ಅವ್ಯವಸ್ಥೆ ನಡುವೆಯೇ ಬೆಂಗ್ಳೂರಲ್ಲಿ ಹಾಕಿ ಆಟಗಾರರ ಐಸ್‌ ಬಾತ್‌

ಬೆಂಗಳೂರು: ಉದ್ಯಾನಗರಿ ಸಾಯ್‌ (ಭಾರತೀಯ ಕ್ರೀಡಾ ಪ್ರಾಧಿಕಾರ)ನಲ್ಲಿ ನಡೆಯುತ್ತಿರುವ ಭಾರತ ಕಿರಿಯರ ರಾಷ್ಟ್ರೀಯ ಹಾಕಿ ತಂಡದ ತರಬೇತಿ ಶಿಬಿರದಲ್ಲಿ ಆಟಗಾರರು ಕಳಪೆ ಮೂಲ ಸೌಕರ್ಯಕ್ಕೊಳಗಾಗಿ ಸುದ್ದಿಯಾಗಿದ್ದಾರೆ. ಮುರಿದು ಹೋದ ಪ್ಲ್ರಾಸ್ಟಿಕ್‌ ಟ್ಯಾಂಕ್‌ನಲ್ಲಿ ಆಟಗಾರರನ್ನು “ಐಸ್‌ ಬಾತ್‌’ (ಐಸ್‌ ನೀರಿನ ಸ್ನಾನ) ಮಾಡಿಸಲಾಗಿದೆ ಎನ್ನುವ ದೂರು ಕೇಳಿ ಬಂದಿದೆ. ಆಂಗ್ಲ ಮಾಧ್ಯಮವೊಂದು ಫೋಟೋ ಸಹಿತ ವರದಿ ಮಾಡಿದೆ. ವೃತ್ತಿಪರ ಯುವ ಪ್ರತಿಭೆಗಳಿಗೆ ಕಳಪೆ ಮೂಲ ಸೌಕರ್ಯ ನೀಡಿದ ಸಾಯ್‌ ವಿರುದ್ಧ ಈಗ ಭಾರೀ ಟೀಕೆ ವ್ಯಕ್ತವಾಗಿದೆ.

ಬಯಲಿನಲ್ಲೇ “ಐಸ್‌ ಬಾತ್‌’: ಘಟನೆ ಬಗ್ಗೆ ಹೆಸರು ಹೇಳಲಿಚ್ಛಿಸದ ಪ್ರತ್ಯಕ್ಷದರ್ಶಿ ಆಂಗ್ಲ ಪತ್ರಿಕೆಗೆ ಮಾತನಾಡಿದ್ದಾರೆ. ಅವರು ಹೇಳಿದ್ದು ಇಷ್ಟು. “ತಂಡ ಉಳಿದು  ಕೊಂಡಿರುವ ಹಾಸ್ಟೇಲ್‌ ಪಕ್ಕದಲ್ಲಿ ಮುರಿದು ಹೋಗಿರುವ ಹಳೆಯ ಪ್ಲ್ರಾಸ್ಟಿಕ್‌ ಟ್ಯಾಂಕಿಯೊಂದು ಇದೆ. ಆಟಗಾರರಿಗೆ ಅಲ್ಲಿಯೇ “ಐಸ್‌ ಬಾತ್‌’ ಮಾಡಿ ಸಲಾ ಗುತ್ತಿದೆ. ಹಾಗೆ ನೋಡುವುದಾದರೆ ತಲಾ ಇಬ್ಬರು ಆಟಗಾರರಿಗೆ ಒಳಾಂಗಣ ಜಾಗದಲ್ಲಿ ಟಬ್‌ಗಳನ್ನು ನೀಡಿ “ಐಸ್‌ ಬಾತ್‌’ಗೆ ವ್ಯವಸ್ಥೆ ಮಾಡಿಸಬೇಕು. ಪ್ರತಿಯೊಬ್ಬ ಆಟಗಾರನಿಗೆ 10-15 ನಿಮಿಷ ಐಸ್‌ ನೀರಿನ ಸ್ನಾನ ಸಿಗಬೇಕು. ಆದರೆ ಇಲ್ಲಿ ಒಂದೇ ಟಬ್‌ನಲ್ಲಿ 6-8 ಆಟಗಾರರು ಐಸ್‌ ನೀರಿನ ಸ್ನಾನ ಮಾಡುತ್ತಾರೆ. ಇದರಿಂದ ಐಸ್‌ ನೀರಿನ ಸ್ನಾನದ ಪರಿಣಾಮ ಆಟಗಾರರ ಮೇಲೆ ಬೀರುವುದಿಲ್ಲ ಎಂದಿದ್ದಾರೆ.

