ಬೆಳಗಲ್ಲ ಗ್ರಾಪಂ ನೂತನ ಕಟ್ಟಡ ಉದ್ಘಾಟನೆ

ಹುನಗುಂದ: ಬೆಳಗಲ್ಲ ಗ್ರಾಮ ಪಂಚಾಯತ ನೂತನ ಕಟ್ಟಡ ಲಾಕ್‌ಡೌನ್‌ ಮಧ್ಯೆಯೂ ಶುಕ್ರವಾರ ಉದ್ಘಾಟನೆಗೊಂಡಿತು.

ಭೂ ಸೇನಾ ನಿಗಮದಿಂದ 18 ಲಕ್ಷ ಅನುದಾನದಲ್ಲಿ ನಿರ್ಮಿಸಲಾಗಿದ್ದ ಹೊಸ ಕಟ್ಟಡದ ಪ್ರವೇಶ ಕಾರ್ಯಕ್ರಮ ಕೋವಿಡ್  ಭೀತಿ ಹಿನ್ನೆಲೆಯಲ್ಲಿ ಸರಳವಾಗಿ ಜರುಗಿತು. ಬಿಸನಾಳ ಗ್ರಾಮದ ಹಾಲಮತ ಸಮಾಜದ ಗ್ಯಾನೇಶ್ವರ ಪೀಠದ ಏಕಪ್ಪಯ್ಯ ಗ್ಯಾನಪ್ಪಯ್ಯನವರ ಸಾನ್ನಿಧ್ಯದಲ್ಲಿ ಕೂಡಲಸಂಗಮ ಜಿಪಂ ಸದಸ್ಯ ವೀರೇಶ ಉಂಡೋಡಿ ಹೊಸ ಕಟ್ಟಡ ಉದ್ಘಾಟಿಸಿದರು. ಗ್ರಾಪಂ ಅಧ್ಯಕ್ಷ ಮಹಾಂತೇಶ ಉಂಡೋಡಿ ಅಧ್ಯಕ್ಷತೆ ವಹಿಸಿದ್ದರು.

ಅಂಗನವಾಡಿ ಕಟ್ಟಡ ಉದ್ಘಾಟನೆ: ಮಹಾತ್ಮ ಗಾಂಧಿ ರಾಷ್ಟ್ರೀಯ ಉದ್ಯೋಗ ಖಾತ್ರಿ ಯೋಜನೆಯಡಿಯಲ್ಲಿ 5 ಲಕ್ಷ ಮತ್ತು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ 3 ಲಕ್ಷ ಅನುದಾನದಲ್ಲಿ ನಿರ್ಮಾಣವಾಗಿದ್ದ ಅಂಗನವಾಡಿಯ ಕಟ್ಟಡವನ್ನು ಗ್ರಾಪಂ ಉಪಾಧ್ಯಕ್ಷೆ ಮತ್ತು ಸರ್ವ ಮಹಿಳಾ ಸದಸ್ಯರು ಸೇರಿ ಉದ್ಘಾಟಿಸಿದರು. ಗ್ರಾಪಂ ಹಳೆಯ ಕಟ್ಟಡದಲ್ಲಿ ಆರೋಗ್ಯ ಮತ್ತು ಕ್ಷೇಮ ಉಪಕೇಂದ್ರಕ್ಕೆ ಇದೇ ಸಂದರ್ಭದಲ್ಲಿ ಚಾಲನೆ ನೀಡಲಾಯಿತು.

ಗ್ರಾಪಂ ಉಪಾಧ್ಯಕ್ಷೆ ಶಾಂತವ್ವ ಗುರಿಕಾರ, ಸದಸ್ಯರಾದ ಸಂಗಣ್ಣ ಶಿರೂರ, ಸಿದ್ರಾಮಪ್ಪ ಅಂಗಡಿ, ಧರ್ಮಣ್ಣ ಹಳ್ಳಪ್ಪನವರ, ನಾಗಮ್ಮ ಬಿಜಕಲ್ಲ, ದ್ಯಾಮಣ್ಣ ಭಜಂತ್ರಿ, ಬಸವ್ವ ವಾಲ್ಮೀಕಿ, ಶರಣವ್ವ ಮಾದರ, ಚನ್ನಮ್ಮ ಗೌಡರ, ಮಲ್ಲನಗೌಡ ಪಾಟೀಲ, ಸೋಮವ್ವ ಚಲವಾದಿ, ಹುಲಗವ್ವ ಕಳ್ಳಿಗುಡ್ಡ ಉಪಸ್ಥಿತರಿದ್ದರು.