ಇನ್ನು ಮೂರು ವಾರ ಕನ್ನಡ ಚಿತ್ರಪ್ರೇಮಿಗಳಿಗೆ ಸ್ಟಾರ್‌ ಸಿನಿಮಾಗಳನ್ನು ಕಣ್ತುಂಬಿಕೊಳ್ಳುವ ಅವಕಾಶ. ವಾರಕ್ಕೊಂದು ಸ್ಟಾರ್‌ ಸಿನಿಮಾವನ್ನು ಎಂಜಾಯ್‌ ಮಾಡಬಹುದು! ಹೌದು, ಮೇ 12 ರಿಂದ ಆರಂಭವಾಗುವ ಸ್ಟಾರ್‌ ಸಿನಿಮಾ ಮೇ 26 ರವರೆಗೆ ಮುಂದುವರೆಯಲಿದೆ. ಮೇ 12 ರಂದು “ದುನಿಯಾ’ ವಿಜಯ್‌ ಅಭಿನಯದ “ಮಾಸ್ತಿಗುಡಿ’, ಮೇ 19 ರಂದು ಶಿವರಾಜಕುಮಾರ್‌ ಅವರ “ಬಂಗಾರ ಸನ್‌ಆಫ್ ಬಂಗಾರದ ಮನುಷ್ಯ’ ಹಾಗೂ ಮೇ 26 ರಂದು ಗಣೇಶ್‌ ಅವರ “ಪಟಾಕಿ’ ಚಿತ್ರ ಬಿಡುಗಡೆಯಾಗಲಿವೆ.
ಮೇ 12 ರಂದು ಬಿಡುಗಡೆಯಾಗುತ್ತಿರುವ “ಮಾಸ್ತಿಗುಡಿ’ ಚಿತ್ರ ನಾನಾ ಕಾರಣಗಳಿಗಾಗಿ ಸುದ್ದಿಯಾಗಿದ್ದು, ಇಲ್ಲಿ ವಿಜಯ್‌ ವಿಭಿನ್ನ ಗೆಟಪ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಹಾಡು ಹಾಗೂ ಟ್ರೇಲರ್‌ಗೆ ಮೆಚ್ಚುಗೆ ವ್ಯಕ್ತವಾಗುವ ಮೂಲಕ ಚಿತ್ರತಂಡ ಕೂಡಾ ಸಿನಿಮಾ ಬಗ್ಗೆ ವಿಶ್ವಾಸದಿಂದಿದೆ. ಈ ಚಿತ್ರದಲ್ಲಿ ಅಮೂಲ್ಯ ಹಾಗೂ ಕೃತಿ ಕರಬಂದ ನಾಯಕಿಯರಾಗಿ ನಟಿಸಿದ್ದಾರೆ. ಈ ಚಿತ್ರವನ್ನು ನಾಗಶೇಖರ್‌ ನಿರ್ದೇಶನ ಮಾಡಿದ್ದಾರೆ.
ಇನ್ನು, ಮೇ 19ಕ್ಕೆ ಶಿವರಾಜಕುಮಾರ್‌ ಅವರ “ಬಂಗಾರ ಸನ್‌ಆಫ್ ಬಂಗಾರದ ಮನುಷ್ಯ’ ಚಿತ್ರ ಬಿಡುಗಡೆಯಾಗುತ್ತಿದೆ. ಅಲ್ಲಿಗೆ ಶಿವರಾಜಕುಮಾರ್‌ ಅವರ ಚಿತ್ರ ಯಾವಾಗ ಬಿಡುಗಡೆಯಾಗುತ್ತದೆಂದು ಕಾಯುತ್ತಿದ್ದ ಅವರ ಅಭಿಮಾನಿಗಳಿಗೆ ಹಬ್ಬದ ಸಂಭ್ರಮ. ಇದು ಈ ವರ್ಷ ಬಿಡುಗಡೆಯಾಗುತ್ತಿರುವ ಶಿವರಾಜಕುಮಾರ್‌ ಅವರ ಎರಡನೇ ಚಿತ್ರ. ವರ್ಷದ ಆರಂಭದಲ್ಲೇ “ಶ್ರೀಕಂಠ’ ಬಿಡುಗಡೆಯಾಗಿತ್ತು.
ಈಗ “ಬಂಗಾರ ಸನ್‌ಆಫ್ ಬಂಗಾರದ ಮನುಷ್ಯ’. ಇಲ್ಲಿ ಶಿವರಾಜಕುಮಾರ್‌ ಅವರು ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಚಿತ್ರವನ್ನು ಯೋಗಿ ಜಿ ರಾಜ್‌ ನಿರ್ದೇಶನ ಮಾಡಿದ್ದಾರೆ. ಜಯಣ್ಣ ಕಂಬೈನ್ಸ್‌ನಡಿ ಚಿತ್ರ ನಿರ್ಮಾಣವಾಗಿದೆ. ಗಣೇಶ್‌ ಅವರ “ಪಟಾಕಿ’ ಚಿತ್ರ ಕೂಡಾ ಈ ತಿಂಗಳೇ ಬಿಡುಗಡೆಯಾಗಲಿದೆ. ಮೇ 26 ರಂದು ಈ ಚಿತ್ರವನ್ನು ಬಿಡುಗಡೆ ಮಾಡಲು ನಿರ್ಮಾಪಕ ಎಸ್‌.ವಿ.ಬಾಬು ನಿರ್ಧರಿಸಿದ್ದಾರೆ. ಮಂಜು ಸ್ವರಾಜ್‌ ಈ ಚಿತ್ರದ ನಿರ್ದೇಶಕರು.
“ಪಟಾಕಿ’ಯಲ್ಲಿ ಮೊದಲ ಬಾರಿಗೆ ಗಣೇಶ್‌ ಪೊಲೀಸ್‌ ಆಫೀಸರ್‌ ಆಗಿ ನಟಿಸಿದ್ದು, ಸಾಯಿಕುಮಾರ್‌ ಕೂಡಾ ಪ್ರಮುಖ ಪಾತ್ರ ಮಾಡಿದ್ದಾರೆ. ರನ್ಯಾ ಈ ಚಿತ್ರದ ನಾಯಕಿ. ಇದಲ್ಲದೇ, “ಆ ದಿನಗಳು’ ಚೇತನ್‌ ನಾಯಕರಾಗಿರುವ “ನೂರೊಂದು ನೆನಪು’ ಚಿತ್ರ ಕೂಡಾ ಮೇನಲ್ಲೇ ಬಿಡುಗಡೆಯಾಗುತ್ತಿದೆ. ಅಲ್ಲಿಗೆ ಕನ್ನಡ ಸಿನಿ ಪ್ರೇಮಿಗಳಿಗೆ ಸತತವಾಗಿ ಭಿನ್ನ ಜಾನರ್‌ನ ಸಿನಿಮಾಗಳನ್ನು ಕಣ್ತುಂಬಿಕೊಳ್ಳುವ ಅವಕಾಶ ಸಿಕ್ಕಂತಾಗಿದೆ.
