ಡಾಟಾ ಸಂರಕ್ಷಣೆ ಜೀವನ ಹಕ್ಕಿನ ಒಂದು ಭಾಗ: ಕೇಂದ್ರ

ಹೊಸದಿಲ್ಲಿ:  ದೇಶದ ಜನರ ವೈಯಕ್ತಿಕ ವಿವರಗಳನ್ನು ಒಳಗೊಂಡ “ದತ್ತಾಂಶ’ಗಳು ಅವರ ಜೀವನದ ಹಕ್ಕಿನ ಒಂದು ಭಾಗವಾಗಿದ್ದು, ಇವುಗಳ ರಕ್ಷಣೆಗೆ ಅಗತ್ಯ ಕಾನೂನು ರೂಪಿಸುತ್ತೇವೆ ಎಂದು ಕೇಂದ್ರ ಸರಕಾರ ಸುಪ್ರೀಂಕೋರ್ಟ್‌ಗೆ ಹೇಳಿದೆ. 

ವಾಟ್ಸ್‌ಆéಪ್‌ನ ಖಾಸಗಿ ನೀತಿ ಕುರಿತಂತೆ ವಿಚಾರಣೆ ನಡೆಸುತ್ತಿರುವ ನ್ಯಾ| ದೀಪಕ್‌ ಮಿಶ್ರಾ ನೇತೃತ್ವದ 5 ಜಡ್ಜ್ಗಳ ಸಂವಿಧಾನ ಪೀಠಕ್ಕೆ ಸರಕಾರ ಡಾಟಾ ಸಂರಕ್ಷಣೆಯ ಬಗ್ಗೆ ಹೇಳಿದೆ. ಮೂಲಭೂತ ಹಕ್ಕಿನಲ್ಲೇ ಮಾಹಿತಿ ಸಂರಕ್ಷಣೆಯೂ ಸೇರಿಕೊಂಡಿದೆ. ಇದಕ್ಕೆ ಧಕ್ಕೆಯಾಗದಂತೆ ನೋಡಿಕೊಳ್ಳಲು ಸೂಕ್ತ ನಿಯಮಾವಳಿ ರೂಪಿಸುತ್ತೇವೆ ಎಂದು ಅರಿಕೆ ಮಾಡಿಕೊಂಡಿದೆ. 

ಸೇವೆ ನೀಡುವಾಗ ಬಳಕೆದಾರರ ಮೇಲೆ ನಿಯಮ ಹೇರಕೂಡದು ಎಂದು ಸರಕಾರ ಹೇಳಿತು. ಇದಕ್ಕೆ ಪ್ರತಿಯಾಗಿ ನ್ಯಾ. ಮಿಶ್ರಾ ಅವರು, ಖಾಸಗಿ ವಿಚಾರ ಬೇರೆ, ಇದೇ ಬೇರೆ. ಆದರೆ ನನ್ನ ಮುಂದೆ ಆಯ್ಕೆಗಳಿವೆ, ನಿಮ್ಮಲ್ಲಿ ಸೌಲಭ್ಯವಿದೆ. ನೀವು ಸೌಲಭ್ಯ ನೀಡುವಾಗ ಯಾವುದೇ ಷರತ್ತು ಹಾಕಬಾರದಲ್ಲವೇ ಎಂದು ವಾಟ್ಸ್‌ಆ್ಯಪ್‌ ಪರ ವಕೀಲರನ್ನು ಪ್ರಶ್ನಿಸಿದರು. ಇದಕ್ಕೆ ಉತ್ತರಿಸಿದ ವಕೀಲ ಸಿಬಲ್‌, ಕಕ್ಷಿದಾರ ಸಂಸ್ಥೆ ಮಾಹಿತಿ ಪಡೆದರೂ ಅದನ್ನು ಬೇರೆಯವರೊಂದಿಗೆ ಹಂಚಿಕೊಳ್ಳುತ್ತಿಲ್ಲ ಎಂದರು.