RBI: ಶುಶ್ರುತಿ ಸಹಕಾರ ಬ್ಯಾಂಕ್‌ ಪರವಾನಗಿ ರದ್ದು

ನವದೆಹಲಿ: ಬೆಂಗಳೂರಿನ ಶುಶ್ರುತಿ ಸೌಹಾರ್ದ ಸಹಕಾರ ಬ್ಯಾಂಕ್‌ ನಿಯಮಿತ ಮತ್ತು ಮಹಾರಾಷ್ಟ್ರದ ಬುಲ್ದಾನದ ಮಲ್ಕಾಪುರ್‌ ಅರ್ಬನ್‌ ಕೋ-ಆಪರೇಟಿವ್‌ ಬ್ಯಾಂಕ್‌ ಲಿ.ನ ಬ್ಯಾಂಕಿಂಗ್‌ ಪರವಾನಗಿಯನ್ನು ಭಾರತೀಯ ರಿಸರ್ವ್‌ ಬ್ಯಾಂಕ್‌(ಆರ್‌ಬಿಐ) ರದ್ದುಪಡಿಸಿದೆ.

2023ರ ಜು.5ರಿಂದ ಎಲ್ಲಾ ರೀತಿಯ ಬ್ಯಾಂಕಿಂಗ್‌ ವ್ಯವಹಾರಗಳನ್ನು ನಿಲ್ಲಿಸುವಂತೆ ಈ ಎರಡು ಬ್ಯಾಂಕುಗಳಿಗೆ ಆರ್‌ಬಿಐ ಸೂಚಿಸಿದೆ.

ಈ ಎರಡು ಬ್ಯಾಂಕುಗಳು ಸಾಕಷ್ಟು ಬಂಡವಾಳ ಮತ್ತು ಗಳಿಕೆಯ ನಿರೀಕ್ಷೆ ಹೊಂದಿಲ್ಲ ಮತ್ತು ಬ್ಯಾಂಕಿಂಗ್‌ ನಿಯಂತ್ರಣ ಕಾಯಿದೆಯ ಅವಶ್ಯಕತೆಗಳನ್ನು ಪೂರೈಸಲು ವಿಫ‌ಲವಾಗಿವೆ. ಈ ಬ್ಯಾಂಕುಗಳ ಸದ್ಯದ ಆರ್ಥಿಕ ಪರಿಸ್ಥಿತಿ ನೋಡಿದರೆ ಠೇವಣಿದಾರರಿಗೆ ಪೂರ್ಣ ಹಣ ಹಿಂತಿರುಗಿಸುವುದು ಕಷ್ಟವಿದೆ. ಹಾಗಾಗಿ ಸಾರ್ವಜನಿಕರ ಹಿತದೃಷ್ಟಿಯಿಂದ ಈ ಎರಡೂ ಬ್ಯಾಂಕ್‌ಗಳ ವ್ಯವಹಾರವನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಆರ್‌ಬಿಐ ತಿಳಿಸಿದೆ.

ಡೆಪಾಸಿಟ್‌ ಇನ್ಶೂರೆನ್ಸ್‌ ಆ್ಯಂಡ್‌ ಕ್ರೆಡಿಟ್‌ ಗ್ಯಾರೆಂಟಿ ಕಾರ್ಪೊರೇಷನ್‌(ಡಿಐಸಿಜಿಸಿ) ವತಿಯಿಂದ ಠೇವಣಿದಾರರಿಗೆ ಗರಿಷ್ಠ 5 ಲಕ್ಷ ರೂ. ವರೆಗೆ ವಿಮಾ ಹಕ್ಕಿನ ಮೊತ್ತ ಸಿಗಲಿದೆ ಎಂದೂ ಆರ್‌ಬಿಐ ತಿಳಿಸಿದೆ.