ಯೋಗ ಶಿಕ್ಷಕರು, ಸೆಂಟರ್‌ ಹುಡುಕಲು ಆ್ಯಪ್‌

ಹೊಸದಿಲ್ಲಿ: ಯೋಗ ಶಿಕ್ಷಕರು ಹಾಗೂ ಯೋಗ ಕೇಂದ್ರಗಳು ಸಮೀಪದಲ್ಲಿ ಎಲ್ಲಿವೆ ಎಂಬುದನ್ನು ಕಂಡುಕೊಳ್ಳಲು ಆಯುಷ್‌ ಸಚಿವಾಲಯವು ಆ್ಯಪ್‌ವೊಂದನ್ನು ಬಿಡುಗಡೆ ಮಾಡಿದೆ. ಜೂನ್‌ 21 ರ ಅಂತಾರಾಷ್ಟ್ರೀಯ ಯೋಗ ದಿನಕ್ಕೂ ಮುನ್ನ ಈ ಆ್ಯಪ್‌ ಬಿಡುಗಡೆ ಮಾಡಲಾಗಿದ್ದು, ಯೋಗ ಕಾರ್ಯಕ್ರಮಗಳ ವಿವರಗಳೂ ಇದರಲ್ಲಿ ಲಭ್ಯವಿರುತ್ತದೆ.

ಯೋಗ ಲೊಕೇಟರ್‌ ಎಂಬ ಹೆಸರಿನ ಈ ಆ್ಯಪ್‌ ಅನ್ನು ಯೋಗ ಶಿಕ್ಷಕರೂ ಡೌನ್‌ಲೋಡ್‌ ಮಾಡಿಕೊಂಡು ನೋಂದಣಿ ಮಾಡಿಕೊಳ್ಳಬಹುದು. ಇದರಿಂದ ಹೆಚ್ಚಿನ ಜನರನ್ನು ಯೋಗದತ್ತ ಸೆಳೆಯಬಹುದು ಎದು ಆಯುಷ್‌ ಇಲಾಖೆ ಅಧಿಕಾರಿಗಳು ವಿವರಿಸಿದ್ದಾರೆ. ದೇಶಾದ್ಯಂತ 2 ಲಕ್ಷಕ್ಕೂ ಹೆಚ್ಚು ಯೋಗ ಶಿಕ್ಷಕರಿದ್ದಾರೆ. ಇವರೆಲ್ಲರೂ ಇದರಲ್ಲಿ ನೋಂದಣಿ ಮಾಡಿಕೊಳ್ಳಬಹುದು. ಈ ಬಾರಿಯ ಅಂತಾರಾಷ್ಟ್ರೀಯ ಯೋಗ ದಿನದಂದು ಬೃಹತ್‌ ಯೋಗ ಕಾರ್ಯಕ್ರಮ ನಡೆಸಲು ಮೈಸೂರು ಸೇರಿದಂತೆ ದೇಶದ ಐದು ನಗರಗಳ ಹೆಸರನ್ನು ಶಿಫಾರಸು ಮಾಡಲಾಗಿದೆ. ಇದು ಪ್ರಧಾನಿಯಾಗಿ ಮೋದಿ 2ನೇ ಬಾರಿಗೆ ಅಧಿಕಾರ ಸ್ವೀಕರಿಸಿದ ನಂತರ ಹಮ್ಮಿಕೊಳ್ಳಲಾಗುವ ಅತಿದೊಡ್ಡ ಸಾರ್ವಜನಿಕ ಕಾರ್ಯಕ್ರಮವೂ ಆಗಿರಲಿದೆ.