ಆರ್ಜೆಂಟೀನಾ ಓಪನ್‌: ಥೀಮ್‌ ಮುನ್ನಡೆ, ಫೆರರ್‌ ಔಟ್‌

ಬ್ಯೂನಸ್‌ ಐರೆಸ್‌: ಆರ್ಜೆಂಟೀನಾ ಓಪನ್‌ ಟೆನಿಸ್‌ ಪಂದ್ಯಾವಳಿಯಲ್ಲಿ ಅಗ್ರ ಶ್ರೇಯಾಂಕದ ಆಸ್ಟ್ರಿಯನ್‌ ಆಟಗಾರ ಡೊಮಿನಿಕ್‌ ಥೀಮ್‌ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. ಆದರೆ ಸ್ಪೇನಿನ ಡೇವಿಡ್‌ ಫೆರರ್‌ ಪರಾಭವಗೊಂಡಿದ್ದಾರೆ. ಹಾಲಿ ಚಾಂಪಿಯನ್‌ ಕೂಡ ಆಗಿರುವ ಡೊಮಿನಿಕ್‌ ಥೀಮ್‌ ಜರ್ಮನಿಯ ಮಾಕ್ಸಿಮಿಲಿಯನ್‌ ಮಾರ್ಟರರ್‌ ಅವರನ್ನು 6-4, 6-4 ಅಂತರದಿಂದ ಪರಾಭವಗೊಳಿಸಿದರು. ಇವರ ಮುಂದಿನ ಎದುರಾಳಿ ಉರುಗ್ವೆಯ ಪಾಬ್ಲೊ ಕ್ಯುವಾಸ್‌. ದಿನದ ಇನ್ನೊಂದು ಪಂದ್ಯದಲ್ಲಿ ಕ್ಯುವಾಸ್‌ ಪೋರ್ಚುಗಲ್‌ನ ಜೋ ಸೂಸ ಅವರನ್ನು 6-4, 7-5ರಿಂದ ಹಿಮ್ಮೆಟ್ಟಿಸಿದರು.

ಡೇವಿಡ್‌ ಫೆರರ್‌ ಅವರನ್ನು ಸ್ಪೇನಿನವರೇ ಆದ ಆಲ್ಬರ್ಟ್‌ ರಮೋಸ್‌ ವಿನೋಲಸ್‌ 3-6, 7-6 (9), 6-3 ಅಂತರದಿಂದ ಸೋಲಿಸಿದರು. ತವರಿನ 4ನೇ ಶ್ರೇಯಾಂಕದ ಆಟಗಾರ ಡೀಗೊ ಶ್ವಾರ್ಟ್ಸ್ಮನ್‌ ಸ್ಲೊವೇನಿಯಾದ ಅಲ್ಜಾಜ್‌ ಬೆಡೇನ್‌ ವಿರುದ್ಧ 6-4, 2-6, 6-2 ಅಂತರದ ಜಯ ಸಾಧಿಸಿದರು. 36ರ ಹರೆಯದ ಡೇವಿಡ್‌ ಫೆರರ್‌ ಈಗಾಗಲೇ ನಿವೃತ್ತಿಯ ಮುನ್ಸೂಚನೆ ನೀಡಿದ್ದು, ಮೇ ತಿಂಗಳಲ್ಲಿ ನಡೆಯುವ ಮ್ಯಾಡ್ರಿಡ್‌ ಓಪನ್‌ ಟೂರ್ನಿಯಲ್ಲಿ ಕೊನೆಯ ಸಲ ಕಾಣಿಸಿಕೊಳ್ಳಲಿದ್ದೇನೆ ಎಂದಿದ್ದಾರೆ.