“ಆ್ಯಪಲ್‌’ಸಿಇಒ ಕುಕ್‌ ಸಂಬಳ ಶೇ.15ರಷ್ಟು ಕಟ್‌

ಸ್ಯಾನ್‌ ಫ್ರಾನ್ಸಿಸ್ಕೋ: ನಿಗದಿತ ಗುರಿ ತಲುಪಲು ವಿಫ‌ಲವಾಗುವ ನೌಕರನ ಸಂಬಳವನ್ನು ಕಂಪನಿಗಳು ಕಡಿತಗೊಳಿಸುವುದು ಸರ್ವೇಸಾಮಾನ್ಯ. ಆದರೆ ಇದೇ ಅನುಭವ ವಿಶ್ವವಿಖ್ಯಾತ ಆ್ಯಪಲ್‌ ಕಂಪನಿಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (ಸಿಇಒ) ಟಿಮ್‌ ಕುಕ್‌ ಅವರಿಗೂ ಆಗಿದೆ.

ಕಂಪನಿಯ ಆದಾಯ 15 ವರ್ಷದಲ್ಲಿ ಇದೇ ಮೊದಲ ಬಾರಿಗೆ ಕುಸಿತ ಕಂಡ ಹಿನ್ನೆಲೆಯಲ್ಲಿ ಟಿಮ್‌ ಕುಕ್‌ ಅವರ ವೇತನವನ್ನು ಆ್ಯಪಲ್‌ ಕಂಪನಿ ಶೇ.15ರಷ್ಟು ಕಡಿತಗೊಳಿಸಿದೆ.

ಕಳೆದ ವರ್ಷ ಕುಕ್‌ ಅವರಿಗೆ 70 ಕೋಟಿ ರೂ. ವೇತನವನ್ನು ಆ್ಯಪಲ್‌ ಕಂಪನಿ ನೀಡಿತ್ತು. ಆದರೆ ಈ ಬಾರಿ 59 ಕೋಟಿ ರೂ. ಪಾವತಿಸಿದೆ. ಆ್ಯಪಲ್‌ ಕಂಪನಿಯ ಆದಾಯ ಶೇ.8ರಷ್ಟು ಕುಸಿದು 14 ಲಕ್ಷ ಕೋಟಿ ರೂ.ಗೆ ಇಳಿದಿದ್ದು ಹಾಗೂ ನಿರ್ವಹಣಾ ಲಾಭ ಶೇ.16ರಷ್ಟು ಇಳಿಕೆ ಕಂಡು 4 ಲಕ್ಷ ಕೋಟಿ ರೂಪಾಯಿಗೆ ಕುಸಿದಿದ್ದೇ ಇದಕ್ಕೆ ಕಾರಣ ಎಂದು ಹೇಳಲಾಗಿದೆ.

 2007ರಲ್ಲಿ ಆ್ಯಪಲ್‌ ಐಫೋನ್‌ ಬಿಡುಗಡೆಯಾದ ಬಳಿಕ ಇದೇ ಮೊದಲ ಬಾರಿಗೆ ಅವುಗಳ ಮಾರಾಟ ಪ್ರಮಾಣ ಇಳಿಕೆ ಕಂಡಿದೆ. ಆ್ಯಪಲ್‌ ಹಲವಾರು ಆಧುನಿಕ ಫೋನುಗಳನ್ನು ಬಿಡುಗಡೆ ಮಾಡುತ್ತಿದೆ.