400ರಷ್ಟು ಉಗ್ರರು ಒಳನುಸುಳಲು ಸಿದ್ಧ

ಜಮ್ಮು: ಗಡಿ ನಿಯಂತ್ರಣ ರೇಖೆಯ ಬಳಿ ಸುಮಾರು 400 ಉಗ್ರರು ಲಾಂಚ್‌ ಪ್ಯಾಡ್‌ಗಳಲ್ಲಿ ಸನ್ನದ್ಧ ಸ್ಥಿತಿಯಲ್ಲಿದ್ದಾರೆ. ಭಾರೀ ಚಳಿಯ ದುರ್ಲಾಭ ಪಡೆದು ಭಾರತದೊಳಕ್ಕೆ ನುಸುಳಲು ಕಾದು ನಿಂತಿದ್ದಾರೆ ಎಂಬುದಾಗಿ ಭದ್ರತ ಮೂಲಗಳು ತಿಳಿಸಿವೆ.

ಜಮ್ಮು- ಕಾಶ್ಮೀರದ ಕಣಿವೆಗಳು ಮತ್ತು ಬೆಟ್ಟಗಳು ಹಿಮದಲ್ಲಿ ಆಚ್ಛಾದಿತವಾಗಿರುವಾಗ ಉಗ್ರರನ್ನು ಗಡಿಯಾಚೆಗೆ ಕಳುಹಿಸಲು ಪಾಕಿಸ್ಥಾನ ಪ್ರಯತ್ನಿಸುತ್ತಿದೆ ಎಂದು ಅಲ್ಲಿನ ಉನ್ನತ ಪೊಲೀಸ್‌ ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಕಳೆದ ವರ್ಷ 44 ಉಗ್ರರು ಒಳನುಸುಳಿದ್ದರೆ 2019ರಲ್ಲಿ 141 ಉಗ್ರರು ಬಂದಿದ್ದರು. 2018ರಲ್ಲಿ ಈ ಸಂಖ್ಯೆ 143 ಆಗಿತ್ತು. ಬಿಗಿಯಾದ ಗಡಿ ಕಾವಲಿನಿಂದಾಗಿ ವರ್ಷದಿಂದ ವರ್ಷಕ್ಕೆ ಒಳನುಸುಳುವಿಕೆ ಕಡಿಮೆಯಾಗಿದ್ದು, ಇದರಿಂದ ಪಾಕ್‌ ಹತಾಶವಾಗಿದೆ ಎಂದು ಈ ಅಧಿಕಾರಿ ತಿಳಿಸಿದ್ದಾರೆ. ಈ ಹತಾಶೆಯಿಂದಲೇ ಪಾಕ್‌ 2020ರಲ್ಲಿ 5,100 ಬಾರಿ ಕದನ ವಿರಾಮ ಉಲ್ಲಂ ಸಿತ್ತು. 2003ರಲ್ಲಿ ಕದನ ವಿರಾಮ ಜಾರಿಗೆ ಬಂದ ಬಳಿಕ ಇದು ಅತೀ ಹೆಚ್ಚು ಉಲ್ಲಂಘನೆಯಾಗಿದೆ.

175-210 ಉಗ್ರರು ಪೀರ್‌ ಪಂಜಾಲ್‌ನ ಉತ್ತರದಲ್ಲಿ ಪಾಕ್‌ ಆಕ್ರಮಿತ ಕಾಶ್ಮೀರ ಭಾಗದಲ್ಲಿ ಸಿದ್ಧವಾಗಿದ್ದರೆ, 119-216 ಮಂದಿ ಪೀರ್‌ ಪಂಜಾಲ್‌ನ ದಕ್ಷಿಣದ ಜಮ್ಮು ಪ್ರದೇಶದಲ್ಲಿದ್ದಾರೆ ಎಂದು ಭದ್ರತ ಮೂಲಗಳು ತಿಳಿಸಿವೆ.