ದ.ಕನ್ನಡ : ಶೇಕಡವಾರು ಮತದಾನದಲ್ಲಿ ಏರಿಕೆ

ಮಂಗಳೂರು: ಈ ಬಾರಿಯ ವಿಧಾನಸಭಾ ಚುನಾವಣೆಯಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಶೇ.77.56 ಮತದಾನ ದಾಖಲಾಗಿದ್ದು, ಉತ್ತಮ ನಿರ್ವಹಣೆ ತೋರಿದೆ. ಕಳೆದ ಬಾರಿಗೆ ಹೋಲಿಸಿದರೆ ಒಟ್ಟು ಮತದಾನ ಪ್ರಮಾಣದಲ್ಲಿ ಶೇಕಡವಾರು 3.25 ಹೆಚ್ಚಳವಾಗಿದೆ. 2013ರ ವಿಧಾನಸಭಾ ಚುನಾವಣೆಯಲ್ಲಿ ಇಲ್ಲಿ ಒಟ್ಟು ಶೇ.74.48 ಮತದಾನವಾಗಿತ್ತು.

ಜಿಲ್ಲೆಯಲ್ಲಿ ಈ ಬಾರಿ ಗರಿಷ್ಠ ಮತದಾನವಾಗಬೇಕು ಎಂಬ ನೆಲೆಯಲ್ಲಿ ಜಿಲ್ಲಾಡಳಿತ ಚುನಾವಣೆಗೆ ಕೆಲವು ತಿಂಗಳ ಮೊದಲೇ ಇದಕ್ಕೆ ಪೂರಕವಾಗಿ ಪ್ರಕ್ರಿಯೆಗಳನ್ನು ಆರಂಭಿಸಿತ್ತು. ಸ್ವೀಪ್‌ ಮೂಲಕ ಜಿಲ್ಲೆಯಾದ್ಯಂತ ಮತದಾರರಲ್ಲಿ ಅರಿವು ಕಾರ್ಯಕ್ರಮಗಳನ್ನು ವ್ಯಾಪಕವಾಗಿ ನಡೆಸಿತ್ತು.  

ಜಿಲ್ಲೆಯ ಒಟ್ಟು 17,11,848 ಅರ್ಹ ಮತದಾರರಲ್ಲಿ 13,27,794 ಮಂದಿ ಮತ ಚಲಾಯಿಸಿದ್ದಾರೆ. 2013ರ ಚುನಾವಣೆಯಲ್ಲಿ ಒಟ್ಟು 15,01,024 ಮತದಾರರ ಪೈಕಿ 11,18,025 ಮಂದಿ ಮತ ಚಲಾಯಿಸಿದ್ದರು.  

ಕ್ಷೇತ್ರವಾರು ಹೆಚ್ಚಳ
ಬೆಳ್ತಂಗಡಿಯಲ್ಲಿ ಒಟ್ಟು 2,18,880 ಮತದಾರರಲ್ಲಿ 1,78,162 ಮತದಾರರು ಮತ ಚಲಾಯಿಸಿದ್ದು ಶೇ.81.40 ಮತದಾನವಾಗಿದೆ. ಮೂಡಬಿದಿರೆಯಲ್ಲಿ ಒಟ್ಟು 2,00,045 ಮತದಾರರಲ್ಲಿ 1,50,917 ಮತದಾರರು ಮತ ಚಲಾಯಿಸಿದ್ದು ಶೇ. 75.44 ಮತದಾನವಾಗಿದೆ. ಮಂಗಳೂರು ನಗರ ಉತ್ತರದಲ್ಲಿ 2,34,826 ಮತದಾರರಲ್ಲಿ 1,75,071 ಮತದಾರರು ಮತ ಚಲಾಯಿಸಿದ್ದು, ಶೇ. 74.55 ಮತದಾನ ದಾಖಲಾಗಿದೆ.  

ಮಂಗಳೂರು ದಕ್ಷಿಣದಲ್ಲಿ ಒಟ್ಟು 2,40,057 ಮತದಾರರ ಪೈಕಿ 1,61,969 ಮತದಾರರು ಮತ ಹಾಕಿದ್ದು ಶೇ.67.47 ಮತದಾನ ನಡೆದಿದೆ. ಮಂಗಳೂರು ಕ್ಷೇತ್ರದಲ್ಲಿ 1,95,735 ಮತದಾರರಲ್ಲಿ 1,48,229 ಮತದಾರರು ಮತ ಚಲಾಯಿಸಿದ್ದು ಶೇ.75.73 ಮತದಾನವಾಗಿದೆ.  

ಬಂಟ್ವಾಳದಲ್ಲಿ 2,21,735 ಮತದಾರರ ಪೈಕಿ 1,81,590 ಮಂದಿ ಮತ ಹಾಕಿದ್ದು, ಶೇ.81.89 ಮತದಾನವಾಗಿದೆ.  ಪುತೂರ‌ಲ್ಲಿ 2,01,884 ಮತದಾರರಲ್ಲಿ 1,64,938 ಮಂದಿ ಮತ ಚಲಾಯಿಸಿದ್ದು, ಶೇ. 81.70 ಮತದಾನ ದಾಖಲಾಗಿದೆ. ಸುಳ್ಯದಲ್ಲಿ 1,98,686 ಮತದಾರರಲ್ಲಿ 1,66,854 ಮಂದಿ ಮತ ಚಲಾಯಿಸಿದ್ದು ಶೇ. 83.98 ಮತದಾನ ಆಗಿದೆ.

ಈ ಬಾರಿಯೂ ಸುಳ್ಯ ಪ್ರಥಮ
ಈ ಬಾರಿಯ ವಿಧಾನಸಭಾ ಚುನಾವಣೆಯಲ್ಲೂ ಗರಿಷ್ಠ ಮತದಾನದ ಮೂಲಕ ಸುಳ್ಯ ಕ್ಷೇತ್ರವು ಜಿಲ್ಲೆಯಲ್ಲಿ ಪ್ರಥಮ ಸ್ಥಾನ ಪಡೆದಿದೆ. ಇಲ್ಲಿ ಈ ಬಾರಿ ಶೇ. 83.98 ಮತದಾನವಾಗಿದೆ. 2013ರ ವಿಧಾನಸಭಾ ಚುನಾವಣೆಯಲೂ ಶೇ. 80.63 ಮತದಾನ ಆಗುವ ಮೂಲಕ ಸುಳ್ಯ ಪ್ರಥಮ ಸ್ಥಾನ ಗಳಿಸಿತ್ತು.

ಜಿಲ್ಲೆಯಲ್ಲಿ ಚುನಾವಣೆ ಶಾಂತಿಯುತವಾಗಿ ನಡೆದಿದ್ದು, ಉತ್ತಮ ಮತದಾನ ದಾಖಲಾಗಿದೆ. ಇದರ ಹಿಂದೆ ಜಿಲ್ಲೆಯ ಎಲ್ಲ ಅಧಿಕಾರಿಗಳು ಹಾಗೂ ಸಿಬಂದಿಗಳ ಬಹುದೊಡ್ಡ ಶ್ರಮವಿದೆ. ಒಟ್ಟು ಚುನಾವಣೆ ಪ್ರಕ್ರಿಯೆ ಸುಗಮವಾಗಿ ನಡೆದಿರುವುದು ಸಂತಸ ತಂದಿದೆ.
– ಶಶಿಕಾಂತ್‌ ಸೆಂಥಿಲ್‌, ಜಿಲ್ಲಾ ಮುಖ್ಯ ಚುನಾವಣಾಧಿಕಾರಿ