಕ್ಕೆ ತಂದು ನಿಲ್ಲಿಸಿದ್ದಾರೆ. ಅವರು ಆ್ಯಡಂ ಮೌಂದಿರ್‌ ವಿರುದ್ಧ 6-3, 6-3 ಸುಲಭ ಗೆಲುವು ಸಾಧಿಸಿದರು.

ಮೊದಲ ಸಿಂಗಲ್ಸ್‌ ವೇಳೆ ಬಿಸಿಲಿನ ಬೇಗೆ ಹಾಗೂ ಕ್ರ್ಯಾಂಪ್‌ನಿಂದ ಬಳಲಿದ ಶಶಿಕುಮಾರ್‌ ಮುಕುಂದ್‌, ಪಂದ್ಯವನ್ನು ಅರ್ಧದಲ್ಲೇ ತ್ಯಜಿಸಿದ್ದರು. ಇವರು ಯಾಸಿನ್‌ ದ್ಲಿಮಿ ವಿರುದ್ಧ ಆಡಲಿಳಿದಿದ್ದರು. ಇಬ್ಬರಿಗೂ ಇದು ಡೇವಿಸ್‌ ಕಪ್‌ ಪದಾರ್ಪಣ ಪಂದ್ಯವಾಗಿತ್ತು.

ತೃತೀಯ ಸೆಟ್‌ ವೇಳೆ ಕಾಲಿನ ಸೆಳೆತದಿಂದಾಗಿ ಮುಕುಂದ್‌ ಪಂದ್ಯ ತ್ಯಜಿಸುವ ನಿರ್ಧಾರಕ್ಕೆ ಬಂದರು. ಆಗ ಅವರು 7-6 (4), 5-7, 1-4ರ ಹಿನ್ನಡೆಯಲ್ಲಿದ್ದರು.