ಭೋಜರಾಜ್‌ ಎಂಬಿಬಿಎಸ್‌!

ಬಾಲಿವುಡ್‌ನ‌ಲ್ಲಿ ‘ಮುನ್ನಾಬಾಯಿ ಎಂಬಿಬಿಎಸ್‌’ ಸಿನೆಮಾದ ಬಗ್ಗೆ ಕೇಳಿರಬಹುದು. ಸ್ಯಾಂಡಲ್‌ ವುಡ್‌ನ‌ಲ್ಲಿ ‘ಉಪ್ಪಿ ದಾದಾ ಎಂಬಿಬಿಎಸ್‌’ ಕೂಡ ನೋಡಿರಬಹುದು. ಇದೇ ಶೈಲಿಯ ಟೈಟಲ್‌ನಲ್ಲಿ ಈಗ ಕೋಸ್ಟಲ್‌ ವುಡ್‌ನ‌ಲ್ಲಿ ಸಿನೆಮಾವೊಂದು ರೆಡಿಯಾಗಲಿದೆ. ‘ಭೋಜರಾಜ್‌ ಎಂಬಿಬಿಎಸ್‌’ ಎಂದು ಟೈಟಲ್‌ ಫಿಕ್ಸ್‌ ಮಾಡಲಾಗಿದೆ.

ಅಂದ ಹಾಗೆ ಇಸ್ಮಾಯಿಲ್‌ ಮೂಡುಶೆಡ್ಡೆ ಅವರ ನಿರ್ದೇಶನದ ಸಿನೆಮಾವಿದು. ಟೈಟಲ್‌ನಲ್ಲಿ ನಮೂದಿಸಿದಂತೆ ಭೋಜರಾಜ್‌ ವಾಮಂಜೂರು ಅವರ ಮುಖ್ಯ ಭೂಮಿಕೆಯಲ್ಲಿಯೇ ಸಿನೆಮಾ ರೆಡಿಯಾಗಲಿದೆ. ಕೋಸ್ಟಲ್‌ವುಡ್‌ನ‌ಲ್ಲಿ ಸಾಕಷ್ಟು ಭಿನ್ನ ಕಾಮಿಡಿ ಪಾತ್ರಗಳೊಂದಿಗೆ ಸದ್ದು ಮಾಡಿರುವ ಭೋಜರಾಜ್‌ ವಾಮಂಜೂರು ಅವರು ಇದೇ ಮೊದಲ ಬಾರಿಗೆ ನಾಯಕನ ರೋಲ್‌ನಲ್ಲಿ ಕಾಣಿಸುತ್ತಿದ್ದಾರೆ. ಹೀಗಾಗಿ ಕೋಸ್ಟಲ್‌ವುಡ್‌ನ‌ಲ್ಲಿ ಸಹಜವಾಗಿಯೇ ಕುತೂಹಲ ಸೃಷ್ಟಿಯಾಗಿದೆ.

ಈ ಹಿಂದೆ ಅರವಿಂದ ಬೋಳಾರ್‌ ಅವರನ್ನು ಮುಖ್ಯ ಭೂಮಿಕೆಯಲ್ಲಿರಿಸಿ ‘ಪಮ್ಮಣ್ಣೆ ದಿ ಗ್ರೇಟ್‌’ ಸಿನೆಮಾ ಮಾಡಿರುವ ಇಸ್ಮಾಯಿಲ್‌ ಮೂಡುಶೆಡ್ಡೆ ಅವರು ಸಿನೆಮಾ ಕ್ಷೇತ್ರದಲ್ಲಿ ಸಾಕಷ್ಟು ಹೆಸರು ಪಡೆದಿದ್ದಾರೆ. ಇದೇ ಮೂಡ್‌ನ‌ಲ್ಲಿ ಭೋಜರಾಜ್‌ ಅವರನ್ನು ಮುಖ್ಯ ನೆಲೆಯಲ್ಲಿರಿಸಿ ‘ಭೋಜರಾಜ್‌ ಎಂಬಿಬಿಎಸ್‌’ ಸಿನೆಮಾ ರೆಡಿ ಮಾಡಲಾಗುತ್ತಿದೆ. ಉಳಿದಂತೆ ಕೋಸ್ಟಲ್‌ವುಡ್‌ನ‌ ಎಲ್ಲ ಕಾಮಿಡಿ ಸ್ಟಾರ್‌ಗಳನ್ನು ಇಟ್ಟುಕೊಂಡು ಸಿನೆಮಾ ಸಿದ್ಧಪಡಿಸಲಾಗುತ್ತಿದೆ. ಮುಂಬಯಿ ಉದ್ಯಮಿಯೊಬ್ಬರು ಸಿನೆಮಾ ನಿರ್ಮಾಣ ಮಾಡಲಿದ್ದು, ಫುಲ್‌ ಕಾಮಿಡಿ ಆಧಾರಿತವಾಗಿ ಸಿನೆಮಾ ಮೂಡಿಬರಲಿದೆ. ಬಹತೇಕ ನವೆಂಬರ್‌ ಕೊನೆಯಲ್ಲಿ ಸಿನೆಮಾದ ಶೂಟಿಂಗ್‌ ಆರಂಭವಾಗಲಿದೆ.