ಗುಜರಾತ್‌ ಜೈಂಟ್ಸ್‌ ವಿರುದ್ಧ ದಬಾಂಗ್‌ ಡೆಲ್ಲಿಗೆ ಸೋಲು

ಗ್ರೇಟರ್‌ ನೋಯ್ಡಾ: 6ನೇ ಆವೃತ್ತಿ ಪ್ರೊ ಕಬಡ್ಡಿಯಲ್ಲಿ ದಬಾಂಗ್‌ ಡೆಲ್ಲಿ ತಂಡದ ಸೋಲಿನ ಸರಣಿ ಮುಂದುವರಿದಿದೆ. ಎದುರಾಳಿ ಗುಜರಾತ್‌ ಫಾರ್ಚೂನ್‌ ಜೈಂಟ್ಸ್‌ ವಿರುದ್ಧ ಅದು 38-45 ಅಂಕಗಳಿಂದ ಹೀನಾಯ ಸೋಲನುಭವಿಸಿದೆ. 

ಎ ವಲಯದಲ್ಲಿರುವ ಡೆಲ್ಲಿ ಈ ಸೋಲಿನೊಂದಿಗೆ 4ನೇ ಸ್ಥಾನದಲ್ಲಿದೆ. ಮತ್ತೂಂದು ಕಡೆ ಗುಜರಾತ್‌ ಗೆಲುವಿನೊಂದಿಗೆ 3ನೇ ಸ್ಥಾನದಲ್ಲಿದೆ. ಇದುವರೆಗೆ ಒಟ್ಟು 7 ಪಂದ್ಯವಾಡಿರುವ ಗುಜರಾತ್‌ 5 ಪಂದ್ಯ ಗೆದ್ದು, 1 ಸೋತು, 1 ಟೈ ಮಾಡಿಕೊಂಡಿದೆ.

ಮತ್ತೂಂದು ಕಡೆ ಡೆಲ್ಲಿ ತಂಡ 7 ಪಂದ್ಯವಾಡಿ 2ಗೆಲುವು, 4 ಸೋಲು, 1ಟೈ ಕಂಡಿದೆ.ಪ್ರಸ್ತುತ ಪಂದ್ಯದಲ್ಲಿ ಗುಜರಾತ್‌ ಪರ ಡಾಂಗ್‌ ಲೀ ಆಕ್ರಮಣಕಾರಿ ದಾಳಿ ನಡೆಸಿದರು. ಅವರು 15 ಯತ್ನದಲ್ಲಿ 10 ಅಂಕಗಳಿಸಲು ಯಶಸ್ವಿಯಾದರು. ಇವರಿಗೆ ಪರ್ವೇಶ್‌ ಭೈನ್ಸಾಲ್‌ ರಕ್ಷಣೆಯಲ್ಲಿ ನೆರವಾದರು. ಅವರು 9 ಯತ್ನಗಳಲ್ಲಿ 6 ಅಂಕ ಗಳಿಸಿದರು. ಡೆಲ್ಲಿ ಪರ ಚಂದ್ರನ್‌ ರಂಜಿತ್‌ ಅದ್ಭುತ ದಾಳಿ ನಡೆಸಿ 11 ಅಂಕ ಪಡೆದರು. ಉಳಿದ ಆಟಗಾರರಿಂದ ಇದೇ ಪ್ರದರ್ಶನ ಬರಲಿಲ್ಲ.