Rajyotsava Award 2023 ಶತಾಯುಷಿ ಹುಸೇನಾಬಿ ಸಿದ್ದಿಗೆ ರಾಜ್ಯೋತ್ಸವದ ಗರಿ‌

ಕಾರವಾರ: ಉತ್ತರ ಕನ್ನಡ ಜಿಲ್ಲೆಯ ಹಳಿಯಾಳ ತಾಲ್ಲೂಕಿನ ಸಾಂಬ್ರಾಣಿ ಗ್ರಾಮದ ಹುಸೇನಾಬಿಗೆ ಜಾನಪದ ಕ್ಷೇತ್ರಕ್ಕೆ ಸಲ್ಲಿಸಿದ ಸೇವೆಗಾಗಿ ರಾಜ್ಯೋತ್ಸವ ಪ್ರಶಸ್ತಿ ದೊರೆತಿದೆ.

ಹುಸೇನಾಬಿ ಬುಡೇನಸಾಬ್ ಸಿದ್ದಿ ಅವರಿಗೆ ಈಗ 103 ವರ್ಷಗಳಾಗಿವೆ. ಅತ್ಯಂತ ಕ್ರಿಯಾಶೀಲವಾಗಿರುವ ಈ ಕಲಾವಿದೆಗೆ ತಡವಾಗಿಯಾದರೂ ರಾಜ್ಯೋತ್ಸವ ಪ್ರಶಸ್ತಿ ಹುಡುಕಿ ಬಂದಿದೆ. ಇವರ ಶ್ರಮಕ್ಕೆ ಪ್ರತಿಫಲ ದಕ್ಕಿದೆ. ಸಿದ್ದಿ ಮುಸ್ಲಿಂ ಮದುವೆಗಳಲ್ಲಿ ಹಾಡುವ ಸಿದ್ದಿ ಜಾನಪದ ಹಾಡು ಸಿದ್ದನಾಸ ಹಾಡುವಲ್ಲಿ ಈ ಕಲಾವಿದೆ ಅಜ್ಜಿ ಹೆಸರು ಮಾಡಿದ್ದರು.

ನೂರಾರು ಮದುವೆಗಳಲ್ಲಿ, ಸಭೆ ಸಮಾರಂಭಗಳಲ್ಲಿ ಸಿದ್ದಿನಾಸ ಹಾಡಿದ್ದಾರೆ‌. ಸಿದ್ದಿಗಳ ಜಾನಪದ ಕಲೆಯನ್ನು ಉಳಿಸಿದ ಕೀರ್ತಿ ಅವರದ್ದು. ಹಾಗೆ ಸಿದ್ದಿಗಳ ಪ್ರಸಿದ್ಧ , ಜನಪ್ರಿಯ ಡಾಮಾಮಿ ಜಾನಪದ ನೃತ್ಯ ಸಹ ಇವರು ಯೌವ್ವನದ ಕಾಲದಲ್ಲಿ ಮಾಡಿದವರು. ಆ ಕಲೆಯು ತನ್ನ ನಂತರ ಉಳಿಯಬೇಕೆಂದು ಮಕ್ಕಳಿಗೆ ಡಮಾಮಿ ನೃತ್ಯ ಕಲಿಸುವ ಕಾಯಕವನ್ನು ನಿರಂತರ ಮಾಡಿದವರು. ಇದನ್ನು ಗುರುತಿಸಿ ರಾಜ್ಯ ಸರಕಾರ ಹುಸೇನಾಬಿ ಬುಡೇನ್ ಸಾಬ್ ಸಿದ್ದಿಗೆ ರಾಜ್ಯೋತ್ಸವ ಘೋಷಿಸಿದೆ. ಅವರು ಈ ಪ್ರಶಸ್ತಿ ಬಂದಿರುವುದಕ್ಕೆ ಉದಯವಾಣಿ ಜೊತೆ ಮಾತನಾಡಿ, ” ಅನೇಕ ಸಂಘ ಸಂಸ್ಥೆಗಳು ನನಗೆ ಗೌರವಿಸಿ ಸನ್ಮಾನಿಸಿವೆ. ಆದರೆ ರಾಜ್ಯದ ಸಿದ್ದರಾಮಯ್ಯ ಸರ್ಕಾರ ನನ್ನ ಗುರುತಿಸಿ, ಈ ಇಳಿವಯಸ್ಸಿನಲ್ಲಿ ರಾಜ್ಯೋತ್ಸವ ಪ್ರಶಸ್ತಿ ಕೊಟ್ಟಿದೆ. ಇದು ನನಗೆ ಭಾರೀ ಸಂತೋಷ ತಂದಿದೆ ” ಎಂದರು.

ಸಿದ್ದಿ ಸಮುದಾಯ ಮತ್ತು ಜಿಲ್ಲೆಯ ಕಲಾವಿದರಲ್ಲಿ ಹುಸೇನಾಬಿ ಅವರಿಗೆ ಸಂದ ಪ್ರಶಸ್ತಿಗೆ ಅಭಿನಂದನೆಗಳ ಸುರಿಮಳೆಯಾಗಿದೆ. ಹಳ್ಳಿಯ ಮೂಲೆಯಲ್ಲಿದ್ದು, ಪ್ರಶಸ್ತಿಗೆ ಲಾಬಿ ಮಾಡದ ವಯೋವೃದ್ಧರನ್ನು ಸರ್ಕಾರ ಗುರುತಿಸಿದೆ ಎಂಬ ಮಾತು ಕೇಳಿಬಂದಿದೆ.