“ತ್ರಿವಿಕ್ರಮ’ನ ಜೊತೆಯಾದ ಬಾಲಿವುಡ್‌ ನಟ ರೋಹಿತ್‌ ರಾಯ್‌

ರವಿಚಂದ್ರನ್‌ ಅವರ ಎರಡನೇ ಪುತ್ರ ವಿಕ್ರಮ್‌ ಅಭಿನಯದ “ತ್ರಿವಿಕ್ರಮ’ ಚಿತ್ರದ ಚಿತ್ರೀಕರಣ ಭರದಿಂದ ನಡೆಯುತ್ತಿದೆ. ಸದ್ಯಕ್ಕೆ ರಾಜಸ್ತಾನದತ್ತ ಮುಖ ಮಾಡಲಿರುವ ಚಿತ್ರತಂಡಕ್ಕೆ ಮತ್ತೊಬ್ಬ ಹೊಸ ನಟನ ಆಗಮನವಾಗಿದೆ. ಹೌದು, ಈಗಾಗಲೇ ತೆಲುಗು ಹಾಗು ತಮಿಳು ಚಿತ್ರರಂಗದಲ್ಲಿ ಯಶಸ್ವಿ ಚಿತ್ರಗಳಲ್ಲಿ ನಟಿಸುವ ಮೂಲಕ ಬಿಝಿ ನಟ ಎನಿಸಿಕೊಂಡಿರುವ ಜಯಪ್ರಕಾಶ್‌ ಅವರು “ತ್ರಿವಿಕ್ರಮ’ ಚಿತ್ರತಂಡ ಸೇರಿದ್ದು ಗೊತ್ತೇ ಇದೆ.

ಈಗ ಬಾಲಿವುಡ್‌ ನಟರೊಬ್ಬರ ಆಗಮನವಾಗಿದೆ. ಹೌದು, ಅದು ಬೇರಾರೂ ಅಲ್ಲ, ರೋಹಿತ್‌ ರಾಯ್‌. ಹೌದು, ರೋಹಿತ್‌ ರಾಯ್‌ ಇದೇ ಮೊದಲ ಬಾರಿಗೆ ದಕ್ಷಿಣ ಭಾರತದ ಚಿತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಬಾಲಿವುಡ್‌ನ‌ಲ್ಲಿ ಈಗಾಗಲೇ “ಕಾಬಿಲ್‌’,”ಏಕ್‌ ಕಿಲಾಡಿ ಏಕ್‌ ಹಸೀನಾ’,”ಅಪಾರ್ಟ್‌ಮೆಂಟ್‌’,”ಪ್ಲಾನ್‌’ ಸೇರಿದಂತೆ ಹಲವು ಚಿತ್ರಗಳಲ್ಲಿ ನಟಿಸಿದ್ದಾರೆ. ಕಿರುತೆರೆಯ ಸಾಕಷ್ಟು ಧಾರಾವಾಹಿಗಳು, ರಿಯಾಲಿ ಶೋ, ಹಾಗು ವೆಬ್‌ಸೀರೀಸ್‌ಗಳಲ್ಲಿ ಕಾಣಿಸಿಕೊಂಡಿರುವ ರೋಹಿತ್‌ರಾಯ್‌, “ತ್ರಿವಿಕ್ರಮ’ ಮೂಲಕ ಕನ್ನಡ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದಾರೆ.

ಈ ಚಿತ್ರದಲ್ಲಿ ರೋಹಿತ್‌ರಾಯ್‌ ಅವರದು ನೆಗೆಟಿವ್‌ ಶೇಡ್‌ ಇರುವ ಪಾತ್ರವಂತೆ. ರಾಜಸ್ತಾನದಲ್ಲಿ ನಡೆಯಲಿರುವ ಚಿತ್ರೀಕರಣದಲ್ಲಿ ಭಾಗವಹಿಸಲಿರುವ ರೋಹಿತ್‌ರಾಯ್‌, ಚಿತ್ರದ ಕಥೆ, ಪಾತ್ರ ಕೇಳಿ ನಟಿಸಲು ಗ್ರೀನ್‌ಸಿಗ್ನಲ್‌ ನೀಡಿದ್ದಾರೆ. ಅಲ್ಲಿಗೆ ಚಿತ್ರದಲ್ಲಿ ಟಾಲಿವುಡ್‌ ಮತ್ತು ಬಾಲಿವುಡ್‌ ಕಲಾವಿದರು ಸೇರಿಕೊಂಡಂತಾಗಿದೆ. ಚಿತ್ರದಲ್ಲಿ ತೆಲುಗು ನಟ ಜಯಪ್ರಕಾಶ್‌ ಅವರು ನಾಯಕಿ ತಂದೆ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.

ಚಿತ್ರದಲ್ಲಿ ಆಕಾಂಕ್ಷ ನಾಯಕಿಯಾದರೆ, ಅಕ್ಷರಗೌಡ ಎರಡನೇ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಉಳಿದಂತೆ ಸಾಧುಕೋಕಿಲ, ತುಳಸಿ ಶಿವಮಣಿ, ಚಿಕ್ಕಣ್ಣ, ಸುಚೇಂದ್ರಪ್ರಸಾದ್‌ ಇತರರು ನಟಿಸುತ್ತಿದ್ದಾರೆ. ಅರ್ಜುನ್‌ ಜನ್ಯಾ ಆರು ಹಾಡುಗಳಿಗೆ ಸಂಗೀತ ನೀಡಿದ್ದು, ಸಂತೋಷ್‌ ರೈ ಪಾತಾಜೆ ಛಾಯಾಗ್ರಹಣವಿದೆ.