ಉ.ಪ್ರ.ದ 7 ಸೀಟು ಬಿಟ್ಟುಕೊಟ್ಟಿರುವ ಕಾಂಗ್ರೆಸ್‌ಗೆ ಮಾಯಾವತಿ ಚಾಟಿ

ಲಕ್ನೋ : ‘ಉತ್ತರ ಪ್ರದೇಶದ 80 ಲೋಕಸಭಾ ಸ್ಥಾನಗಳ ಪೈಕಿ ಎಸ್‌ಪಿ-ಬಿಎಸ್‌ಪಿಗೆ ನಾವು ಏಳು ಸೀಟುಗಳನ್ನು ಬಿಟ್ಟುಕೊಟ್ಟಿದ್ದೇವೆ ಎಂದಿರುವ ಕಾಂಗ್ರೆಸ್‌ ಗೆ ಬಿಎಸ್‌ಪಿ ಮುಖ್ಯಸ್ಥೆ ಮಾಯಾವತಿ ಚಾಟಿ ಬೀಸಿದ್ದು  ಈ ರೀತಿಯ  ದಾರಿ ತಪ್ಪಿಸುವ ಹೇಳಿಕೆ ನೀಡಿ ಜನರಲ್ಲಿ ತಪ್ಪು ಅಭಿಪ್ರಾಯ ಉಂಟುಮಾಡ ಕೂಡದೆಂದು’ ಕಾಂಗ್ರೆಸ್‌ ಗೆ ಬಿಸಿ ಮುಟ್ಟಿಸಿದ್ದಾರೆ. 

‘ಉತ್ತರ ಪ್ರದೇಶದಲ್ಲಿ ಬಿಜೆಪಿಯನ್ನು ಸೋಲಿಸಲು ಎಸ್‌ಪಿ-ಬಿಎಸ್‌ಪಿ ಮೈತ್ರಿಕೂಟ ಸಮರ್ಥವಿದೆ; ಆದುದರಿಂದ ಕಾಂಗ್ರೆಸ್‌ ಯಾವುದೇ ಸೀಟನ್ನು ಬಿಟ್ಟುಕೊಡಬೇಕಾಗಿಲ್ಲ. ಬೇಕಿದ್ದರೆ ಕಾಂಗ್ರೆಸ್‌ ಉ.ಪ್ರ. ದ ಎಲ್ಲ 80 ಸ್ಥಾನಗಳಲ್ಲಿ ಸ್ಪರ್ಧಿಸಲು ಸ್ವತಂತ್ರವಿದೆ’ ಎಂದು ಮಾಯಾವತಿ ಹೇಳಿದ್ದಾರೆ. 

‘ಆದುದರಿಂದ ಎಸ್‌ಪಿ, ಬಿಎಸ್‌ಪಿ ಮತ್ತು ಆರ್‌ಎಲ್‌ಡಿ ಗೆ 7 ಸೀಟು ಬಿಟ್ಟುಕೊಟ್ಟಿದ್ದೇವೆ ಎಂದು ಹೇಳುವ ಮೂಲಕ ಕಾಂಗ್ರೆಸ್‌ ಜನರಲ್ಲಿ ತಪ್ಪು ಅಭಿಪ್ರಾಯವನ್ನು ಸೃಷ್ಟಿಸಬಾರದು; ಇಲ್ಲಿ ಉ.ಪ್ರ.ದಲ್ಲಿ ನಾವು ಎಸ್‌ಪಿ-ಬಿಎಸ್‌ಪಿ ಜತೆಗೂಡಿ ಮಾಡಿಕೊಂಡಿರುವ ಮೈತ್ರಿ ಕೂಟ ಬಿಜೆಪಿಯನ್ನು ಸೋಲಿಸಲು ಸಾಕಷ್ಟು ಬಲಿಷ್ಠವಿದೆ’ ಎಂದು ಮಾಯಾವತಿ ಗುಡುಗಿದರು.