Central Government: ಭದ್ರತಾ ಉದ್ಯಮದ ಪ್ರಧಾನ ಸಂಸ್ಥೆ ಎಚ್‌ಎಎಲ್‌ಗೆ “ಮಹಾರತ್ನ’

ನವದೆಹಲಿ: ಭದ್ರತಾ ಉದ್ಯಮದಲ್ಲಿ ಪ್ರಧಾನ ಸಂಸ್ಥೆಯಾಗಿರುವ, ಸರ್ಕಾರಿ ಸ್ವಾಮ್ಯದ ಹಿಂದೂಸ್ತಾನ್‌ ಏರೋನಾಟಿಕ್ಸ್‌ ಲಿಮಿಟೆಡ್‌ (ಎಚ್‌ಎಎಲ್‌)ನ್ನು ಕೇಂದ್ರ ಸರ್ಕಾರ “ಮಹಾರತ್ನ’ ಕಂಪನಿಗಳ ಪಟ್ಟಿಗೆ ಸೇರ್ಪಡೆ ಮಾಡಿದೆ. ಈ ಮೂಲಕ ಮಹಾರತ್ನ ಕಂಪನಿಗಳ ಸಂಖ್ಯೆ 14ಕ್ಕೆ ಏರಿಕೆಯಾಗಿದೆ.

ಈ ಮೊದಲು ಎಚ್‌ಎಎಲ್‌ ನವರತ್ನ ವಿಭಾಗದಲ್ಲಿ ಸ್ಥಾನ ಪಡೆದುಕೊಂಡಿತ್ತು. ಇದೀಗ ಮಹಾರತ್ನಕ್ಕೆ ಭಡ್ತಿ ಪಡೆದುಕೊಂಡಿರುವುದರಿಂದ ನವರತ್ನ ಕಂಪನಿಗಳ ಸಂಖ್ಯೆ 24ಕ್ಕೆ ಕುಸಿದಿದೆ. ಮಹಾರತ್ನ ಕಂಪನಿ ಆಗಿರುವುದರಿಂದ ಎಚ್‌ಎಎಲ್‌ ಈಗ ಅಂತಾರಾಷ್ಟ್ರೀಯ ಉದ್ಯಮಗಳಲ್ಲಿ 5,000 ಕೋಟಿ ರೂ.ವರೆಗೆ ಹೂಡಿಕೆ ಮಾಡಲು ಅವಕಾಶ ಪಡೆದುಕೊಂಡಿದೆ. ಅಲ್ಲದೇ ತನ್ನ ನಿವ್ವಳ ಮೌಲ್ಯದಲ್ಲಿ ಶೇ.15ರಷ್ಟನ್ನು ಕೇಂದ್ರ ಸರ್ಕಾರದ ಅನುಮತಿ ಇಲ್ಲದೇ, ಹೂಡಿಕೆ ಮಾಡುವ ಅವಕಾಶ ಪಡೆದುಕೊಂಡಿದೆ.

ಮಾನದಂಡವೇನು?:
ಮಹಾರತ್ನ ಎಂದು ಗುರುತಿಸಿಕೊಳ್ಳಲು ಕಂಪನಿಗಳ ಸರಾಸರಿ ವಾರ್ಷಿಕ ವಹಿವಾಟು 25,000 ಕೋಟಿ ರೂ. ಇದ್ದು, ನಿವ್ವಳ ಮೌಲ್ಯ 15,000 ಕೋಟಿ ರೂ.ಗಿಂತ ಹೆಚ್ಚಿರಬೇಕು. ಇದನ್ನು ಸಾಧಿ ಸಿದ ಕಂಪನಿಗಳನ್ನು ಮಹಾರತ್ನ ಎಂದು ಗುರುತಿಸಲಾಗುತ್ತದೆ.