ಕೆನರಾ ಬ್ಯಾಂಕ್‌: 2973 ಕೋಟಿ ರೂ.ನಿವ್ವಳ ಲಾಭ

ಬೆಂಗಳೂರು: ಕೆನರಾ ಬ್ಯಾಂಕ್‌ ವಿತ್ತ ವರ್ಷ 2017ರ ನಾಲ್ಕನೇ ತ್ತೈಮಾಸಿಕ ಅವಧಿಯಲ್ಲಿ 2973 ಕೋಟಿ ರೂ.ನಿವ್ವಳ ಲಾಭ ಗಳಿಸಿ, ಶೇ.80.51ರಷ್ಟು ಪ್ರಗತಿ ದಾಖಲಿಸಿದೆ. ಬ್ಯಾಂಕಿನ ಒಟ್ಟು ಆದಾಯ 12,889 ಕೋಟಿ ರೂ. ಆಗಿದ್ದು, ಕಳೆದ ವರ್ಷದ 3905 ಕೋಟಿ ರೂ.ನಿವ್ವಳ ನಷ್ಟಕ್ಕೆ ಹೋಲಿಸಿದಾಗ, ಈ ಬಾರಿಯ ವಿತ್ತ ವರ್ಷದಲ್ಲಿ ಬ್ಯಾಂಕ್‌ 214 ಕೋಟಿ ರೂ. ನಿವ್ವಳ ಲಾಭ ಗಳಿಸಿದೆ.

ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಕೆನರಾ ಬ್ಯಾಂಕಿನ  ನಿರ್ವಹಕ ನಿರ್ದೇಶಕ ರಾಕೇಶ್‌ ಶರ್ಮ,  ಬ್ಯಾಂಕ್‌ನ ಬಡ್ಡಿಯೇತರ ಆದಾಯ 2396 ಕೋಟಿ ರೂ. ಇದ್ದು, ವರ್ಷದಿಂದ ವರ್ಷಕ್ಕೆ ಶೇ.73.24ರಷ್ಟು ಪ್ರಗತಿ ಸಾಧಿಸಿದೆ. ನಿವ್ವಳ ಬಡ್ಡಿ ಆದಾಯ, ಶೇ.14.08 ಅಭಿವೃದ್ಧಿಯಾಗಿದ್ದು, 2708 ಕೋಟಿ ರೂ.ತಲುಪಿದೆ. ಕಾರ್ಯಾಚರಣೆ ವೆಚ್ಚ 2123 ಕೋಟಿ ರೂ. ಆಗಿದ್ದು, ಕಾರ್ಯಕಾರಿ ವೆಚ್ಚದ ಏರಿಕೆಯನ್ನು ವರ್ಷದಿಂದ ವರ್ಷಕ್ಕೆ ಶೇ.1ಕ್ಕೆ ಸೀಮಿತಗೊಳಿಸಲಾಗಿದೆ.

ಈ ತ್ತೈಮಾಸಿಕದಲ್ಲಿ ಒಟ್ಟು ಮುನ್ನೇರ್ಪಾಟು 2759 ಕೋಟಿ ರೂ.ಗಳಾಗಿದ್ದು, ಕಳೆದ ವರ್ಷ ನಾಲ್ಕನೇ ತ್ತೈಮಾಸಿಕದಲ್ಲಿ 5552 ಕೋಟಿ ರೂ.ಇತ್ತು. ಬ್ಯಾಂಕಿನ ಅನುತ್ಪಾದಕ ಆಸ್ತಿಗಳ ಮೇಲಿನ ಮುನ್ನೇರ್ಪಾಟು ಪ್ರಸಕ್ತ ತ್ತೈಮಾಸಿಕದಲ್ಲಿ 2924 ಕೋಟಿಯಾಗಿದೆ. ಕಳೆದ ವರ್ಷದ ತ್ತೈಮಾಸಿಕದಲ್ಲಿ 5883 ಕೋಟಿ ರೂ.ಗಳಾಗಿತ್ತು ಎಂದು ಹೇಳಿದರು.

