ಸ್ಟಾರ್‌ ನಟ, ನಟಿಯರ ಜನ್ಮದಿನದಂದು ಹೊಸ ಸಿನಿಮಾ, ರಿಲೀಸ್ ಡೇಟ್‌ ಇತ್ಯಾದಿಗಳು ಘೋಷಣೆಯಾಗುವುದು ಸಹಜ. ಇತ್ತೀಚೆಗೆ ನಟಿ ಪ್ರಿಯಾಂಕಾ ಉಪೇಂದ್ರ ತಮ್ಮ ಹುಟ್ಟುಹಬ್ಬವನ್ನು ತಮ್ಮ ಮುಂದಿನ ಚಿತ್ರ “ಲೈಫ್ ಈಸ್‌ ಬ್ಯುಟಿಫ‌ುಲ್‌’ ಚಿತ್ರತಂಡದವರೊಂದಿಗೆ ಆಚರಿಸಿಕೊಂಡರು. ನಟ ಉಪೇಂದ್ರ ಕೂಡ ಇದರಲ್ಲಿ ಭಾಗಿಯಾಗಿದ್ದು ವಿಶೇಷ.
“ಚಿತ್ರದ ತುಣುಕುಗಳನ್ನು ಚೆನ್ನಾಗಿ ಬಂದಿವೆ. “ದಿಯಾ’ ಸಿನಿಮಾದಲ್ಲಿ ಪೃಥ್ವಿ ಅಂಬರ್‌ ಅವರ ನಟನೆ ಅದ್ಭುತ. ಅವರಿಗೆ ಚಿತ್ರರಂಗದಲಿ ಸಾಕಷ್ಟು ಭವಿಷ್ಯವಿದೆ. ಪ್ರಿಯಾಂಕಾ ಕೂಡ ಅದ್ಭುತ ನಟಿ, ಅವರಿಂದ ನಾನು ಇನ್ನು ಸಾಕಷ್ಟು ಕಲಿಯುವುದಿದೆ’ ಎಂದರು ನಟ ಉಪೇಂದ್ರ.
ಚಿತ್ರದ ಬಗ್ಗೆ ಮಾತನಾಡಿದ ನಟಿ ಪ್ರಿಯಾಂಕಾ, “ಶೂಟಿಂಗ್‌ ಮೊದಲೇ ಸ್ಕ್ರಿಪ್ಟ್ ರೀಡಿಂಗ್‌, ವರ್ಕ್‌ಶಾಪ್‌ ಹೀಗೆ ಸಾಕಷ್ಟು ತಯಾರಿ ಮಾಡಿಸಿದ್ದಾರೆ. ಡಿಸೆಂಬರ್‌ 14 ನಮ್ಮ ಮದುವೆ ವಾರ್ಷಿಕೋತ್ಸವ, ಅದರ ಹಿಂದಿನ ದಿನ ಡಿಸೆಂಬರ್‌ 13ರಂದು ಸಿನಿಮಾ ತೆರೆ ಕಾಣುತ್ತಿರುವುದು ಖುಷಿ ವಿಚಾರ’ ಎಂದರು.
ನಟ ಪೃಥ್ವಿ ಅಂಬರ್‌, “ದಿಯಾ ಚಿತ್ರದ ನಂತರ ಬಂದ ಅವಕಾಶವಿದು. ಪ್ರಿಯಾಂಕಾ ಅವರು ನನ್ನ ಜತೆ ನಟಿಸುತ್ತಾರೆ ಎಂದು ತಿಳಿದಾಗ ಭಯ ಆಗಿತ್ತು. ಆದರೆ, ಮೊದಲನೇ ದಿನದಂದೇ ಅವರು ಭಯ ಇಲ್ಲದಂತೆ ಮಾಡಿದರು. ಉಪೇಂದ್ರ ಅವರು ನಮ್ಮ ಸಿನಿಮಾಗೆ ಶುಭ ಕೋರಲು ಬಂದಿರುವುದು ನನ್ನ ಭಾಗ್ಯ’ ಎಂದರು.
ಬಿ.ಜಿ. ಅರುಣ, ಕಿಶೋರ್‌ ನರಸಿಂಹಯ್ಯ, ಪುನೀತ್‌ ಎಚ್‌ ಹಾಗೂ ಜೊನಾತನ್‌ ಅಗಸ್ಟಿನ್‌ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಸಾಬು ಅಲೋಶಿಯಸ್‌ ಹಾಗೂ ಅರುಣಕುಮಾರ್‌ ಎಂ. ಜಂಟಿ ನಿರ್ದೇಶನ ಚಿತ್ರಕ್ಕಿದೆ. ಲಾಸ್ಯ ನಾಗರಾಜ್‌, ಸಿದ್ಲಿಂಗು ಶ್ರೀಧರ್‌, ಮಹಾಂತೇಶ್‌ ಮತ್ತಿತರರು ನಟಿಸಿದ್ದಾರೆ.
