ಪಟ್ನಾ: ಬಿಹಾರ ವಿಧಾನಸಭೆ ಚುನಾವಣೆ ದಿನಾಂಕ ಸದ್ಯದಲ್ಲೇ ಪ್ರಕಟವಾಗುವ ನಿರೀಕ್ಷೆಯಿದೆ.
ಉತ್ತರ ಬಿಹಾರ ದ ಪ್ರಮುಖ ಜಿಲ್ಲೆಗಳಾದ ಮುಜಫ್ಫರಪುರ, ಸೀತಾಮಾರ್ಹಿ, ಶಿವ್ಹಾರ್‌, ಪಶ್ಚಿಮ ಚಂಪಾರಣ್‌, ಪೂರ್ವ ಚಂಪಾರಣ್‌, ವೈಶಾಲಿ, ದರ್ಭಾಂಗ, ಮಧುಬನಿ, ಸಮಷ್ಟಿಪುರ, ಸಹರ್ಸ, ಸುಪಾಲ್‌, ಮಾಧೇಪುರದಲ್ಲಿ ಆಯೋಗದ ಸದಸ್ಯರು ಸೋಮವಾರ ಸತತ ಸಭೆ ನಡೆಸಿದ್ದಾರೆ.
ಪಟ್ನಾ, ನಳಂದ, ಭೋಜಪುರ, ಬಕ್ಸರ್‌, ಸರನ್‌, ಸಿವನ್‌, ಗೋಪಾಲಗಂಜ್‌ನಂತಹ ಪ್ರಮುಖ ಜಿಲ್ಲೆಗಳಲ್ಲಿ ಮಂಗಳವಾರ ಚುನಾವಣ ಸಿದ್ಧತೆಗಳ ಪರಿಶೀಲನೆ ನಡೆಸಲಾಗುತ್ತದೆ.
ಹಾಗಾಗಿ, ಶೀಘ್ರವೇ ದಿನಾಂಕ ಪ್ರಕಟವಾಗಬಹುದು ಎಂದು ನಿರೀಕ್ಷಿಸಲಾಗಿದೆ. ಈ ನಡುವೆ ವಿವಿಧ ಅಭಿವೃದ್ಧಿ ಕಾರ್ಯಕ್ರಮಗಳ ಉದ್ಘಾಟನೆ ಕೂಡ ಸತತವಾಗಿ ನಡೆಯುತ್ತಿದೆ.
ಆರ್‌ಜೆಡಿ ಭಿತ್ತಿಚಿತ್ರ ವಿಚಿತ್ರ: ಆರ್‌ಜೆಡಿಯ ಕೇಂದ್ರ ಕಚೇರಿಯ ಮುಂಭಾಗ ಅಚ್ಚರಿಯ ಬೃಹತ್‌ ಭಿತ್ತಿಚಿತ್ರವೊಂದು ಕಂಡುಬಂದಿದೆ. ಅದರಲ್ಲಿ ಲಾಲುಪ್ರಸಾದ್‌ ಯಾದವ್‌ರ ಕಿರಿಯ ಪುತ್ರ ತೇಜಸ್ವಿ ಯಾದವ್‌ ದೊಡ್ಡ ಚಿತ್ರವಿದೆ. ಪಕ್ಷದ ಸ್ಥಾಪಕ ಲಾಲು ಅವರ ಸಣ್ಣ ಚಿತ್ರವೂ ಇಲ್ಲ! ಇದು ಲಾಲು ಉತ್ತರಾಧಿಕಾರಿ ತೇಜಸ್ವಿ ಎನ್ನುವುದರ ಸೂಚಕವಾಗಿದೆ ಎಂದು ಹೇಳಲಾಗುತ್ತಿದೆ.
