Re Marriage: 70ರ ಮುದುಕ 25 ವರ್ಷದ ಯುವತಿ ಜತೆ ವಿವಾಹ; ಜಾಲತಾಣದಲ್ಲಿ ವೈರಲ್

ಪಾಟ್ನಾ: ನಾಲ್ಕು ವರ್ಷದ ಹಿಂದೆ ಪತ್ನಿಯನ್ನು ಕಳೆದುಕೊಂಡಿದ್ದ 70ವರ್ಷದ ಮುದುಕನೊಬ್ಬ 25 ವರ್ಷದ ಯುವತಿ ಜೊತೆ ಮರುವಿವಾಹವಾದ ಘಟನೆ ಬಿಹಾರದಲ್ಲಿ ನಡೆದಿದೆ ಎಂದು ವರದಿಯಾಗಿದೆ.

ಬಿಹಾರ ಗಯಾ ಜಿಲ್ಲೆಯ ಬೈಡಾ ಗ್ರಾಮದ ಮೊಹಮ್ಮದ್‌ ಸಲಿಮುಲ್ಲಾ ನೂರಾನಿ (70ವರ್ಷ) ಎಂಬಾತ ಹಂಝಾಪುರ್‌ ನ ಇಸ್ಲಾಮ್‌ ನಗರ ನಿವಾಸಿ ರೇಷ್ಮಾ ಪರ್ವಿನ್‌ (25ವರ್ಷ) ಎಂಬಾಕೆಯನ್ನು ವಿವಾಹವಾಗಿದ್ದು, ಕಾರ್ಯಕ್ರಮದಲ್ಲಿ ನೂರಾರು ಜನರು ಪಾಲ್ಗೊಂಡಿರುವುದಾಗಿ ವರದಿ ತಿಳಿಸಿದೆ.

ಸಲಿಮುಲ್ಲಾ ಕೃಷಿಕರಾಗಿದ್ದು, ಇವರ ಪತ್ನಿ ನಾಲ್ಕು ವರ್ಷಗಳ ಹಿಂದೆ ತೀರಿಕೊಂಡಿದ್ದರು. ಮನೆಯಲ್ಲಿ ಒಬ್ಬರೇ ಇರುವ ಸಲೀಮುಲ್ಲಾ ಇತ್ತೀಚೆಗೆ ಮರು ವಿವಾಹವಾಗಿರುವುದಾಗಿ ವರದಿ ವಿವರಿಸಿದೆ.

ನೋಯ್ಡಾ ಮೂಲದ ನ್ಯೂಸ್‌ ನೆಟ್‌ ವರ್ಕ್‌ ನ ಎಡಿಟರ್‌ ಇನ್‌ ಚೀಫ್‌ ಅನುರಾಗ್‌ ಚಡ್ಡಾ ಅವರ ಮಾಹಿತಿ ಪ್ರಕಾರ, ನೂರಾನಿಗೆ ಆರು ಹೆಣ್ಣು ಹಾಗೂ ಓರ್ವ ಮಗ ಸೇರಿದಂತೆ ಏಳು ಮಕ್ಕಳು ಇದ್ದಿರುವುದಾಗಿ ತಿಳಿಸಿದ್ದಾರೆ.

ಮತ್ತೊಂದು ವರದಿಯ ಪ್ರಕಾರ, ನೂರಾನಿಗೆ ಇಬ್ಬರು ಗಂಡು ಮಕ್ಕಳಿದ್ದು, ಇಬ್ಬರಿಗೂ ವಿವಾಹವಾಗಿದ್ದು, ಅವರು ನಗರದಲ್ಲಿ ವಾಸವಾಗಿದ್ದು, ಮನೆಯಲ್ಲಿ ನೂರಾನಿ ಒಬ್ಬರೇ ಇದ್ದಿದ್ದರಿಂದ ಮರು ವಿವಾಹವಾಗಿರುವುದಾಗಿ ವರದಿ ತಿಳಿಸಿದೆ.

ದಂಪತಿ ಇಸ್ಲಾಮ್‌ ಸಂಪ್ರದಾಯದ ಪ್ರಕಾರ ವಿವಾಹವಾಗಿದ್ದು, ವಿವಾಹದಲ್ಲಿ ಗ್ರಾಮದ ನೂರಾರು ಜನರು ಭಾಗವಹಿಸಿದ್ದರು. ನೂರಾನಿ ವಿವಾಹ ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದ್ದು, ಟೀಕೆ-ಟಿಪ್ಪಣಿ ವ್ಯಕ್ತವಾಗಿದೆ.‌