ಮೊಮಿನುಲ್‌ ಶತಕ; ಬಾಂಗ್ಲಾ ಚೇತರಿಕೆ

ಚಿತ್ತಗಾಂಗ್‌: ವನ್‌ಡೌನ್‌ ಬ್ಯಾಟ್ಸ್‌ಮನ್‌ ಮೊಮಿನುಲ್‌ ಹಕ್‌ ಅವರ ಆಕರ್ಷಕ ಶತಕದ ನೆರವು ಪಡೆದ ಬಾಂಗ್ಲಾದೇಶ, ಪ್ರವಾಸಿ ವೆಸ್ಟ್‌ ಇಂಡೀಸ್‌ ಎದುರಿನ ಚಿತ್ತಗಾಂಗ್‌ ಟೆಸ್ಟ್‌ ಪಂದ್ಯದ ಮೊದಲ ದಿನ 8 ವಿಕೆಟಿಗೆ 315 ರನ್‌ ಗಳಿಸಿದೆ. 

ಇದರಲ್ಲಿ ಮೊಮಿನುಲ್‌ ಪಾಲು 120 ರನ್‌.ಆರಂಭಕಾರ ಸೌಮ್ಯ ಸರ್ಕಾರ್‌ ಅವರನ್ನು 3ನೇ ಎಸೆತದಲ್ಲೇ ಶೂನ್ಯಕ್ಕೆ ಕಳೆದುಕೊಂಡು ಆಘಾತಕ್ಕೊಳಗಾದ ಬಾಂಗ್ಲಾವನ್ನು ಮೊಮಿನುಲ್‌ ಹಕ್‌, ಇಮ್ರುಲ್‌ ಕಯೇಸ್‌, ನಾಯಕ ಶಕಿಬ್‌ ಸೇರಿಕೊಂಡು ಮೇಲೆತ್ತಿದರು. ಸ್ಕೋರ್‌ 3ಕ್ಕೆ 222ರ ತನಕ ಬೆಳೆಯಿತು. ಈ ಹಂತದಲ್ಲಿ ಮೇಲುಗೈ ಸಾಧಿಸಿದ ವಿಂಡೀಸ್‌ ಬೌಲರ್‌ಗಳು 13 ರನ್‌ ಅಂತರದಲ್ಲಿ 4 ವಿಕೆಟ್‌ ಉಡಾಯಿಸಿದರು. ಇದರಲ್ಲಿ ಮೊಮಿನುಲ್‌, ರಹೀಂ (4), ಮಹಮದುಲ್ಲ (3), ಶಕಿಬ್‌ (34) ವಿಕೆಟ್‌ಗಳು ಸೇರಿದ್ದವು. ಶಾನನ್‌ ಗ್ಯಾಬ್ರಿಯಲ್‌ 4 ವಿಕೆಟ್‌ ಕಿತ್ತು ಆತಿಥೇಯರಿಗೆ ಕಡಿವಾಣ ಹಾಕಿದರು.

ಎಡಗೈ ಆಟಗಾರ ಮೊಮಿನುಲ್‌ 167 ಎಸೆತಗಳಿಗೆ ಜವಾಬಿತ್ತು 120 ರನ್‌ ಹೊಡೆದರು. ಇದು 32ನೇ ಟೆಸ್ಟ್‌ನಲ್ಲಿ ಹಕ್‌ ಬಾರಿಸಿದ 8ನೇ ಶತಕ. 10 ಬೌಂಡರಿ, ಒಂದು ಸಿಕ್ಸರ್‌ ಇದರಲ್ಲಿ ಸೇರಿತ್ತು. ಕೆಳ ಕ್ರಮಾಂಕದಲ್ಲಿ ಮಿರಾಜ್‌ (22), ನಯೀಮ್‌ ಹಸನ್‌ (ಬ್ಯಾಟಿಂಗ್‌ 24), ತೈಜುಲ್‌ ಇಸ್ಲಾಮ್‌ (ಬ್ಯಾಟಿಂಗ್‌ 32) ವಿಂಡೀಸ್‌ ದಾಳಿಯನ್ನು ತಡೆದು ನಿಂತರು.