ಫ‌ುಟ್‌ಪಾತ್‌ನಲ್ಲಿ ಹೋಗುತ್ತಿದ್ದವನ ಮೇಲೆ ಬಂದು ಗುದ್ದಿದರೆ ನಾನೇನು ಮಾಡೋಕ್ಕಾಗುತ್ತೆ … ಹೀಗಂತ ಕೋಮಲ್‌ ಬೇಸರ ತೋಡಿಕೊಂಡಿದ್ದರು. ಅದಕ್ಕೆ ಕಾರಣ ಅವರ ನಟನೆಯ “ಕೆಂಪೇಗೌಡ-2′ ಚಿತ್ರ ರಿಲೀಸ್‌ (ಆ.09) ದಿನವೇ ಬಹುನಿರೀಕ್ಷಿತ, ಬಹುತಾರಾಗಣದ “ಕುರುಕ್ಷೇತ್ರ’ ಚಿತ್ರ ಬಿಡುಗಡೆಯಾಗುತ್ತಿರುವುದು. ಬಹುದಿನಗಳ ನಂತರ ಕೋಮಲ್‌ ತೆರೆಮೇಲೆ ಕಾಣಿಸಿಕೊಳ್ಳುತ್ತಿರುವ “ಕೆಂಪೇಗೌಡ-2′ ಚಿತ್ರ ಆಗಸ್ಟ್‌ 09 ರಂದು ತೆರೆಕಾಣುತ್ತಿದೆ.
ಆಗಸ್ಟ್‌ 02 ರಂದು ತೆರೆಕಾಣಬೇಕಿದ್ದ “ಕುರುಕ್ಷೇತ್ರ’ ತನ್ನ ಬಿಡುಗಡೆಯನ್ನು ಆ.09ಕ್ಕೆ ಹಾಕಿರುವುದರಿಂದ ಕೋಮಲ್‌ ಬೇಸರಿಸಿಕೊಂಡಿದ್ದರು. ಈಗ ಕೋಮಲ್‌ ಬೆಂಬಲಕ್ಕೆ ಸ್ವತಃ ದರ್ಶನ್‌ ಅಭಿಮಾನಿಗಳು ನಿಂತಿದ್ದಾರೆ. ಇವರ ಜೊತೆಗೆ ಜಗ್ಗೇಶ್‌ ಅವರ ಅಭಿಮಾನಿಗಳು ಕೂಡಾ ಕೋಮಲ್‌ಗೆ ಸಾಥ್‌ ನೀಡುತ್ತಿದ್ದಾರೆ. ಈ ಬಗ್ಗೆ ಅಭಿಮಾನಿಗಳು ಸೋಶಿಯಲ್‌ ಮೀಡಿಯಾದಲ್ಲಿ ತಮ್ಮ ಅನಿಸಿಕೆಗಳನ್ನು ಹಂಚಿಕೊಳ್ಳುವ ಜೊತೆಗೆ ಕೋಮಲ್‌ ಅವರ “ಕೆಂಪೇಗೌಡ-2′ ಚಿತ್ರವನ್ನೂ ನೋಡುವುದಾಗಿ ಹೇಳಿದ್ದಾರೆ.
ದರ್ಶನ್‌ ಅವರ ಕೆಲವು ಅಭಿಮಾನಿಗಳು ಈ ಕುರಿತು ಟ್ವೀಟ್‌ ಮಾಡಿದ್ದಾರೆ. ಅವರ ಅಭಿಮಾನಿಗಳು ಮಾಡಿರುವ ಕೆಲವು ಟ್ವೀಟ್‌ಗಳು ಹೀಗಿವೆ: “ತೂಗುದೀಪ ಅಭಿಮಾನಿಗಳಲ್ಲಿ ಮನವಿ 9/8/2019 ಕೋಮಲ್‌ ರ್ಸ ಅವರ ‘ಕೆಂಪೇಗೌಡ 2′ ಚಿತ್ರ ಬರುತ್ತಿದೆ ದಯವಿಟ್ಟು ಎಲ್ಲಾ ಡಿ ಬಾಸ್ ಅಭಿಮಾನಿಗಳು ಡಿ ಬಾಸ್ “ಕುರುಕ್ಷೇತ್ರ’ ಜಾತ್ರೆ ಆದ ಮೇಲೆ ಕೋಮಲ್‌ ಸರ್ ಅವರ ಚಿತ್ರವನ್ನು ನಿಮ್ಮ ಹತ್ತಿರದ ಚಿತ್ರಮಂದಿರಕ್ಕೆ ಹೋಗಿ ನೋಡಬೇಕು ಎಂದು ಡಿ ಬಾಸ್ ಅಭಿಮಾನಿಗಳಲ್ಲಿ ಮನವಿ ಮಾಡುತ್ತೇನೆ’ ಎಂದರೆ, ಇನ್ನು ಕೆಲವು ಅಭಿಮಾನಿಗಳು “ನಮ್ಮ ಡಿ ಬಾಸ್ ಎಲ್ಲರಿಗೂ ಬೆಂಬಲ ಕೊಡುತ್ತಾರೆ.
ಅದರಂತೆ ನಾವು ಕೂಡಾ ಎಲ್ಲರಿಗೂ ಬೆಂಬಲ ಕೊಡುತ್ತೇವೆ. ನರ್ತಕಿಯಲ್ಲಿ “ಕುರುಕ್ಷೇತ್ರ’ ಹಾಗೂ ಸಂತೋಷ್‌ ಚಿತ್ರಮಂದಿರಲ್ಲಿ “ಕೆಂಪೇಗೌಡ-2′ ನೋಡುತ್ತೇವೆ’ ಎಂದಿದ್ದಾರೆ. ಜಗ್ಗೇಶ್‌ ಅಭಿಮಾನಿಗಳು ಕೂಡಾ ಕೋಮಲ್‌ ಬೆಂಬಲಕ್ಕೆ ನಿಂತಿದ್ದು, ಸಿನಿಮಾ ನೋಡುವ ಭರವಸೆ ನೀಡಿದ್ದಾರೆ. ಈ ಮೂಲಕ ಅನಾವಶ್ಯಕ ವಿವಾದವಾಗದಂತೆ ಸ್ವತಃ ಅಭಿಮಾನಿಗಳೇ ನೋಡಿಕೊಂಡಿರುವುದು ಶ್ಲಾಘನೀಯ. “ಕೆಂಪೇಗೌಡ-2′ ಚಿತ್ರದಲ್ಲಿ ಕೋಮಲ್‌ ಮೊದಲ ಬಾರಿಗೆ ಔಟ್‌ ಅಂಡ್‌ ಔಟ್‌ ಆ್ಯಕ್ಷನ್‌ ಇಮೇಜ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ.
