ಧಾರಾಕಾರ ಮಳೆಗೆ ಅಪಾರ ಹಾನಿ

ಚಿತ್ರದುರ್ಗ: ಕಳೆದ ಎರಡು ದಿನಗಳಿಂದ ಜಿಲ್ಲೆಯಲ್ಲಿ ಅಶ್ವಿ‌ನಿ ಮಳೆಯಾಗುತ್ತಿದ್ದು, ಬಿರುಗಾಳಿ ಸಹಿತ ಸುರಿಯುತ್ತಿರುವ ಮಳೆಗೆ ತೋಟಗಳು, ಮನೆಗಳು ಜಖಂಗೊಂಡಿವೆ. ಬುಧವಾರ ಮಧ್ಯಾಹ್ನದಿಂದ ಆರಂಭವಾದ ಮಳೆಗೆ ಹಲವೆಡೆ ಅಡಕೆ, ತೆಂಗಿನ ಮರಗಳು ಧರೆಗುರುಳಿವೆ.

ಮನೆಗಳ ಮೇಲ್ಛಾವಣಿಯ ತಗಡು, ಸಿಮೆಂಟ್‌ ಶೀಟುಗಳು ಹಾರಿ ಹೋಗಿದೆ. ಹೊಸದುರ್ಗ ತಾಲೂಕು ನಾಕೀಕೆರೆಯಲ್ಲಿ ಸುರಿದ ಭಾರೀ ಗಾಳಿ ಹಾಗೂ ಆಲಿಕಲ್ಲು ಮಳೆಗೆ ಹಲವು ಮನೆಗಳು ಜಖಂ ಆಗಿವೆ. ರಾಮಣ್ಣ ಎಂಬುವವರ ಶೌಚಗೃಹದ ಮೇಲೆ ಮರ ಬಿದ್ದಿದ್ದರೆ, ನಾಗರಾಜ್‌ ಎಂಬುವವರ ಮನೆಯ ಶೀಟುಗಳು ಹಾರಿ ಹೋಗಿ ವಿದ್ಯುತ್‌ ಲೈನ್‌ ತುಂಡರಿಸಿ ಕೆಳಗೆ ಬಿದ್ದಿದೆ.

ಗ್ರಾಮದ ರೈತರಾದ ಕುಮಾರ್‌, ಸಂತೋಷ್‌, ಚಿದಾನಂದ, ಧರಣೇಂದ್ರಪ್ಪ ಸೇರಿದಂತೆ ಹಲವು ರೈತರ ಜಮೀನಿನಲ್ಲಿ ಸುಮಾರು ನೂರು ಅಡಕೆ, ಬಾಳೆ ಮರಗಳು ಧರೆಗುರುಳಿವೆ. ವಿದ್ಯುತ್‌ ಲೈನ್‌ ತುಂಡಾಗಿದ್ದರಿಂದ ಬುಧವಾರ ರಾತ್ರಿಯಿಡಿ ಕತ್ತಲೆಯಲ್ಲಿ ಕಾಲ ಕಳೆಯುವಂತಾಯಿತು. ಜಖಂ ಆಗಿರುವ ಮನೆ ಹಾಗೂ ಬಿದ್ದಿರುವ ಅಡಕೆ, ತೆಂಗು ಹಾಗೂ ಬಾಳೆಗೆ ಸೂಕ್ತ ಪರಿಹಾರ ನೀಡಬೇಕು ಎಂದು ರೈತರು ಒತ್ತಾಯಿಸಿದ್ದಾರೆ.