ಈ ಬಾರಿಯ ಸಾಧನೆ
ಬ್ಯಾಂಕಿನ ಈ ಬಾರಿಯ ಕಾರ್ಯಾಚರಣೆ ಲಾಭ 8914 ಕೋಟಿ ರೂ.ಗಳಷ್ಟು ವೃದ್ಧಿಯಾಗಿದೆ. ಅಂದರೆ ವರ್ಷದಿಂದ ವರ್ಷಕ್ಕೆ ಶೇ.24.72ರಷ್ಟು ಪ್ರಗತಿಯಾಗುತ್ತಿದೆ. ವಿತ್ತ ವರ್ಷ 2016ರಲ್ಲಿ 2813 ಕೋಟಿ ನಿವ್ವಳ ನಷ್ಟಕ್ಕೆ ಹೋಲಿಸಿದಾಗ ಈ ಬಾರಿ ಬ್ಯಾಂಕ್‌ 1122 ಕೋಟಿ ನಿವ್ವಳ ಲಾಭ ಗಳಿಸಿದೆ. ಒಟ್ಟಾರೆ ಆದಾಯ 48942 ಕೋಟಿ ರೂ.ಗಳಾಗಿದ್ದು, ಇದರಲ್ಲಿ ಸಾಲದ ಮೇಲಿನ ಬಡ್ಡಿ 29586 ಕೋಟಿ ರೂ.ಒಳಗೊಂಡಿದೆ. ಆದಾಯದಲ್ಲಿ ಒಟ್ಟಾರೆ ವೆಚ್ಚ ಶೇ.4.13ರಷ್ಟು ಇಳಿಕೆಯೊಂದಿಗೆ ರೂ.40028 ಕೋಟಿಯಾಗಿದೆ. ಬಡ್ಡಿಯೇತರ ಆದಾಯ ಶೆ.54.95ರಷ್ಟು ಬೆಳವಣಿಗೆಯೊಂದಿಗೆ 7554 ಕೋಟಿ ರೂ.ತಲುಪಿದೆ ಎಂದರು.

ಜಾಗತಿಕ ಒಟ್ಟಾರೆ ವ್ಯವಹಾರದಲ್ಲಿ 837284 ಕೋಟಿ ರೂ.ಗಳಾಗಿದ್ದು, ಶೇ.4.07 ಪ್ರಗತಿ ಕಂಡಿದೆ. ಜಾಗತಿಕ ಠೇವಣಿ 4,95,275 ಕೋಟಿ ರೂ.ಗಳಾಗಿದ್ದು, ವರ್ಷದಿಂದ ವರ್ಷಕ್ಕೆ ಶೇ.3.23ರಷ್ಟು ಬೆಳವಣಿಗೆಯಾಗಿದೆ. ಸಾಗರೋತ್ತರ ವ್ಯವಹಾರವು ಬ್ಯಾಂಕಿನ ಒಟ್ಟು ವ್ಯವಹಾರದ ಶೇ.8.09 ಆಗಿದೆ. 8 ಸಾಗರೋತ್ತರ ಶಾಖೆಗಳ ಒಟ್ಟು ವ್ಯವಹಾರ 67,716 ಕೋಟಿ ರೂ.ಗಳಾಗಿವೆ. ಒಟ್ಟಾರೆ ಗ್ರಾಹಕರ ಖಾತೆಗಳ ಸಂಖ್ಯೆ 7.78 ಕೋಟಿಗೆ ವೃದ್ಧಿಗೊಂಡಿದೆ. ಕಳೆದ ವರ್ಷ 7.25 ಕೋಟಿಗಳಷ್ಟಿತ್ತು ಎಂದು ತಿಳಿಸಿದರು.

ಮುಂದಿನ ಗುರಿ
ವಿತ್ತ ವರ್ಷ 2018ರಲ್ಲಿ ರೀಟೇಲ್‌ ವ್ಯವಹಾರ, ಆಸ್ತಿ ಗುಣಮಟ್ಟ, ಚಾಲ್ತಿ ಮತ್ತು ಉಳಿತಾಯ ಠೇವಣಿ, ರೀಟೇಲ್‌ ಠೇವಣಿ, ರೀಟೆಲ್‌ ಸಾಲಗಳು, ಬಡ್ಡಿಯೇತರ ಆದಾಯ, ನಿಷ್ಕ್ರಿಯ ಆಸ್ತಿಗಳನ್ನು ಸೀಮಿತಗೊಳಿಸುವುದು. ವಸೂಲಾತಿ, ಕಾರ್ಯಾಚರಣೆ ಹಣಕಾಸು ಅನುಪಾತಗಳಾದ ನಿವ್ವಳ ಬಡ್ಡಿ ಅಂತರ, ಆಸ್ತಿಗಳ ಮೇಲಿನ ಪ್ರತಿಫ‌ಲನ, ಸಾಮ್ಯ ಬಂಡವಾಳದ ಮೇಲಿನ ಪ್ರತಿಫ‌ಲನ ಮುಂತಾದವುಗಳನ್ನು ಉತ್ತಮ ಪಡಿಸುವ ಗುರಿ ಹೊಂದಲಾಗಿದೆ ಎಂದರು.