ಪಾಕ್‌ಗೆ ಚೀನದ ಡ್ರೋಣ್‌

ಬೀಜಿಂಗ್‌: ತನ್ನ ಸಾರ್ವಕಾಲಿಕ ಮಿತ್ರನಾಗಿರುವ ಪಾಕಿಸ್ಥಾನಕ್ಕೆ ಚೀನ, 48 ಅತ್ಯಾಧುನಿಕ ಮಿಲಿಟರಿ ಡ್ರೋಣ್‌ಗಳನ್ನು ಮಾರಾಟ ಮಾಡುತ್ತಿರುವುದಾಗಿ ಘೋಷಿಸಿದೆ. ಕಳೆದ ವಾರವಷ್ಟೇ, ಭಾರತ ಮತ್ತು ರಷ್ಯಾ ನಡುವೆ ಎಸ್‌-400 ಯುದ್ಧ ವಿಮಾನಗಳ ಖರೀದಿ ಒಪ್ಪಂದ ಏರ್ಪಟ್ಟ ಬೆನ್ನಲ್ಲೇ ಚೀನದಿಂದ ಈ ಘೋಷಣೆ ಹೊರಬಿದ್ದಿರುವುದು ಗಮನಾರ್ಹ. ವಿಂಗ್‌ ವಾಂಗ್‌ 2 ಎಂಬ ಹೆಸರಿನ ಈ ಮಿಲಿಟರಿ ಡ್ರೋಣ್‌ಗಳು, ಮಾನವ ರಹಿತ ವಾಯು ಸಂಚಾರ ವಾಹನಗಳಾಗಿದ್ದು (ಯುಎವಿ) ಇವು ಅಮೆರಿಕದ ಎಂ.ಕ್ಯು.-9 ರೀಪರ್‌ ಡ್ರೋಣ್‌ಗಳಿಗೆ ಸರಿಸಮಾನ ಎಂದೇ ಪರಿಗಣಿಸಲ್ಪಟ್ಟಿವೆ. ಚೆಂಗ್ಡು ಏರ್‌ಕ್ರಾಫ್ಟ್ ಇಂಡಸ್ಟ್ರಿಯಲ್‌ ಗ್ರೂಪ್‌ ಎಂಬ ಕಂಪೆನಿ ವಿಂಗ್‌ ವಾಂಗ್‌ 2 ತಯಾರಕ. ಈ ಡ್ರೋಣ್‌ಗಳು, ನಿಗದಿತ ಗುರಿಯನ್ನು ಬೆನ್ನಟ್ಟಿ ಧ್ವಂಸಗೊಳಿಸುವ, ಏಕಕಾಲದಲ್ಲಿ ಹಲವು ಕೆಲಸ ಮಾಡುವ, ಆಗಸದಿಂದ ಭೂಮಂಡಲದ ಯಾವುದೇ ಭಾಗದ ಮೇಲೆ ದಾಳಿ ನಡೆಸುವ ಛಾತಿ ಹೊಂದಿವೆ.