ಹೊಸದಿಲ್ಲಿ: ಮೂರನೇ ಚಂದ್ರಯಾನಕ್ಕೆ ಭಾರತ ಸಜ್ಜಾಗಿದೆ. ಇದೇ ಆಗಸ್ಟ್‌ನಲ್ಲಿ ಚಂದ್ರಯಾನ-3 ಉಡಾವಣೆ ಮಾಡುವುದಾಗಿ ಭಾರತೀಯ ಬಾಹ್ಯಾಕಾಶ ಸಂಶೋಧನ ಕೇಂದ್ರ (ಇಸ್ರೋ) ಘೋಷಿಸಿದೆ.
ಚಂದ್ರಯಾನ ವಿಳಂಬ ಕುರಿತು ಲೋಕಸಭೆಯಲ್ಲಿ ಕೇಳಲಾದ ಪ್ರಶ್ನೆಗಳಿಗೆ ಉತ್ತರಿಸುವ ವೇಳೆ ಬಾಹ್ಯಾಕಾಶ ಇಲಾಖೆಯು ಚಂದ್ರಯಾನ-3ರ ದಿನಾಂಕವನ್ನು ಬಹಿರಂಗಪಡಿಸಿದೆ.
ಇಸ್ರೋದ ಮಹತ್ವಾಕಾಂಕ್ಷೆಯ ಚಂದ್ರಯಾನ-2ರ ವಿಕ್ರಮ್‌ ಲ್ಯಾಂಡರ್‌ ಕೊನೆಯ ಕ್ಷಣದ ಸಾಫ್ಟ್ ಲ್ಯಾಂಡಿಂಗ್‌ ವೇಳೆ ವಿಫ‌ಲವಾಗಿತ್ತು. ಇದಾದ ಎರಡು ವರ್ಷಗಳ ಬಳಿಕ ಈಗ ಈ ಯೋಜನೆಯಲ್ಲಿ ಕಲಿತ ಪಾಠಗಳು ಮತ್ತು ಜಾಗತಿಕ ತಜ್ಞರ ಸಲಹೆಗಳನ್ನು ಆಧರಿಸಿ ಚಂದ್ರಯಾನ-3ರ ಕೆಲಸ ಆರಂಭಿಸಲಾಗಿದೆ. ಅಗತ್ಯ ಪರೀಕ್ಷೆಗಳೆಲ್ಲ ಪೂರ್ಣಗೊಂಡಿದ್ದು, ಆಗಸ್ಟ್‌ನಲ್ಲಿ ಉಡಾವಣೆ ಮಾಡಲಾಗುವುದು ಎಂದು ಇಲಾಖೆ ಮಾಹಿತಿ ನೀಡಿದೆ.
ಇಸ್ರೋದಿಂದ 19 ಯೋಜನೆಗಳು:
ಕೊರೊನಾದಿಂದಾಗಿ ಹಲವು ಯೋಜನೆಗಳಿಗೆ ಅಡ್ಡಿ ಉಂಟಾಯಿತು. ಚಂದ್ರಯಾನ-3 ಕೂಡ ವಿಳಂಬವಾಯಿತು ಎಂದು ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಡಾ| ಜಿತೇಂದ್ರ ಸಿಂಗ್‌ ಹೇಳಿದ್ದಾರೆ. ಪ್ರಸಕ್ತ ವರ್ಷ 19 ಉಡಾವಣೆಗಳನ್ನು ನಡೆಸಲು ಬಾಹ್ಯಾಕಾಶ ಇಲಾಖೆ ಚಿಂತನೆ ನಡೆಸಿದೆ. ಇಸ್ರೋ 8 ಉಡಾವಣ ವಾಹನಗಳು, 7 ಬಾಹ್ಯಾಕಾಶ ನೌಕೆಗಳು, 4 ತಂತ್ರಜ್ಞಾನ ಪ್ರದರ್ಶಕ ಮಿಷನ್‌ಗಳನ್ನು ಪೂರ್ಣಗೊಳಿಸಲು ನಿರ್ಧರಿಸಿದೆ. 2022ರ ಮೊದಲ ಉಡಾವಣೆಯು ದ್ವಿತೀಯ ವಾರದಲ್ಲೇ ನಡೆಯಲಿದೆ. ಆಗ ಭೂಪರಿವೀಕ್ಷಣ ಉಪಗ್ರಹ ರಿಸ್ಯಾಟ್‌-1ಎ ಉಡಾವಣೆಯಾಗಲಿದೆ ಎಂದು ಸಿಂಗ್‌ ಮಾಹಿತಿ ನೀಡಿದ್ದಾರೆ.
