ಅಂಧರ ವಿಶ್ವಕಪ್‌: ಭಾರತ ಸೆಮಿ ಫೈನಲಿಗೆ

ಅಜ್ಮಾನ್‌ (ಯುಎಇ): ಇಲ್ಲಿನ “ಈಡನ್‌ ಗಾರ್ಡನ್‌ ಕ್ರಿಕೆಟ್‌ ಗ್ರೌಂಡ್‌’ನಲ್ಲಿ ನಡೆದ ಅಂಧರ ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯದಲ್ಲಿ ನೇಪಾಲ ವಿರುದ್ಧ 8 ವಿಕೆಟ್‌ ಜಯ ಸಾಧಿಸಿದ ಭಾರತ ಸೆಮಿಫೈನಲ್‌ ಪ್ರವೇಶಿಸಿದೆ. ಜ. 17ರಂದು ನಡೆಯುವ ಸೆಮಿಫೈನಲ್‌ನಲ್ಲಿ ಭಾರತ ತಂಡ ಬಾಂಗ್ಲಾದೇಶ ವಿರುದ್ಧ ಆಡಲಿದೆ.

ಟಾಸ್‌ ಗೆದ್ದು ಮೊದಲು ಬ್ಯಾಟಿಂಗಿಗೆ ಇಳಿದ ನೇಪಾಲ 37.5 ಓವರ್‌ಗಳಲ್ಲಿ 9 ವಿಕೆಟ್‌ ನಷ್ಟಕ್ಕೆ 156 ರನ್‌ ಪೇರಿಸಿತು. ಭಾರತ ಎರಡೇ ವಿಕೆಟ್‌ ನಷ್ಟದಲ್ಲಿ ನೇಪಾಲ ಮೊತ್ತ ಮೀರುವಲ್ಲಿ ಯಶಸ್ವಿಯಾಯಿತು. ಭಾರತದ ಪರ ಪ್ರಕಾಶ್‌ ಜಯರಾಮಯ್ಯ 22 ರನ್ನಿತ್ತು 2 ವಿಕೆಟ್‌ ಉರುಳಿಸಿದರು. ತಂಡದ ನಾಯಕ ಅಜಯ್‌ ರೆಡ್ಡಿ, ರಾಮ್‌ಬೀರ್‌, ಪ್ರೇಮ್‌ ಕುಮಾರ್‌ ಮತ್ತು ಜಾಫ‌ರ್‌ ಇಕ್ಬಾಲ್‌ ತಲಾ ಒಂದೊಂದು ವಿಕೆಟ್‌ ಕೆಡವಿದರು.

ಚೇಸಿಂಗ್‌ ವೇಳೆ 29 ಎಸೆತಗಳಲ್ಲಿ 6 ಬೌಂಡರಿಗಳೊಂದಿಗೆ 54 ರನ್‌ ಸಿಡಿಸಿದ ಅಜಯ್‌ ಗರಿಯಾ ಪಂದ್ಯಶ್ರೇಷ್ಠರೆ ನಿಸಿದರು. ಮಹೇಂದರ್‌ 40, ರಾಮ್‌ಬೀರ್‌ 38 ರನ್‌ ಮಾಡಿದರು.

ಪಾಕ್‌ ದಾಖಲೆ ಮೊತ್ತ
ಮೊದಲ ಪಂದ್ಯದಲ್ಲಿ ಭಾರತದ ವಿರುದ್ಧ ಸೋತಿದ್ದ ಪಾಕಿಸ್ಥಾನ ರವಿವಾರದ ಇನ್ನೊಂದು ಪಂದ್ಯದಲ್ಲಿ ಆಸ್ಟ್ರೇಲಿಯ ವಿರುದ್ಧ 4ಕ್ಕೆ 563 ರನ್ನುಗಳ ದಾಖಲೆ ಮೊತ್ತದೊಂದಿಗೆ 393 ರನ್ನುಗಳ ದಾಖಲೆ ಜಯ ಸಾಧಿಸಿ ಸೆಮಿಫೈನಲ್‌ ತಲುಪಿತು. ಅಲ್ಲಿ ಶ್ರೀಲಂಕಾ ವಿರುದ್ಧ ಆಡಲಿದೆ. ಹೀಗೆ ಅಂಧರ ವಿಶ್ವಕಪ್‌ ಪಂದ್ಯಾವಳಿಯಲ್ಲಿ ಏಶ್ಯದ 4 ತಂಡಗಳೇ ಸೆಮಿಫೈನಲ್‌ ತಲುಪಿದ್ದು ವಿಶೇಷ.

ಕ್ರೀಡೆ