ಕೋವಿಡ್‌: ಕೈದಿಗಳಿಗೆ ಬಿಡುಗಡೆ ಭಾಗ್ಯ

ಲಾಸ್‌ಏಂಜಲೀಸ್‌: ಅಮೆರಿಕದಲ್ಲಿ ಕೋವಿಡ್‌ ಪ್ರಕರಣಗಳು ಏರಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಅಲ್ಲಿನ ಕೈದಿಗಳೀಗ ಬಿಡುಗಡೆ ಭಾಗ್ಯ ಕಾಣುತ್ತಿದ್ದಾರೆ. ಅಮೆರಿಕದ ಹೆಚ್ಚಿನ ಜೈಲುಗಳು ಅಪರಾಧಿಗಳಿಂದ ತುಂಬಿದ್ದು, ಸೋಂಕು ಒಂದೊಮ್ಮೆ ಪ್ರವೇಶಿಸಿದರೆ, ಸಾವಿರಾರು ಮಂದಿ ಸಂಕಷ್ಟಕ್ಕೀಡಾಗುವ ಭೀತಿ ಇದೆ.

ಆಗಸ್ಟ್‌ ವೇಳೆಗೆ ಸುಮಾರು 8 ಸಾವಿರ ಕೈದಿಗಳನ್ನು ಬಿಡಲು ಉದ್ದೇಶಿಸಲಾಗಿದೆ. ಈಗಾಗಲೇ ಸುಮಾರು 10 ಸಾವಿರ ಮಂದಿಯನ್ನು ಜೈಲಿನಿಂದ ಕಳಿಸಲಾಗಿದೆ. ಈಗ ಜೈಲಿನಿಂದ ಬಿಡುಗಡೆಯಾಗುವವರು ಕ್ಯಾಲಿಫೋರ್ನಿಯಾದ ಜೈಲುಗಳಲ್ಲಿದ್ದಾರೆ ಎಂದು ಕ್ಯಾಲಿಫೋರ್ನಿಯಾ ಬಂದೀಖಾನೆ ಮತ್ತು ಪುನರ್ವಸತಿ ಇಲಾಖೆ ಹೇಳಿದೆ. ಜೈಲುಗಳಲ್ಲಿರುವ ಕೈದಿಗಳ ಆರೋಗ್ಯ ಸುರಕ್ಷತೆ ದೃಷ್ಟಿಯಿಂದ ಈ ಕ್ರಮವನ್ನು ಕೈಗೊಳ್ಳಲಾಗಿದೆ. ಇಲ್ಲಿರುವ ಜೈಲು ಸಿಬಂದಿಗೂ ಸೋಂಕಿನ ಭೀತಿಯಿದ್ದು, ಹಲವರು ಜೈಲಿನಿಂದ ತೆರವಾಗುವುದರಿಂದ ಅವರ ಆರೋಗ್ಯ ಸಂರಕ್ಷಣೆಯ ಕೆಲಸವೂ ಆಗಲಿದೆ.

ಈಗಾಗಲೇ ಕ್ಯಾಲಿಫೋರ್ನಿಯಾದ ವಿವಿಧ ಜೈಲುಗಳಲ್ಲಿ ಕೈದಿಗಳ ಪರೀಕ್ಷೆ ಮಾಡಲಾಗಿದ್ದು ಸುಮಾರು 1 ಸಾವಿರ ಮಂದಿಗೆ ಸೋಂಕು ದೃಢಪಟ್ಟಿದೆ.

ಏತನ್ಮಧ್ಯೆ ಸಾನ್‌ ಕ್ವಾಂಟೈನ್‌ ಜೈಲಿನಲ್ಲಿ ಸುಮಾರು 1.13 ಲಕ್ಷ ಮಂದಿ ಇದ್ದಾರೆ. ಇದರಲ್ಲಿ ಅರ್ಧದಷ್ಟು ಮಂದಿಗೆ ಸೋಂಕು ತಗುಲಿದೆ ಎಂದು ಹೇಳಲಾಗುತ್ತಿದೆ. ಇಲ್ಲಿಂದ ಹಲವರನ್ನು ಶುಕ್ರವಾರ ಬಿಡುಗಡೆ ಮಾಡಲಾಗಿದೆ. ಇದಕ್ಕೂ ಮೊದಲು ಬಿಡುಗಡೆಯಾದವರಿಗೆ ಪಾಸಿಟಿವ್‌ ಬಂದಿತ್ತು.