ಪ್ರಜಾಪ್ರಭುತ್ವಕ್ಕೆ ಭ್ರಷ್ಟಾಚಾರ ಮಾರಕ

ಹುಬ್ಬಳ್ಳಿ: ಪ್ರಜಾಪ್ರಭುತ್ವ ಹಾಗೂ ನಾಗರಿಕರ ಸಮಾಜಕ್ಕೆ ಭ್ರಷ್ಟಾಚಾರ ಮಾರಕವಾಗಿದ್ದು, ಶೇ.95ರಷ್ಟು ಜನರು ಇದರ ಬಗ್ಗೆ ಮೌನತಾಳಿದ್ದಾರೆ. ಕೇರಳದಲ್ಲಿ ಲಂಚ ನೀಡುವ- ಪಡೆಯುವವರಿಬ್ಬರಿಗೂ ಶಿಕ್ಷೆಯನ್ನು ಕಟ್ಟುನಿಟ್ಟಾಗಿ ಅನುಷ್ಠಾನ ಕೈಗೊಂಡಿದ್ದು, ಅಲ್ಲಿ ಲಂಚ ಬಹುತೇಕವಾಗಿ ಇಲ್ಲವಾಗಿದೆ.

ಅಲ್ಲಿನ ಮಾದರಿ ದೇಶದೆಲ್ಲೆಡೆ ಜಾರಿಗೇಕೆ ಸಾಧ್ಯವಾಗದು ಎಂದು ಸುಪ್ರೀಂಕೋರ್ಟ್‌ ನ್ಯಾಯಮೂರ್ತಿ ಮೋಹನ ಎಂ.ಶಾಂತನಗೌಡರ ಪ್ರಶ್ನಿಸಿದರು. ಕರ್ನಾಟಕ ಕಾನೂನು ವಿಶ್ವವಿದ್ಯಾಲಯ, ಬೆಂಗಳೂರಿನ ಸಾಮಾಜಿಕ ನ್ಯಾಯಕ್ಕಾಗಿ ವಕೀಲರ ವೇದಿಕೆಯಿಂದ ಎಲ್‌.ಜಿ. ಹಾವನೂರು ಸ್ಮರಣಾರ್ಥ ಆಯೋಜಿಸಿದ್ದ ಭಾರತದಲ್ಲಿ ಮಾನವ ಹಕ್ಕುಗಳ ಬಲವರ್ಧನೆ ಕುರಿತ ಉಪನ್ಯಾಸ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.

ಭ್ರಷ್ಟಾಚಾರವೂ ಮಾನವ ಹಕ್ಕಿನ ಉಲ್ಲಂಘನೆಯಾಗಿದೆ. ಚುನಾವಣೆ ಭ್ರಷ್ಟಾಚಾರ ಮತದಾರರ ಧ್ವನಿಯನ್ನೇ ಕಿತ್ತುಕೊಳ್ಳುತ್ತಿದೆ. ಇಂತಹ ಸ್ಥಿತಿಯಲ್ಲಿ ಒಳ್ಳೆಯ ಜನರು ಸ್ಪರ್ಧಿಸುವುದಾದರೂ ಹೇಗೆ, ಸ್ಪರ್ಧಿಸಿದರೆ ಗೆಲ್ಲುವುದು ಅಸಾಧ್ಯದ ಸ್ಥಿತಿ ಎನ್ನುವಂತಿದೆ ಎಂದರು. 

ಸ್ವಾತಂತ್ರ್ಯ ಸಿಕ್ಕು 67 ವರ್ಷ ಕಳೆದರೂ ಇಂದಿಗೂ ದೇಶದಲ್ಲಿ ಅಸಮಾನತೆ, ಬಡತನ, ಸಮರ್ಪಕ ಮೂಲ ಸೌಕರ್ಯಗಳ ಲಭ್ಯತೆ ಇಲ್ಲವಾಗುತ್ತಿದೆ. ಮಾನವ ಅಭಿವೃದ್ಧಿ ಸೂಚ್ಯಾಂಕದಲ್ಲಿ ಭಾರತ ವಿಶ್ವದಲ್ಲಿ 130ನೇ ಸ್ಥಾನದಲ್ಲಿದೆ. ಸಂಪತ್ತು ಕೆಲವೇ ಕೆಲವು ಜನರ ಸ್ವತ್ತಾಗಿದೆ. ದೇಶದಲ್ಲಿ ಶೇ.1ರಷ್ಟು ಜನರು ಒಟ್ಟು ಸಂಪತ್ತಿನಲ್ಲಿ ಶೇ.58.4ರಷ್ಟು ಸಂಪತ್ತು ಹೊಂದಿದ್ದಾರೆ ಎಂದರು. 

