CRPF ಯೋಧ ಸೇರಿ ಮೂವರು KSRP ಸಿಬ್ಬಂದಿಗಳಿಗೆ ಕೋವಿಡ್ ಸೋಂಕು

ಬೀದರ್ : ಜಿಲ್ಲೆಯಲ್ಲಿ ಗುರುವಾರ ಸಿಆರ್.ಪಿಎಫ್ ಯೋಧ ಮತ್ತು ಮೂವರು ಕೆ ಎಸ್.ಆರ್.ಪಿ ಸಿಬ್ಬಂದಿಗಳಿಗೆ ಕೋವಿಡ್ ಸೋಂಕು ಒಕ್ಕರಿಸಿದೆ.

ಜಿಲ್ಲೆಯಲ್ಲಿ ಭದ್ರತಾ ಸಿಬ್ಬಂದಿಗಳಿಗೆ ಕೋವಿಡ್ ಸೋಂಕು ಪ್ರಕರಣಗಳು ಹೆಚ್ಚುತ್ತಿವೆ. ಒಬ್ಬರು ಎಎಸ್.ಐ, ಇಬ್ಬರು ಪೇದೆಗಳ ಬಳಿಕ ಈಗ ನೌಬಾದ ಕೆಎಸ್.ಆರ್.ಪಿಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಸಿಬ್ಬಂದಿಗಳಿಗೆ ಸೋಂಕು ತಗುಲಿರುವುದು ಸಿಬ್ಬಂದಿಗಳಲ್ಲಿ ಆತಂಕ ಹೆಚ್ಚುವಂತೆ ಮಾಡಿದೆ.

ದೆಹಲಿ ಸಿಆರ್.ಪಿಎಫ್ ನಲ್ಲಿ ಕರ್ತವ್ಯ ನಿರ್ವಹಿಸುವ ಬಸವಕಲ್ಯಾಣ ತಾಲೂಕಿನ ಕಲಖೋರಾ ಗ್ರಾಮದ 35 ವರ್ಷದ ಕಾನಸ್ಟೇಬಲ್ ಅವರಲ್ಲಿ ಸೋಂಕು ಪತ್ತೆಯಾಗಿದೆ‌. ಜೂ. 13ರಂದು ದೆಹಲಿಯಿಂದ ರೈಲು ಮೂಲಕ ಹೊರಟು 15ಕ್ಕೆ ಸ್ವಗ್ರಾಮ ತಲುಪಿದ್ದರು. ನಂತರ ಗ್ರಮಾದ ಶಾಲೆಯ ಕ್ವಾರಂಟೈನ್ ನಲ್ಲಿ ಉಳಿದಿದ್ದರು. ‌ಜೂ. 24 ರಂದು ಅವರ ಗಂಟಲು ಮಾದರಿ ಪರೀಕ್ಷೆ ನಡೆಸಿದ್ದು ಗುರುವಾರ ವರದಿಯಲ್ಲಿ ಪಾಸಿಟಿವ್ ಬಂದಿದೆ.

39 ವರ್ಷದ ಔರಾದ ತಾಲೂಕಿನ ನಾರಾಯಣಪುರ ಗ್ರಾಮದ ಪೇದೆ, 52 ವರ್ಷದ ಬೀದರ್ ತಾಲೂಕಿನ ಅಮಲಾಪುರ ಗ್ರಾಮ ಮತ್ತು 42 ವರ್ಷದ ಚಿದ್ರಿ ಗ್ರಾಮದ ಪೇದೆಯಲ್ಲಿ ಸೋಂಕು ಪತ್ತೆಯಾಗಿದೆ.