ದುಬಾೖ ಏಶ್ಯನ್‌ ಬಾಕ್ಸಿಂಗ್‌: ಭಾರತಕ್ಕೆ ಇನ್ನೂ ವೀಸಾ ಲಭಿಸಿಲ್ಲ

ಹೊಸದಿಲ್ಲಿ: ಇದೇ ತಿಂಗಳು ದುಬಾೖಯಲ್ಲಿ ನಡೆಯಲಿರುವ “ಏಶ್ಯನ್‌ ಬಾಕ್ಸಿಂಗ್‌ ಚಾಂಪಿಯನ್‌ಶಿಪ್‌’ನಲ್ಲಿ ಭಾರತದ ಸ್ಪರ್ಧಿಗಳು ಭಾಗವಹಿಸುವ ಸಾಧ್ಯತೆ ಮಸುಕಾಗಿದೆ. ಕಾರಣ, ಭಾರತಕ್ಕೆ ಇನ್ನೂ ವೀಸಾ ಲಭಿಸಿಲ್ಲ. ಬಾಕ್ಸಿಂಗ್‌ ಫೆಡರೇಶನ್‌ ಆಫ್ ಇಂಡಿಯಾ (ಬಿಎಫ್ಐ) ಸೋಮವಾರ ಈ ಮಾಹಿತಿ ನೀಡಿದೆ.

ಭಾರತ ತಂಡದಲ್ಲಿ 10 ಮಂದಿ ವನಿತಾ ಸ್ಪರ್ಧಿಗಳೂ ಇದ್ದಾರೆ. ಮೇ 21ರಿಂದ ಈ ಪಂದ್ಯಾವಳಿ ಆರಂಭವಾಗಲಿದೆ.
“ದುಬಾೖ ಪ್ರಯಾಣಕ್ಕೆ ಭಾರತದ ಬಾಕ್ಸಿಂಗ್‌ ತಂಡದ ಸದಸ್ಯರಿಗೆ ಈ ವರೆಗೆ ವೀಸಾ ಲಭಿಸಿಲ್ಲ. ಈ ನಿಟ್ಟಿನಲ್ಲಿ ನಾವು ಗರಿಷ್ಠ ಪ್ರಯತ್ನ ಮಾಡುತ್ತಿದ್ದೇವೆ’ ಎಂಬುದಾಗಿ ಬಿಎಫ್ಐ ಕಾರ್ಯದರ್ಶಿ ಹೇಮಂತ್‌ ಕಲಿಟಾ ಹೇಳಿದ್ದಾರೆ.

ಹೊಸದಿಲ್ಲಿ ಆತಿಥ್ಯ
ಮೂಲ ವೇಳಾಪಟ್ಟಿ ಪ್ರಕಾರ ಈ ಪಂದ್ಯಾವಳಿ ಹೊಸದಿಲ್ಲಿಯಲ್ಲಿ ನಡೆಯಬೇಕಿತ್ತು. ಆದರೆ ಭಾರತದಲ್ಲಿ ಕೊರೊನಾ ಸೋಂಕು ಹೆಚ್ಚಿದ ಕಾರಣ ಇದು ದುಬಾೖಗೆ ಸ್ಥಳಾಂತರಗೊಂಡಿತು.

ಈ ಪಂದ್ಯಾವಳಿಗಾಗಿ ಭಾರತದ ಪುರುಷರ ತಂಡ ಪಟಿಯಾಲಾದ ನ್ಯಾಶನಲ್‌ ಇನ್‌ಸ್ಟಿಟ್ಯೂಟ್‌ ಆಫ್ ನ್ಪೋರ್ಟ್ಸ್ನಲ್ಲಿ ಹಾಗೂ ವನಿತಾ ತಂಡ ಪುಣೆಯ ಆರ್ಮಿ ನ್ಪೋರ್ಟ್ಸ್ ಇನ್‌ಸ್ಟಿಟ್ಯೂಟ್‌ನಲ್ಲಿ ಅಭ್ಯಾಸ ಆರಂಭಿಸಿತ್ತು. 4 ವನಿತೆಯರ ಸಹಿತ ಭಾರತದ ಒಟ್ಟು 9 ಬಾಕ್ಸರ್ ಈಗಾಗಲೇ ಟೋಕಿಯೊ ಒಲಿಂಪಿಕ್ಸ್‌ ಅರ್ಹತೆ ಪಡೆದಿದ್ದಾರೆ.