ಧೈರ್ಯ ಅಂದರೆ ಇದು! ಯುದ್ಧ ಭೀತಿ ನಡುವೆಯೂ ಉಕ್ರೇನ್‌ಗೆ ಭೇಟಿ ನೀಡಿದ ಬ್ರಿಟನ್‌ ಪ್ರಧಾನಿ

ಕೀವ್‌ : ಯುದ್ಧದ ನಡುವೆಯೂ ಉಕ್ರೇನ್‌ಗೆ ಭೇಟಿ ನೀಡಿ, ರಾಜಧಾನಿ ಕೀವ್‌ನ ರಸ್ತೆಯಲ್ಲಿ ಅಧ್ಯಕ್ಷ ಝೆಲೆನ್‌ಸ್ಕಿ ಅವರೊಂದಿಗೆ ಮಾತನಾಡುತ್ತಾ ನಿರ್ಭೀತಿಯಿಂದ ನಡೆಯುತ್ತಿದ್ದ ಬ್ರಿಟನ್‌ ಪ್ರಧಾನಿ ಬೋರಿಸ್‌ ಜಾನ್ಸನ್‌ ಅವರ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.

ಯಾವ ಕ್ಷಣದಲ್ಲಿ ಬೇಕಿದ್ದರೂ ಶೆಲ್‌ ಅಥವಾ ಕ್ಷಿಪಣಿ ಬಂದು ಬೀಳಬಹುದು ಎಂಬ ಭೀತಿಯಿರುವಾಗ ಈ ಇಬ್ಬರು ನಾಯಕರೂ ಅದರ ಅರಿವೇ ಇಲ್ಲದಂತೆ ಸಾಗುತ್ತಿರುವ ವೀಡಿಯೋ ನೋಡಿ ಅನೇಕರು, “ಧೈರ್ಯ ಅಂದರೆ ಇದು’ ಎಂದು ಹೊಗಳಿದ್ದಾರೆ.

ಹೊಸ ಕಮಾಂಡರ್‌: ಉಕ್ರೇನ್‌ ಯುದ್ಧದಲ್ಲಿ ನಿರಂತರ ಹಿನ್ನಡೆ ಅನುಭವಿಸುತ್ತಿರುವ ರಷ್ಯಾ, ರವಿವಾರ ಉಕ್ರೇನ್‌ಗೆ ಹೊಸ ಯುದ್ಧ ಕಮಾಂಡರ್‌ ಅನ್ನು ನೇಮಕ ಮಾಡಿದೆ. ರಷ್ಯಾದ ಅನುಭವಿ ಸೇನಾಧಿಕಾರಿ, 60 ವರ್ಷದ ಜ| ಅಲೆಕ್ಸಾಂಡರ್‌ ವೋರ್ನಿ ಕೋವ್‌ರನ್ನು ಹೊಸ ಕಮಾಂಡರ್‌ ಆಗಿ ನೇಮಿಸಲಾಗಿದೆ. ಇವರು ಸಿರಿಯಾದಲ್ಲಿ ನಾಗರಿಕರ ವಿರುದ್ಧ ಕ್ರೌರ್ಯ ಮೆರೆದಿದ್ದ ಅಧಿಕಾರಿ ಎಂದು ಅಮೆರಿಕ ಆರೋಪಿಸಿದೆ.