ಜಗದಗಲಕ್ಕೆ ಕೊವಿನ್‌ ಆ್ಯಪ್‌ : ಒಂದು ಜಗತ್ತು, ಒಂದು ಆರೋಗ್ಯದ ಅಡಿಯಲ್ಲಿ ಸೌಲಭ್ಯ

ಹೊಸದಿಲ್ಲಿ : ದೇಶದಲ್ಲಿ ಕೊರೊನಾ ಲಸಿಕೆ ವಿತರಣೆಯ ಆಧಾರಸ್ಥಂಭದಂತಿರುವ ಕೊವಿನ್‌ ಆ್ಯಪ್‌ ಸದ್ಯದಲ್ಲೇ ಜಾಗತಿಕ ಮಟ್ಟಕ್ಕೇರಲಿದೆ. ವಿಶ್ವ ಆರೋಗ್ಯ ಸಂಸ್ಥೆಯ ಕೋವಿಡ್‌ ಟೆಕ್ನಾಲಜಿ ಆ್ಯಕ್ಸೆಸ್‌ ಟೂಲ್‌ ಆಗಿ ಇದನ್ನು ಬಳಸಲಾಗುತ್ತದೆ ಎಂದು ಕೇಂದ್ರ ಸರಕಾರ ಹೇಳಿದೆ.

ಸೋಮವಾರ ಕೊವಿನ್‌ ಜಾಗತಿಕ ಶೃಂಗದಲ್ಲಿ ಆ್ಯಪ್‌ ಬಗ್ಗೆ ಪ್ರಶಂಸೆಯ ಮಾತುಗಳನ್ನಾಡಿದ ಪ್ರಧಾನಿ ಮೋದಿ, ಇದರ ಮೂಲಕ ಭಾರತದಲ್ಲಿ ಯಾವುದೇ ಅಡೆತಡೆ ಇಲ್ಲದೇ ಲಸಿಕೆ ವಿತರಿಸಲಾಗುತ್ತಿದೆ. ಸದ್ಯದಲ್ಲೇ ಇದು ಜಾಗತಿಕ ವೇದಿಕೆಗೂ ಏರಲಿದೆ. ಹಲವಾರು ದೇಶಗಳು ಇದರ ಬಳಕೆಗೆ ಉತ್ಸುಕತೆ ತೋರಿವೆ ಎಂದಿದ್ದಾರೆ.

ಕೊರೊನಾ ಜಗತ್ತಿಗೆ ಮಾನವತೆಯ ಪಾಠ ಕಲಿಸಿದೆ. ಈ ಸಾಂಕ್ರಾಮಿಕ ರೋಗವನ್ನು ಹೊಡೆದೋಡಿಸಲು ಒಟ್ಟಾಗಿ ಹೆಜ್ಜೆ ಇರಿಸಬೇಕು. ಪರಸ್ಪರ ಕಲಿಯುತ್ತ ಮುನ್ನಡೆಯಬೇಕು ಎಂದರು.

ಸೋಮವಾರ ನಡೆದ ಜಾಗತಿಕ ಶೃಂಗದಲ್ಲಿ 140 ದೇಶಗಳ 400 ಪ್ರತಿನಿಧಿಗಳು ಭಾಗವಹಿಸಿದ್ದರು. ಬಾಂಗ್ಲಾದೇಶ, ಭೂತಾನ್‌, ಮಾಲ್ಡೀವ್ಸ್‌, ಅಫ್ಘಾನಿಸ್ಥಾನ ಮತ್ತು ಗಯಾನಾದ ಸಚಿವರು ಭಾಗಿಯಾಗಿದ್ದರು.