ಶಿವಲಿಂಗ-ಚೇಳು: ತರೂರ್‌ ವಿರುದ್ಧ ಮಾನಹಾನಿ ದೂರು ವಿಚಾರಣೆಗೆ

ಹೊಸದಿಲ್ಲಿ : ಪ್ರಧಾನಿ ನರೇಂದ್ರ ಮೋದಿ ಅವರು ‘ಶಿವಲಿಂಗದ ಮೇಲೆ ಕುಳಿತಿರುವ ಚೇಳು’ ಎಂಬ ವಿವಾದಾತ್ಮಕ ಹೇಳಿಕೆ ನೀಡಿದ್ದ ಕಾಂಗ್ರೆಸ್‌ ಹಿರಿಯ ನಾಯಕ ಶಶಿ ತರೂರ್‌ ಅವರ ವಿರುದ್ಧ ಸಲ್ಲಿಸಲ್ಪಟ್ಟಿರುವ ಕ್ರಿಮಿನಲ್‌ ಮಾನಹಾನಿ ದೂರನು ವಿಚಾರಣೆಗೆ ಎತ್ತಿಕೊಳ್ಳಲು ದಿಲ್ಲಿ ಕೋರ್ಟ್‌ ಸಮ್ಮತಿಸಿದೆ. 

ಅಂತೆಯೇ ಹೆಚ್ಚುವರಿ ಚೀಫ್ ಮೆಟ್ರೋಪಾಲಿಟನ್‌ ಮ್ಯಾಜಿಸ್ಟ್ರೇಟ್‌ ಸಮರ್‌ ವಿಶಾಲ್‌ ಅವರು ಈ ದೂರಿನ ವಿಚಾರಣೆಯನ್ನು ಡಿ.22ಕ್ಕೆ ನಿಗದಿಸಿದ್ದಾರೆ. ಅಂದು ದೂರುದಾರರ ಹೇಳಿಕೆಯನ್ನು ಕೋರ್ಟ್‌ ದಾಖಲಿಸಿಕೊಳ್ಳಲಿದೆ ಎಂದು ದಿಲ್ಲಿ ಬಿಜೆಪಿ ನಾಯಕ ಮತ್ತು ದೂರುದಾರ ರಾಜೀವ್‌ ಬಬ್ಬರ್‌ ಹೇಳಿದ್ದಾರೆ.

ತರೂರ್‌ ಅವರ ಹೇಳಿಕೆಯು ಹಿಂದೂ ದೇವತೆಯನ್ನು (ಶಿವನನ್ನು) ಅವಮಾನಿಸುವಂತಿದೆ ಮತ್ತು ಪ್ರಧಾನಿ ಮೋದಿ ವಿರುದ್ಧ ದುರುದ್ದೇಶ ಹೊಂದಿರುವಂತಿದೆ ಎಂದು ಬಬ್ಬರ್‌ ತಮ್ಮ ದೂರಿನಲ್ಲಿ ಹೇಳಿದ್ದಾರೆ.