Mahayuti ಗೆಲುವು: ಆ್ಯಕ್ಸಿಸ್‌ ಮೈ ಇಂಡಿಯಾ, ಚಾಣಕ್ಯ ಸಮೀಕ್ಷೆ ಭವಿಷ್ಯ

ಮುಂಬಯಿ: ಮಹಾರಾಷ್ಟ್ರ ಚುನಾವಣೆ ಬಳಿಕ ಗುರುವಾರ ಮತ್ತೆರಡು ಸಮೀಕ್ಷೆಗಳು ಬಿಡುಗಡೆಯಾಗಿದೆ. ಬಿಜೆಪಿ ನೇತೃತ್ವದ ಮಹಾಯುತಿ ಮೈತ್ರಿ ಬಹುಮತ ಸಾಧಿಸಲಿದೆ ಎಂದು ಅವುಗಳು ಹೇಳಿಕೊಂಡಿವೆ. ಟುಡೇಸ್‌ ಚಾಣಕ್ಯ ಸಮೀಕ್ಷೆಯ ಪ್ರಕಾರ, 288 ಕ್ಷೇತ್ರಗಳಲ್ಲಿ ಮಹಾಯುತಿ 175 ಕ್ಷೇತ್ರಗಳಲ್ಲಿ(11 ಕ್ಷೇತ್ರ ಹೆಚ್ಚಳ ಅಥವಾ ಕಡಿಮೆ), ಮಹಾ ವಿಕಾಸ್‌ ಅಘಾಡಿ 100 ಕ್ಷೇತ್ರಗಳಲ್ಲಿ(11 ಕ್ಷೇತ್ರ ಹೆಚ್ಚಳ ಅಥವಾ ಕಡಿಮೆ), ಇತರೆ 13 ಕ್ಷೇತ್ರಗಳಲ್ಲಿ(5 ಕ್ಷೇತ್ರ ಹೆಚ್ಚು ಅಥವಾ ಕಡಿಮೆ) ಗೆಲುವು ಸಾಧಿಸಲಿವೆ. ಆ್ಯಕ್ಸಿಸ್‌ ಮೈ ಇಂಡಿಯಾ ಪ್ರಕಾರ 178-200 ಕ್ಷೇತ್ರಗಳಲ್ಲಿ ಮಹಾಯುತಿ, 82-102 ಕ್ಷೇತ್ರಗಳಲ್ಲಿ ಮಹಾವಿಕಾಸ್‌ ಅಘಾಡಿ ಹಾಗೂ 6-12 ಕ್ಷೇತ್ರಗಳಲ್ಲಿ ಇತರರು ಗೆಲುವು ಸಾಧಿಸಲಿದ್ದಾರೆ.

ಅಧಿಕಾರಕ್ಕೆ ಮುನ್ನವೇ ಅಘಾಡಿ ಒಕ್ಕೂಟದಲ್ಲಿ ಅಧಿಕಾರಕ್ಕೆ ಜಟಾಪಟಿ
ಮಹಾರಾಷ್ಟ್ರ ಚುನಾವಣೆ ಚುನಾವಣೆ ಫ‌ಲಿತಾಂಶ ಪ್ರಕಟವಾಗುವ ಮುನ್ನವೇ ಮಹಾ ವಿಕಾಸ ಅಘಾಡಿಯ ಪಕ್ಷಗಳಾಗಿರುವ ಕಾಂಗ್ರೆಸ್‌ ಮತ್ತು ಶಿವಸೇನೆ ಉದ್ಧವ್‌ ಬಣದ ನಡುವೆ ಸಿಎಂ ಗಾದಿಗೆ ಕಿತ್ತಾಟ ಆರಂಭವಾಗಿದೆ. ಚುನಾವಣೋತ್ತರ ಸಮೀಕ್ಷೆಗಳು ಹೊರಬೀಳುತ್ತಿದ್ದಂತೆಯೇ “ರಾಜ್ಯದಲ್ಲಿ ಕಾಂಗ್ರೆಸ್‌ ನೇತೃತ್ವದಲ್ಲಿ ಮಹಾ ವಿಕಾಸ ಅಘಾಡಿ ಸರಕಾರ ರಚನೆಯಾಗಲಿದೆ’ ಎಂದು ಮಹಾರಾಷ್ಟ್ರ ಕಾಂಗ್ರೆಸ್‌ ಅಧ್ಯಕ್ಷ ನಾನಾ ಪಟೋಲೆ ಹೇಳಿದ್ದಾರೆ. ಅದಕ್ಕೆ ಆಕ್ಷೇಪ ವ್ಯಕ್ತಪಡಿಸಿರುವ ಸಂಸದ ಸಂಜಯ ರಾವತ್‌ “ಇದನ್ನು ನಾನು ಮಾತ್ರವಲ್ಲ ಯಾರೂ ಒಪ್ಪಲ್ಲ. ನೀವು ಸಿಎಂ ಆಗಬೇಕು ಎಂದು ಕಾಂಗ್ರೆಸ್‌ ಹೈ ಕಮಾಂಡ್‌ ಹೇಳಿದ್ದರೆ ಅದನ್ನು ರಾಹುಲ್‌ ಅಥವಾ ಸೋನಿಯಾ ಗಾಂಧಿ ಘೋಷಿಸಬೇಕು’ ಎಂದಿದ್ದಾರೆ.