ಕಾಂಗ್ರೆಸ್‌ಗೆ ಅಸ್ತಿತ್ವ ಕಳೆದುಕೊಳ್ಳುವ ಆತಂಕ

ಬೆಂಗಳೂರು: “ದೇಶಾದ್ಯಂತ ಅಸ್ತಿತ್ವ ಕಳೆದುಕೊಂಡಿರುವ ಕಾಂಗ್ರೆಸ್‌ ಕರ್ನಾಟಕದಲ್ಲಿ ಸಣ್ಣ ಹುಲ್ಲು ಕಡ್ಡಿ ಹಿಡಿದುಕೊಂಡು ಅಲುಗಾಡುತ್ತಿದೆ ಎಂದು ಕೇಂದ್ರ ಸಚಿವ ಡಿ.ವಿ.ಸದಾನಂದಗೌಡ ಲೇವಡಿ ಮಾಡಿದ್ದಾರೆ.

ಸುದ್ದಿಗಾರರ ಜತೆ ಮಾತನಾಡಿದ ಅವರು, ಕಾಂಗ್ರೆಸ್‌ನವರ ಹಾರಾಟ ಕರ್ನಾಟಕದಲ್ಲಿ ಇನ್ನಷ್ಟು ಜೋರಾಗಲಿ ಅಂತ ನಾವೂ ಕಾಯುತ್ತಿದ್ದೇವೆ.ಒಮ್ಮೆ ಪತನವಾದರೆ ಶತಮಾನಗಳ ಕಾಲ ಮೇಲೆ ಏಳುವುದಿಲ್ಲ ಎಂದು ಹೇಳಿದರು.

ಉತ್ತರ ಪ್ರದೇಶದಲ್ಲಿ 7 ಸ್ಥಾನ ಪಡೆದುಕೊಂಡ ಕಾಂಗ್ರೆಸ್‌ ನಮಗೇ ಬುದ್ಧಿ ಹೇಳಲು ಬರುತ್ತಿದೆ. ಒಮ್ಮೆ ದೇಶದ ಭೂಪಟವನ್ನು ನೋಡಿದರೆ ಕಾಂಗ್ರೆಸ್‌ ಎಲ್ಲೆಲ್ಲಿದೆ ಎಂಬುದನ್ನು ಹುಡುಕಬೇಕಿದೆ. ಮೈಕ್ರೋಸ್ಕೋಪ್‌ನಿಂದ ನೋಡಿದರೂ ಕಾಂಗ್ರೆಸ್‌ ಸಿಗಲ್ಲ. ಕಾಂಗ್ರೆಸ್‌ ಮುಕ್ತ ಆಗುವುದು ಖಚಿತ. ಕಾಂಗ್ರೆಸ್‌ ಮುಗಿಸುವುದು ನಾನೇ ಎಂದು ಈ ಹಿಂದೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರೇ ಬಹಳಷ್ಟು ಬಾರಿ ಹೇಳಿದ್ದರು. ಅವರೇ ಈಗ ಆ ಕೆಲಸ ಮುಗಿಸಿ ಹೋಗುತ್ತಾರೆ ಎಂದು ತಿಳಿಸಿದರು.
 
ಕಾಂಗ್ರೆಸ್‌ನಲ್ಲಿ ಆತಂಕ: ಕಾಂಗ್ರೆಸ್‌ನವರಿಗೆ ಎಲ್ಲವನ್ನು ಕಳೆದುಕೊಳ್ಳುತ್ತಿರುವ ಆತಂಕ ಶುರುವಾಗಿದೆ. ಹಾಗಾಗಿ ಎಲ್ಲೆಡೆ ವಿಫ‌ಲ ಯತ್ನ ನಡೆಸುತ್ತಿದ್ದಾರೆ.

ವಿಧಾನಪರಿಷತ್‌ ಸಭಾಪತಿ ಡಿ.ಎಚ್‌.ಶಂಕರಮೂರ್ತಿ ಅವರ ನಡವಳಿಕೆ ಬಗ್ಗೆ ಕಾಂಗ್ರೆಸಿಗರು ಸೇರಿ ಯಾರೂ ಮಾತನಾಡಲು ಸಾಧ್ಯವಿಲ್ಲ. ಸುಗಮವಾಗಿ ಕಲಾಪ ನಡೆಸುತ್ತಿದ್ದಾರೆ. ಆದರೆ, ಕೇವಲ ಅಧಿಕಾರಕ್ಕಾಗಿ ಅವರ ವಿರುದ್ಧ ಷಡ್ಯಂತ್ರ ನಡೆಸಲಾಗುತ್ತಿದೆ ಎಂದು ದೂರಿದರು.