ಪುತ್ತೂರು: ಉದ್ಯಮ ಕ್ಷೇತ್ರದ ಸಾಧನೆಗಾಗಿ ‘ಬಿಂದು’ ಖ್ಯಾತಿಯ ಪುತ್ತೂರಿನ ಎಸ್‌.ಜಿ. ಕಾರ್ಪೊರೇಟ್ಸ್‌ ಕಂಪೆನಿ ಮಾಲಕ ಸತ್ಯಶಂಕರ್‌ ಕೆ. ಅವರಿಗೆ ಪನೋರಮಾ ಟೆಲಿವಿಷನ್‌ ಪ್ರೈ ಲಿ. ನ್ಯೂಸ್ 18 ಕನ್ನಡ ಚಾನೆಲ್‌ ಕೊಡಮಾಡುವ ಪ್ರತಿಷ್ಠಿತ ವರ್ಷದ ಕನ್ನಡಿಗ- 2018 ಪ್ರಶಸ್ತಿ ಲಭಿಸಿದೆ.
ಪುತ್ತೂರಿನ ಪುರುಷರಕಟ್ಟೆಯಲ್ಲಿ ತಯಾರಿಕಾ ಘಟಕ ಹೊಂದಿರುವ ಎಸ್‌ಐ ಕಾರ್ಪೊರೇಟ್ಸ್‌, ಇತೀ¤ಚೆಗೆ ತೆಲಂಗಾಣದಲ್ಲೊಂದು ಘಟಕ ಸ್ಥಾಪಿಸಿದೆ. ಕನ್ನಡ ನಟ ಶ್ರೀಮುರಳಿ, ನ್ಯೂಸ್ 18 ಸಂಪಾದಕ ಅನಂತ ಚಿನಿವಾರ್‌ ಉಪಸ್ಥಿತಿಯಲ್ಲಿ ಸತ್ಯಶಂಕರ್‌ ಅವರಿಗೆ ಬೆಂಗಳೂರಿನಲ್ಲಿ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಸತ್ಯಶಂಕರ್‌ ಅವರು ತಂಪು ಪಾನೀಯ ಉದ್ಯಮದಲ್ಲಿ ಏರಿರುವ ಎತ್ತರ ಸೋಜಿಗ ತರುವಂಥದ್ದು. ಬಿಂದು ಎಂಬ ಹೆಸರಿನ ಕಂಪೆನಿಯ ಪೇಯ ಮನೆ ಮಾತಾಗಿದೆ. ಬಹುರಾಷ್ಟ್ರೀಯ ದೈತ್ಯ ಕಂಪೆನಿಗಳನ್ನೆದುರಿಸಿ ಗ್ರಾಮೀಣ ಭಾಗದ ಉದ್ಯಮವೊಂದು ಈ ಮಟ್ಟಕ್ಕೆ ಬೆಳೆಯುವುದು ನಿಜಕ್ಕೂ ಸವಾಲಿನ ಕೆಲಸ. ಸಾಧಾರಣ ಹಿನ್ನೆಲೆಯಿಂದ ಬಂದು ಸಂಕಷ್ಟಗಳ ಸರಮಾಲೆಗಳನ್ನೇ ಎದುರಿಸಿ ತಾವು ಸಾಧಿಸಿರುವ ಈ ಯಶಸ್ಸು ಸರ್ವರಿಗೂ ಸ್ಫೂರ್ತಿದಾಯಕ. ನೀವು ಕನ್ನಡದ ಕನ್ನಡಿಗರ ಹೆಮ್ಮೆ ಎಂದು ಪ್ರಶಸ್ತಿ ಫಲಕದಲ್ಲಿ ಬರೆಯಲಾಗಿದೆ.
ನ್ಯೂಸ್ 18 ನಡೆಸಿಕೊಡುವ ವರ್ಷದ ಕನ್ನಡಿಗ ಪ್ರಶಸ್ತಿಯ ಆಯ್ಕೆ ಸಮಿತಿ ತೀರ್ಪುಗಾರರಾಗಿ ಇನ್ಫೋಸಿಸ್‌ ಸ್ಥಾಪಕ ಎನ್‌.ಆರ್‌. ನಾರಾಯಣ ಮೂರ್ತಿ, ಡಾ| ಸಿ.ಎನ್‌. ಮಂಜುನಾಥ್‌, ಕರ್ನಾಟಕ ಸರಕಾರದ ಮಾಹಿತಿ ತಂತ್ರಜ್ಞಾನ ಸಚಿವ ಪ್ರಿಯಾಂಕ್‌ ಖರ್ಗೆ, ಉಲ್ಲಾಸ್‌ ಕಾರಂತ್‌, ಶ್ರದ್ಧಾ ಶ್ರೀನಾಥ್‌, ಎಂ.ಡಿ. ಪಲ್ಲವಿ, ಹೇಮಾಮಾಲಿನಿ ಮಯ್ಯ ಭಾಗವಹಿಸಿದ್ದರು.
