ಬಂಟ್ವಾಳ:ಸಚಿವ ರೈ ಆಪ್ತನ ಮೇಲೆ ಗುಂಪು ದಾಳಿ; ಬಿಜೆಪಿ ಮೇಲೆ ಆರೋಪ 

ಬಂಟ್ವಾಳ: ಸಚಿವ ರಮಾನಾಥ ರೈ ಅವರ ಆಪ್ತ, ತಾಲೂಕು ಪಂಚಾಯತ್‌ ಸದಸ್ಯ ಸಜಿಪ ಮೂಡ ಗ್ರಾಮದ ಸಂಜೀವ್‌ ಪೂಜಾರಿ ಎನ್ನುವವರ ಮೇಲೆ 20 ಕ್ಕೂ ಹೆಚ್ಚು ದುಷ್ಕರ್ಮಿಗಳು ಗುಂಪು ದಾಳಿ ನಡೆಸಿದ ಘಟನೆ ಗುರುವಾರ ತಡರಾತ್ರಿ ನಡೆದಿದೆ. 

ಪ್ರಚಾರ ಮುಗಿಸಿ ಮನೆಗೆ ಬರುತ್ತಿದ್ದಂತೆ 15 ಕ್ಕೂ ಹೆಚ್ಚು ದುಷ್ಕರ್ಮಿಗಳು ದಾಳಿ ನಡೆಸಿದ್ದು, 2 ಕಾರುಗಳು ಜಖಂ ಗೊಂಡಿವೆ. ತಡೆಯಲು ಬಂದ ಮೂವರ ಮೇಲೂ ಹಲ್ಲೆ ನಡೆಸಲಾಗಿದ್ದು, ಮೂವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. 

ಸಚಿವ ರಮನಾಥ್‌ ರೈ ಅವರು ಸ್ಥಳಕ್ಕಾಗಮಿಸಿ ಪರಿಶೀಲನೆ ನಡೆಸಿದ್ದಾರೆ. ಕೃತ್ಯವನ್ನು ಬಿಜೆಪಿಯವರು ಮಾಡಿದ್ದಾರೆ ಎಂದು ಕಾಂಗ್ರೆಸ್‌ ಆರೋಪಿಸಿದೆ. 

ಸಂಜೀವ ಪೂಜಾರಿ ಅವರ ಮೇಲೆ ಐಟಿ ದಾಳಿ ನಡೆದಿತ್ತು, ಬಾರ್‌ ಮಾಲಿಕರಾಗಿರುವ ಅವರ ಮೇಲೆ ಬಿಜೆಪಿ ಅಕ್ರಮ ಮದ್ಯ ಮಾರಾಟ ಮಾಡಿದ ಆರೋಪ ಮಾಡಿತ್ತು. 

ಬಂಟ್ವಾಳ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರಿಸಿದ್ದಾರೆ.