ಉಡುಪಿ ಜಿಲ್ಲೆಯ ಕಾರ್ಕಳದ 13 ಯುವಕರಿಗೆ ವಿಜಯಪುರದಲ್ಲಿ ಪುರ್ನಸತಿ

ವಿಜಯಪುರ : ಮಹಾರಾಷ್ಟ್ರದ ಭಾರಾಮತಿಯಿಂದ ಉಡುಪಿ ಜಿಲ್ಲೆಗೆ ತೆರಳುತ್ತಿದ್ದ 13 ಯುವಕರ ತಂಡ ಲಾಕ್‍ಡೌನ್ ಹಿನ್ನೆಲೆಯಲ್ಲಿ ನಗರದಲ್ಲಿ ಸಿಲುಕಿದ್ದ ಕಾರ್ಕಳದ 13 ಯುವಕರಿಗೆ ಜಿಲ್ಲಾಧಿಕಾರಿ ನೇತೃತ್ವ ಅಧಿಕಾರಿಗಳು ಪುನರ್ವಸತಿ ಕಲ್ಪಿಸಿ ಮಾನವೀಯತೆ ತೋರಿದ್ದಾರೆ.

ಲಾಕ್‍ಡೌನ್‍ನಿಂದ ಅನ್ನಕ್ಕೂ ಪರದಾಡುವ ಸೂರಿಲ್ಲದವರ ಕುರಿತು ಖುದ್ದು ಪರಿಶೀಲಿಸಲು ಸೋಮವಾರ ಜಿಲ್ಲಾಧಿಕಾರಿ ವೈ.ಎಸ್.ಪಾಟೀಲ, ಸಿಇಓ ಗೋವಿಂದರೆಡ್ಡಿ, ಎಸ್ಪಿ ಅನುಪಮ್ ಅಗರವಾಲ್ ಅವರ ತಂಡ ನಗರ ಪ್ರದಕ್ಷಿಣೆ ನಡೆಸಿತ್ತು. ಈ ಹಂತದಲ್ಲಿ ಉಡುಪಿ ಜಿಲ್ಲೆಯ ಕಾರ್ಕಳ ತಾಲೂಕಿನ 13 ಹುಡುಗರ ತಂಡ ಕಣ್ಣಿಗೆ ಬಿದ್ದಿದೆ. ಕೂಡಲೇ ಅವರ ಸಮಸ್ಯೆ ಆಲಿಸಲು ಮುಂದಾದ ಈ ಅಧಿಕಾರಿಗಳ ತಂಡ, ಊಟ-ವಸತಿ ವ್ಯವಸ್ಥೆ ಇಲ್ಲದೇ ಪರದಾಡುತ್ತಿದ್ದ ವಿಷಯ ಬೆಳಕಿಗೆ ಬಂದಿದೆ.

ಕೂಡಲೇ ಈ ಯುವಕರಿಗೆ ಆರೋಗ್ಯ ತಪಾಸಣೆಗೆ ನಡೆಸಿ, ನಗರದ ಕಾಕಾ ಕಾರ್ಖಾನಿಸ್ ಕಲ್ಯಾಣ ಮಂಟಪದಲ್ಲಿ ವಸತಿ ಹಾಗೂ ಊಟ-ಉಪಹಾರ ಸಹಿತ ತಾತ್ಕಾಲಿಕ ಪುರ್ನಸತಿ ವ್ಯವಸ್ಥೆ ಕಲ್ಪಿಸುವಂತೆ ಅಧಿಕಾರಿಗಳಿಗೆ ಸೂಚಿಸಿದರು.

ಲಾಕ್‍ಡೌನ್ ಆದೇಶ ಜಾರಿಯಲ್ಲಿರುವ ಕಾರಣ ನಿರ್ಬಂಧ ಉಲ್ಲಂಘಿಸಿ ಬೇರೆ ಜಿಲ್ಲೆಗಳಿಗೆ ಪ್ರಯಾಣ ಬೆಳೆಸಬಾರದು. ಸಂಕಷ್ಟದಲ್ಲಿ ಇದ್ದರಿಗೆ ಜಿಲ್ಲಾಡಳಿತ ತಕ್ಷಣ ನೆರವಿಗೆ ಧಾವಿಸಲಿದೆ ಎಂದು ಎಸ್ಪಿ ಅಗರವಾಲ್ ಹೇಳಿದರು.

ಇದಲ್ಲದೇ ನಗರ ಪರಿವೀಕ್ಷಣೆ ಸಂದರ್ಭದಲ್ಲಿ ಅಲೇಮಾರಿ ಜನಾಂಗದ 100 ಕ್ಕೂ ಹೆಚ್ಚು ಅಲೇಮಾರಿಗಳು ಕಂಡು ಬಂದಿದ್ದು, ಅವರ ಸಮಸ್ಯೆ ಆಲಿಸಿದರು. ಆಲ್ಲದೇ ತಕ್ಷಣದಿಂದಲೇ ಆಹಾರ ಧಾನ್ಯ ಸೇರಿದಂತೆ ಅಗತ್ಯ ವಸ್ತುಗಳನ್ನು ತಲುಪಿಸುವ ಹಾಗೂ ಮೂಲಭೂತ ಸೌಲಭ್ಯ ಕಲ್ಪಿಸುವಂತೆ ಪಾಲಿಕೆ ಹಾಗೂ ಆಹಾರ ಇಲಾಖೆ ಅಧಿಕಾರಿಗಳಿಗೆ ಸೂಚಿಸಿದರು.