ಎಲ್‌.ಜಿ. ಹಾವನೂರು ಅವರೊಂದಿಗೆ ತಮ್ಮ ಒಡನಾಟ ಸ್ಮರಿಸಿದ ನ್ಯಾಯಮೂರ್ತಿಯವರು, ಅವರೊಬ್ಬ ಸಾಮಾಜಿಕ ನ್ಯಾಯ ಪರ ಶಕ್ತಿಯಾಗಿದ್ದರಲ್ಲದೆ, ಮಾನವ ಹಕ್ಕುಗಳ ಸಂರಕ್ಷಣೆ, ಹಿಂದುಳಿದ ವರ್ಗಗಳಿಗೆ ಸೌಲಭ್ಯಗಳ ನಿಟ್ಟಿನಲ್ಲಿ ಮಹತ್ವದ  ಕೊಡುಗೆ ನೀಡಿದ್ದಾರೆ. ಅವರ ಪಾಂಡಿತ್ಯ, ಸಂವಿಧಾನ ಮೇಲಿನ ಪ್ರಭುತ್ವ ಗಮನಿಸಿಯೇ ದಕ್ಷಿಣ ಆμÅಕಾದ ಸಂವಿಧಾನ ರಚನೆಗೆ ಅವರನ್ನು ಆಹ್ವಾನಿಸಲಾಗಿತ್ತು ಎಂದರು. 

ಮಾಜಿ ಅಡ್ವೋಕೇಟ್‌ ಜನರಲ್‌ ಪ್ರೊ| ರವಿವರ್ಮ ಕುಮಾರ ಮಾತನಾಡಿ, ಎಲ್‌.ಜಿ. ಹಾವನೂರು ಅವರು ಮೌಲ್ಯಗಳೊಂದಿಗೆ ಬದುಕಿದವರು. ಮಾನವ ಹಕ್ಕುಗಳ ರಕ್ಷಣೆ ಎಂಬುದು ನಮ್ಮ ಕುಟುಂಬದಲಿಂದಲೇ ಆರಂಭವಾಗಬೇಕು. ಜಾತಿ ವ್ಯವಸ್ಥೆಯಲ್ಲಿ ಹೆಣ್ಣು ಮಕ್ಕಳಿಗೆ ಶಿಕ್ಷಣ ನಿಷೇಧವಿದೆ.

ಮಾನವ ಹಕ್ಕುಗಳು ಹಾಗೂ ಸ್ತ್ರೀ ಸಮಾನತೆ ಬಗ್ಗೆ ಬಸವಣ್ಣ ಕಣ್ಣು ತೆರೆಸುವ ಕಾರ್ಯ ಮಾಡಿದ್ದರು ಎಂದರು. ಹಾವನೂರು ಅವರ ಹಿಂದುಳಿದ  ವರ್ಗಗಳ ವರದಿ ಆಧಾರದಲ್ಲೇ ಮಂಡಲ ವರದಿ ರಚನೆಗೊಂಡಿತ್ತು. ನೆಲ್ಸನ್‌ ಮಂಡೇಲಾ ಅವರು ಸುದೀರ್ಘ‌ ಜೈಲುವಾಸದಿಂದ ಬಿಡುಗಡೆಗೊಂಡ ಅನಂತರ ಅಲ್ಲಿನ ರಾಷ್ಟ್ರೀಯ ಕಾಂಗ್ರೆಸ್‌ ಸಂವಿಧಾನ ರಚನೆ ವಿಚಾರದಲ್ಲಿ ವಿಶ್ವದಾದ್ಯಂತ ತಜ್ಞರಿಗಾಗಿ ತಡಕಾಡಿ ಕೊನೆಗೆ ಹಾವನೂರು ಅವರನ್ನು ಆಯ್ಕೆ ಮಾಡಿತ್ತು.

ದಕ್ಷಿಣ ಆμÅಕಾದ ಸಂವಿಧಾನ ರಚನೆಯಲ್ಲಿ ಕನ್ನಡಿಗೊಬ್ಬರ ಪ್ರಮುಖ ಪಾತ್ರ, ಮಾರ್ಗದರ್ಶನ ಇದೆ ಎಂಬುದು ನಮಗೆಲ್ಲರಿಗೂ ಹೆಮ್ಮೆಯ ಸಂಗತಿ ಎಂದರು. ದೇಶದಲ್ಲಿ ಮೂಲಭೂತ ವಾದ ಹೆಚ್ಚುತ್ತಿದೆ. ಗೋ ರಕ್ಷಣೆ ಹೆಸರಲ್ಲಿ ಮನುಷ್ಯರ ಹತ್ಯೆ ಹೆಚ್ಚುತ್ತಿದೆ.

ಇಂದು ನಾವು ಮಾನವ ಹಕ್ಕುಗಳನ್ನು ಸಂರಕ್ಷಿಸದಿದ್ದರೆ, ನಾಳೆ ನಮ್ಮ ರಕ್ಷಣೆಗಾಗಿ ಮಾನವ ಹಕ್ಕುಗಳು ಇರುವುದಿಲ್ಲ ಎಂಬ ಎಚ್ಚರಿಕೆ ಸತ್ಯವನ್ನು ಅರಿಯಬೇಕಾಗಿದೆ ಎಂದರು. ಕಾನೂನು ವಿವಿ ಪ್ರಭಾರ ಕುಲಪತಿ ಡಾ| ಸಿ.ಎಸ್‌. ಪಾಟೀಲ ಅಧ್ಯಕ್ಷತೆ ವಹಿಸಿದ್ದರು.  ಡಾ| ರತ್ನಾ ಭರಮಗೌಡರ ಸ್ವಾಗತಿಸಿದರು. ಡಾ| ಜಿ.ಬಿ. ಪಾಟೀಲ ವಂದಿಸಿದರು.