Asia Cup Hockey: ಥಾಯ್ಲೆಂಡ್‌ ವಿರುದ್ಧ ಭಾರತಕ್ಕೆ 11-0 ಅಂತರದ ಜಯ

ಮಸ್ಕತ್‌ (ಒಮಾನ್‌): ಕಿರಿಯರ ಏಷ್ಯಾ ಕಪ್‌ ಹಾಕಿ ಪಂದ್ಯದಲ್ಲಿ ಥಾಯ್ಲೆಂಡ್‌ ವಿರುದ್ಧ ಪಾರಮ್ಯ ಮೆರೆದ ಭಾರತ 11-0 ಅಂತರದಿಂದ ಭರ್ಜರಿ ಜಯ ಗಳಿಸಿ ಶುಭಾರಂಭ ಮಾಡಿದೆ. “ಎ’ ಗುಂಪಿನ ಅಂಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನಿಯಾಗಿದೆ. ಎರಡೂ ಪಂದ್ಯ ಗೆದ್ದಿರುವ ದಕ್ಷಿಣ ಕೊರಿಯಾ ಅಗ್ರಸ್ಥಾನದಲ್ಲಿದೆ.

ಪಂದ್ಯ ಆರಂಭವಾದ ಎರಡೇ ನಿಮಿಷದಲ್ಲಿ ಭಾರತ ಖಾತೆ ತೆರೆಯಿತು. ಅರೈಜೀತ್‌ ಸಿಂಗ್‌ ಮುನ್ನಡೆ ಕೊಟ್ಟರು. 24ನೇ ನಿಮಿಷದಲ್ಲಿ ಅವರಿಂದ ಇನ್ನೊಂದು ಗೋಲು ದಾಖಲಾಯಿತು. ಗುರ್ಜೋತ್‌ ಸಿಂಗ್‌ (18 ಮತ್ತು 45ನೇ ನಿಮಿಷ) ಮತ್ತು ಸೌರಭ್‌ ಆನಂದ್‌ ಕೂಡ 2 ಗೋಲು ಹೊಡೆದರು (19 ಮತ್ತು 52ನೇ ನಿಮಿಷ).

8ನೇ ನಿಮಿಷದಲ್ಲಿ ಅರ್ಷದೀಪ್‌ ಸಿಂಗ್‌, 10ನೇ ನಿಮಿಷದಲ್ಲಿ ಶಾರದಾನಂದ ತಿವಾರಿ, 21ನೇ ನಿಮಿಷದಲ್ಲಿ ದಿಲ್‌ರಾಜ್‌ ಸಿಂಗ್‌, 29ನೇ ನಿಮಿಷದಲ್ಲಿ ರೋಹಿತ್‌, 59ನೇ ನಿಮಿಷದಲ್ಲಿ ಮುಕೇಶ್‌ ಟೊಪ್ಪೊ… ಹೀಗೆ ಭಾರತದಿಂದ ಗೋಲ್‌ಗ‌ಳ ಮಳೆಯೇ ಸುರಿಯಿತು. ಗೋಲ್‌ಗಾಗಿ ಥಾಯ್ಲೆಂಡ್‌ ನಡೆಸಿದ ಎಲ್ಲ ಪ್ರಯತ್ನ ಗಳನ್ನು ಭಾರತೀಯರು ಹಿಮ್ಮೆಟ್ಟಿಸಿದರು. ಭಾರತವಿನ್ನು ಗುರುವಾರ ಜಪಾನ್‌ ವಿರುದ್ಧ ಕಣಕ್ಕಿಳಿಯಲಿದೆ.