ಬಾರಾಮುಲ್ಲಾ ಎನ್‌ಕೌಂಟರ್‌: ಇಬ್ಬರು ಉಗ್ರರ ಹತ್ಯೆ, ಮೇಜರ್‌ ಹುತಾತ್ಮ

ಶ್ರೀನಗರ : ಜಮ್ಮು ಕಾಶ್ಮೀರದ ಬಾರಾಮುಲ್ಲಾ ಜಿಲ್ಲೆಯ ಸೋಪೋರ್‌ ಪ್ರದೇಶದಲ್ಲಿ  ಭದ್ರತಾ ಪಡೆಗಳು ನಡೆಸಿರುವ ಎನ್‌ಕೌಂಟರ್‌ನಲ್ಲಿ ಇಬ್ಬರು ಉಗ್ರರು ಹತರಾಗಿದ್ದು ಓರ್ವ ಸೇನಾ ಮೇಜರ್‌ ಹುತಾತ್ಮರಾಗಿರುವುದಾಗಿ ಸೇನಾ ಮೂಲಗಳು ತಿಳಿಸಿವೆ.

ಉಗ್ರರ ವಿರುದ್ದದ  ಎನ್‌ಕೌಂಟರ್‌ನ ಆರಂಭಿಕ ಸುತ್ತಿನ ಫೈರಿಂಗ್‌ ನಲ್ಲಿ ಸೇನಾ ಮೇಜರ್‌ ಅವರಿಗೆ ಉಗ್ರರ ಗುಂಡು ತಗುಲಿ ಅವರು ತೀವ್ರವಾಗಿ ಗಾಯಗೊಂಡರು. ಬಳಿಕ ಅವರು ಕೊನೆಯುಸಿರೆಳೆದರು ಎಂದು ಸೇನಾ ವಕ್ತಾರ ಕರ್ನಲ್‌ ರಾಜೇಶ್‌ ಕಾಲಿಯಾ ತಿಳಿಸಿದರು. 

ಹತರಾಗಿರುವ ಉಗ್ರರು ಯಾವ ಸಂಘಟನೆಗೆ ಸೇರಿದವರು ಎಂಬುದನ್ನು ತಿಳಿಯುವ ಪ್ರಯತ್ನ ನಡೆದಿದೆ. ಗಾಯಾಳು ಮೇಜರ್‌ ಅವರನ್ನು ಒಡನೆಯೇ ಬಾದಾಮಿಬಾಗ್‌ನ 92ನೇ ನೆಲೆಯಲ್ಲಿರುವ ಸೇನಾ ಆಸ್ಪತ್ರೆಗೆ ಒಯ್ಯಲಾಯಿತಾದರೂ ಅವರ ಪ್ರಾಣವನ್ನು ಉಳಿಸಲಾಗಿಲ್ಲ. 

ಈ ಎನ್‌ಕೌಂಟರ್‌ ನಡೆದಿರುವುದು ಉತ್ತರ ಕಾಶ್ಮೀರ ಜಿಲ್ಲೆಯ ದಾಂಗೀವಾಚಾ ಸೋಪೋರ್‌ನ ಪಜಲಪೋರಾ ಗ್ರಾಮದಲ್ಲಿ. ಉಗ್ರರಿಬ್ಬರ ಹತ್ಯೆಯನ್ನು ಅನುಸರಿಸಿ ಭದ್ರತಾ ಪಡೆಗಳು ಇದೀಗ ಇಡಿಯ ಪ್ರದೇಶವನ್ನು ಸುತ್ತುವರಿದು ಶೋಧ ಕಾರ್ಯಾಚರಣೆಯನ್ನು ಆರಂಭಿಸಿದ್ದಾರೆ.