ಸಾಯ್‌ ಸ್ಟಷ್ಟನೆ: ಘಟನೆ ಕುರಿತಂತೆ ಸಾಯ್‌ ಅಧಿಕಾರಿಗಳು ಪ್ರತಿಕ್ರಿಯಿಸಿದ್ದಾರೆ. ಕಳೆದ ತಿಂಗಳಷ್ಟೇ ಕಿರಿಯರ ರಾಷ್ಟ್ರೀಯ ಕ್ಯಾಂಪ್‌ ಆರಂಭವಾಗಿದೆ. ಟಬ್‌ಗಳನ್ನು ಅಳವಡಿಸುವ ಕಾರ್ಯಕ್ಕೆ ಚಾಲನೆ ಸಿಕ್ಕಿದೆ. ಶೀಘ್ರದಲ್ಲೇ ಅಳವಡಿಸುತ್ತೇವೆ ಎಂದಿದ್ದಾರೆ. 

ಏನಿದು ಐಸ್‌ ಬಾತ್‌?
ಮೈದಾನದಲ್ಲಿ ಕಠಿಣ ಅಭ್ಯಾಸ ನಡೆಸಿದ ಬಳಿಕ ಆಟಗಾರರು ರಿಲ್ಯಾಕ್ಸ್‌ ಮಾಡಲು ಐಸ್‌ ನೀರಿನ ಸ್ಥಾನ ಮಾಡುತ್ತಾರೆ. ಇದನ್ನು ಪ್ರತಿ ದಿನವೂ ಮಾಡಿದರೆ ಒಳ್ಳೆಯದು. ಇದನ್ನು “ಐಸ್‌ ಬಾತ್‌’ ಎಂದು ಕರೆಯಲಾಗುತ್ತದೆ. “ಐಸ್‌ ಬಾತ್‌” ಮಾಡುವುದರಿಂದ ಹಲವು ಪ್ರಯೋಜನವಿದೆ. ಆಟಗಾರನ ಆಯಾಸ ಶೀಘ್ರ ಪರಿಹಾರವಾಗುತ್ತದೆ. ಜತೆಗೆ ನೋವು ನಿವಾರಣೆಯಾಗುತ್ತದೆ. ಐಸ್‌ ನೀರಿನ ಸ್ನಾನಕ್ಕೆ ಒಳಾಂಗಣ ಕ್ರೀಡಾಂಗಣ ಉತ್ತಮ. ಕನಿಷ್ಠ ಎಂದರೂ 10/10 ವಿಸ್ತೀರ್ಣದಲ್ಲಿ ಟ್ಯಾಂಕ್‌ ಅಳವಡಿಸಬೇಕು. ಅದರಲ್ಲಿ ಒಬ್ಬ ಅಥವಾ ಇಬ್ಬರಿಗಷ್ಟೇ ಅವಕಾಶ. ಹೀಗೆ ಮಾಡಿದಾಗ ಐಸ್‌ ನೀರಿನ ಸ್ನಾನದ ಪರಿಣಾಮ ಕಾಣಬಹುದು.