Ayodhya: ಸೋಲಾರ್‌ ಸಿಟಿಯಾಗಲಿದೆ ಅಯೋಧ್ಯೆ

ಲಕ್ನೋ: ರಾಮಜನ್ಮಭೂಮಿ ಅಯೋಧ್ಯೆಯಲ್ಲಿ ರಾಮ ಮಂದಿರ ನಿರ್ಮಾಣದ ಜತೆಗೆ ನಗರದ ಅಭಿವೃದ್ಧಿಯು ಬಿರುಸಾಗಿದ್ದು, ರಾಮಲಲ್ಲಾನ ಪ್ರತಿಷ್ಠಾಪನೆಗೂ ಮುನ್ನವೇ ಅಯೋಧ್ಯೆಯು ಉತ್ತರಪ್ರದೇಶದ ಮೊದಲ ಸೋಲಾರ್‌ ಸಿಟಿ ಎಂಬ ಖ್ಯಾತಿಗೆ ಪಾತ್ರವಾಗಲಿದೆ. ಈ ನಿಟ್ಟಿನಲ್ಲಿ ಈಗಾಗಲೇ ಕಾಮಗಾರಿಗಳನ್ನು ಆರಂಭಿಸಿರುವುದಾಗಿ ಸ್ಥಳೀಯಾಡಳಿತ ತಿಳಿಸಿದೆ.

ಉತ್ತರ ಪ್ರದೇಶದ ನವೀಕರಿಸಬಹುದಾದ ಇಂಧನಗಳ ಇಲಾಖೆ ಈ ಕಾಮಗಾರಿಯನ್ನು ಕೈಗೆತ್ತಿಕೊಂಡಿದ್ದು, ಸಂಪೂರ್ಣ ಅಯೋಧ್ಯೆಯನ್ನು ಸೌರಶಕ್ತಿ ಚಾಲಿತ ನಗರವನ್ನಾಗಿಸಲು ಯೋಜಿಸಲಾಗಿದೆ. ಸರಯೂ ನದಿ ದಂಡೆಯಲ್ಲಿ ಸೋಲಾರ್‌ ಪಾರ್ಕ್‌ ನಿರ್ಮಾಣವಾಗುತ್ತಿದೆ. ಅದರ ಮೂಲಕ ಸೋಲಾರ್‌ ಬೀದಿ ದೀಪಗಳು, ಸೋಲಾರ್‌ ಚಾಲಿತ ಬೋಟ್‌ಗಳು, ಸಾರ್ವಜನಿಕ ಸಾರಿಗೆಯಲ್ಲೂ ಸೋಲಾರ್‌ ಅಳವಡಿಕೆ, ಸಾರ್ವಜನಿಕ ಸ್ಥಳಗಳಲ್ಲಿ ಸೋಲಾರ್‌ ಚಾಲಿತ ಚಾರ್ಜಿಂಗ್‌ ಪಾಯಿಂಟ್‌ಗಳ ನಿರ್ಮಾಣ, ಸರ್ಕಾರಿ ಕಚೇರಿಗಳಿಗೆ ಸೋಲಾರ್‌ ಚಾಲಿತ ವಿದ್ಯುತ್‌ ಸಂಪರ್ಕ ಕಲ್ಪಿಸಲು ಉದ್ದೇಶಿಸಲಾಗಿದ್ದು, ಈಗಾಗಲೇ ಬಹುತೇಕ ಕಾಮಗಾರಿ ಪೂರ್ಣಗೊಳ್ಳುವ ಹಂತದಲ್ಲಿದೆ.

ಸೋಲಾರ್‌ ಸಿಟಿ ನಿರ್ಮಾಣವು ಸಂಪೂರ್ಣ 5 ವರ್ಷಗಳ (2023 ರಿಂದ 2028) ಯೋಜನೆಯಾಗಿದ್ದು, ಪ್ರಸಕ್ತ ಪ್ರಗತಿಯಲ್ಲಿರುವ ಕಾಮಗಾರಿಗಳನ್ನು ಮಂದಿರ ಉದ್ಘಾಟನೆ ಅಂದರೆ 2024ರ ಜನವರಿಗೂ ಮುಂಚೆ ಪೂರ್ಣಗೊಳಿಸಲು ಯೋಜಿಸಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.