ಚೆನ್ನೈ: ಕಾಲಿವುಡ್‌ ನಿರ್ದೇಶಕ ಅಟ್ಲಿ ಕುಮಾರ್‌ ಕಳೆದ ವರ್ಷ ʼಜವಾನ್‌ʼ ಮೂಲಕ ಬಾಲಿವುಡ್‌ ನಲ್ಲೂ ಯಶಸ್ಸು ಸಾಧಿಸಿದ್ದರು. ʼಜವಾನ್‌ʼ ಸಿನಿಮಾ 1,100 ಕೋಟಿಗೂ ಅಧಿಕ ಗಳಿಕೆ ಕಾಣುವ ಮೂಲಕ ವರ್ಲ್ಡ್‌ ವೈಡ್ ಬಾಕ್ಸ್‌ ಆಫೀಸ್‌ ನಲ್ಲಿ ಭರ್ಜರಿ ಸದ್ದು ಮಾಡಿತ್ತು.
ಶಾರುಖ್ ಖಾನ್, ನಯನತಾರಾ ದೀಪಿಕಾ ಪಡುಕೋಣೆ ʼಜವಾನ್‌ʼ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾದ ಬಳಿಕ ಅಟ್ಲಿ ಅವರ ಬೇಡಿಕೆ ಮತ್ತಷ್ಟು ಹೆಚ್ಚಾಗಿದೆ. ಸೋಲಿಲ್ಲದ ಸರದಾರನಾಗಿ ಅಟ್ಲಿ ಮುನ್ನುಗ್ಗುತ್ತಿದ್ದಾರೆ.
ಅಟ್ಲಿ ಮುಂದೆ ದಳಪತಿ ವಿಜಯ್‌ ಅವರೊಂದಿಗೆ ಸಿನಿಮಾ ಮಾಡಲಿದ್ದಾರೆ ಎನ್ನಲಾಗಿತ್ತು. ಆದರೆ ಇದೀಗ ಅಟ್ಲಿ ಟಾಲಿವುಡ್‌ ಸೂಪರ್‌ ಸ್ಟಾರ್‌ ಅಲ್ಲು ಅರ್ಜುನ್‌ ಅವರೊಂದಿಗೆ ಸಿನಿಮಾ ಮಾಡಲಿದ್ದಾರೆ ಎಂದು ವರದಿ ಆಗಿದೆ.
ಈ ಸಿನಿಮಾಕ್ಕಾಗಿ ಸನ್‌ ಪಿಕ್ಚರ್ಸ್‌ ಕೈಜೋಡಿಸಿದ್ದು, ಸಿನಿಮಾವನ್ನು ನಿರ್ಮಾಣ ಮಾಡಲಿದೆ. ಇದಕ್ಕಾಗಿ ಅಟ್ಲಿ 60 ಕೋಟಿ ಸಂಭಾವನೆ ಪಡೆಯಲಿದ್ದಾರೆ. ಇದು ಕಾಲಿವುಡ್‌ ನಿರ್ದೇಶಕನೊಬ್ಬ ಪಡೆಯುವ ಅತೀ ಹೆಚ್ಚು ಸಂಭಾವನೆ ಆಗಲಿದೆ. ಆ ಮೂಲಕ ಖ್ಯಾತ ಕಾಲಿವುಡ್‌ ನಿರ್ದೇಶಕ ಎಸ್. ಶಂಕರ್‌ ಅವರ ಸಂಭಾವನೆಯನ್ನು ಕೂಡ ಅಟ್ಲಿ ಮೀರಿಸಲಿದ್ದಾರೆ ಎಂದು ವರದಿ ಆಗಿದೆ.
ಈ ಹಿಂದೆ ಎಸ್.ಶಂಕರ್‌ ಅವರು ಅತೀ ಹೆಚ್ಚು ಸಂಭಾವನೆ ಪಡೆಯುವ ನಿರ್ದೇಶಕರಾಗಿದ್ದರು. ಅಟ್ಲಿ ಅವರು ಎಸ್.ಶಂಕರ್‌ ಅವರ ಜೊತೆ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದರು. ಇಂದಿಗೂ ಅಟ್ಲಿ ಶಂಕರ್‌ ಅವರನ್ನು ಮಾರ್ಗದರ್ಶಕರೆಂದೇ ಗೌರವ ಕೊಟ್ಟು, ಗುರುವಿನ ಸ್ಥಾನದಲ್ಲಿ ಇಟ್ಟಿದ್ದಾರೆ.
ಸದ್ಯ ಅಲ್ಲು ಅರ್ಜುನ್‌ ಜೊತೆಗಿನ ಸಿನಿಮಾದ ಸ್ಕ್ರಿಪ್ಟ್ ಕೆಲಸ ಆರಂಭವಾಗಿದ್ದು, ಅಂತಿಮ ಹಂತದ ಮಾತುಕತೆ ನಡೆಯುತ್ತಿದೆ ಎಂದು ವರದಿ ತಿಳಿಸಿದೆ.
ಅಟ್ಲಿ ಅವರ ʼತೇರಿʼ ಸಿನಿಮಾ ರಿಮೇಕ್‌ ಆಗಿ ಹಿಂದಿಯಲ್ಲಿ ಬರುತ್ತಿದೆ. ಇದಕ್ಕೆ ʼಬೇಬಿ ಜಾನ್‌ʼ ಎಂದು ಟೈಟಲ್‌ ಇಡಲಾಗಿದೆ. ಈ ಸಿನಿಮಾಕ್ಕೆ ಅಟ್ಲಿ ನಿರ್ಮಾಪಕರಾಗಿ ಕೈಜೋಡಿಸಿದ್ದಾರೆ. ಸಿನಿಮಾದಲ್ಲಿ ವರುಣ್ ಧವನ್ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ.
