Advertisement
ಆಗಸ್ಟ್‌ 27, 1908ರಂದು ಜನಿಸಿದ ಬ್ರಾಡ್‌ಮನ್‌, 20 ವರ್ಷಗಳ ಸುದೀರ್ಘ ಕ್ರಿಕೆಟ್‌ ಬಾಳ್ವೆಯಲ್ಲಿ ಹಲವು ದಾಖಲೆಗಳನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಇಂಗ್ಲೆಂಡ್‌ ವಿರುದ್ಧದ ಸರಣಿಗಳಲ್ಲಿ ಆಜೇಯರಾಗಿ ಉಳಿದ ಆಸ್ಟ್ರೇಲಿಯದ ಪ್ರಖ್ಯಾತ “ದಿ ಇನ್‌ವಿನ್ಸಿಬಲ್ಸ್‌’ ತಂಡದ ನಾಯಕರೂ ಆಗಿದ್ದರು. ನಿವೃತ್ತಿ ಬಳಿಕವೂ ಸುಮಾರು ಮೂರು ದಶಕಗಳಿಗೂ ಹೆಚ್ಚು ಕಾಲ ಕ್ರಿಕೆಟ್‌ ಆಡಳಿತಗಾರನಾಗಿ, ಆಯ್ಕೆಗಾರನಾಗಿ, ವೀಕ್ಷಕ ವಿವರಣೆ ಕಾರ ಹಾಗೂ ಲೇಖಕನಾಗಿ ಹೆಸರು ಮಾಡಿದ್ದರು.
1948ರಲ್ಲಿ ಇಂಗ್ಲೆಂಡ್‌ ವಿರುದ್ಧ ಆಡಿದ ತಮ್ಮ ಕೊನೆಯ ಇನ್ನಿಂಗ್ಸ್‌ನಲ್ಲಿ ಬ್ರಾಡ್‌ಮನ್‌ ಕೇವಲ 4 ರನ್‌ ಗಳಿಸಿದ್ದರೂ ಅವರ ಸರಾಸರಿ 100 ಆಗಿರುತ್ತಿತ್ತು. ದುರದೃಷ್ಟವಶಾತ್‌ ಅಂದು ಅವರು ಶೂನ್ಯಕ್ಕೆ ವಿಕೆಟ್‌ ಒಪ್ಪಿಸಿದ್ದರಿಂದ 99.94 ಸರಾಸರಿಯಲ್ಲಿ ಉಳಿಯಬೇಕಾಯಿತು. ಆಡಿದ 52 ಟೆಸ್ಟ್‌ಗಳಿಂದ ಅವರು 6,994 ರನ್‌ ಗಳಿಸಿದ್ದಾರೆ. ಇದರಲ್ಲಿ 29 ಶತಕ ಹಾಗೂ 13 ಅರ್ಧ ಶತಕಗಳು ಒಳಗೊಂಡಿದ್ದು, ಇನ್ನಿಂಗ್ಸ್‌ ಒಂದರಲ್ಲಿ ಗರಿಷ್ಠ 334 ರನ್‌ ಬಾರಿಸಿದ್ದಾರೆ. 2 ವಿಕೆಟ್‌ಗಳನ್ನು ಸಂಪಾದಿಸಿದ್ದು, 32 ಕ್ಯಾಚ್‌ ಪಡೆದಿದ್ದಾರೆ.