Submarine: ಜಲಾಂತರ್ಗಾಮಿ ತಂತ್ರಜ್ಞಾನ ನೀಡಲು ಪೈಪೋಟಿ

ನವದೆಹಲಿ: ಭಾರತೀಯ ನೌಕಾಪಡೆಯ ಬಲ ಹೆಚ್ಚಿಸುವ ನಿಟ್ಟಿನಲ್ಲಿ ಭಾರತ ಸರ್ಕಾರ ನೂತನ ಜಲಾಂತರ್ಗಾಮಿಗಳ ಅಭಿವೃದ್ಧಿಗೆ ಮುಂದಾಗಿದ್ದು, ಅವುಗಳಿಗೆ ಅತ್ಯಾಧುನಿಕ ತಂತ್ರಜ್ಞಾನ ಸೇವೆ ಒದಗಿಸಲು ಜರ್ಮನಿ ಹಾಗೂ ಸ್ಪೇನ್‌ ಪೈಪೋಟಿಗೆ ಮುಂದಾಗಿವೆ. ಇಂಡೋ -ಪೆಸಿಫಿಕ್‌ನಲ್ಲಿ ಚೀನಾದ ಉದ್ಧಟತನಕ್ಕೆ ಕಡಿವಾಣ ಹಾಕಲು ಭಾರತ ಯೋಜಿಸಿರುವ ನಡುವೆಯೇ, ಈ ಬೆಳವಣಿಗೆ ವರದಿಯಾಗಿರುವುದು ಮಹತ್ವ ಪಡೆದುಕೊಂಡಿದೆ.

ದೇಶೀಯವಾಗಿಯೇ ನೌಕಾಬಲ ಹೆಚ್ಚಿಸಲು ಬಯಸಿರುವ ಭಾರತ ದೇಶಿಯ ಸಂಸ್ಥೆಗಳಲ್ಲೇ ಜಲಾಂತರ್ಗಾಮಿಗಳ ಉತ್ಪಾದನೆಗೆ ಮುಂದಾಗಿದೆ. ಈಗಾಗಲೇ ಹಲವು ಜಲಾಂತರ್ಗಾಮಿಗಳು ನೌಕಾಪಡೆಗೆ ಸೇರ್ಪಡೆಯೂಗೊಂಡಿವೆ. ಉಳಿದಂತೆ ಇನ್ನೂ 6 ಜಲಾಂತರ್ಗಾಮಿಗಳ ಅಭಿವೃದ್ಧಿ ಬಾಕಿ ಇದ್ದು, ಅವುಗಳಿಗೆ ತಂತ್ರಜ್ಞಾನ ಸೇರಿದಂತೆ ಇತರೆ ಅಗತ್ಯ ಉಪಕರಣ ಒದಗಿಸುವ ಸಂಸ್ಥೆಗಳಿಗಾಗಿ 400 ಶತಕೋಟಿ ರೂ.ಗಳ ಬಿಡ್ಡಿಂಗ್‌ ಕರೆಯಲಾಗಿದೆ. ಅದರಲ್ಲಿ ಜರ್ಮನಿ ಹಾಗೂ ಸ್ಪೇನ್‌ ಸಂಸ್ಥೆಗಳು ಪ್ರಮುಖ ಪೈಪೋಟಿಯಲ್ಲಿವೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.